فوتو: اقوردا
كەزدەسۋ بارىسىندا قاسىم-جومارت توقاەۆ قازاق-قىتاي ماڭگى ءارى جان-جاقتى ستراتەگيالىق سەرىكتەستىگى قارقىندى دامىپ كەلە جاتقانىن جانە بولاشاقتا دا وسى باعىتتان اينىمايتىنىن اتاپ ءوتتى.
«بۇگىندە ءبىزدىڭ بەرىك بايلانىستارىمىز ماڭگى دوستىق, تاتۋ كورشىلىك پەن ستراتەگيالىق سەرىكتەستىككە نەگىزدەلگەن ءوزارا ءتيىمدى مەملەكەتارالىق ىقپالداستىقتىڭ ۇلگىسى سانالادى. ءبىز قحر-مەن قارىم-قاتىناستى جوعارى باعالايمىز. سونداي-اق قازاقستان تاراپىنان جان-جاقتى ىنتىماقتاستىقتى نىعايتۋ ءۇشىن بارلىق قاجەتتى شارا قابىلدانادى. سونىمەن قاتار مەن قىتاي كومپارتياسى ورتالىق كوميتەتىنىڭ باس حاتشىسى, قىتاي حالىق رەسپۋبليكاسىنىڭ توراعاسى سي تسزينپين مىرزامەن دوستىعىمدى وتە جوعارى باعالايمىن», دەدى مەملەكەت باسشىسى.
پرەزيدەنت ماۋسىم ايىندا ەكىنشى «ورتالىق ازيا – قىتاي» سامميتىنە قاتىسۋ ءۇشىن استاناعا كەلەتىن قحر توراعاسىنىڭ ساپارى اياسىندا ستراتەگيالىق سەرىكتەستىكتىڭ جاڭا مۇمكىندىكتەرى ايقىندالاتىنىنا سەنىم ءبىلدىردى.
مەملەكەت باسشىسى قازاقستان مەن قىتايدىڭ كوپجاقتى قۇرىلىمدار اياسىنداعى كوزقاراستارى ۇقساس ەكەنىن اتاپ ءوتىپ, توراعا سي ءتسزينپيننىڭ حالىقارالىق قۇقىقتىڭ نەگىزگى قاعيداتتارى مەن بۇۇ جارعىسىنا ساي ءادىل الەمدىك ءتارتىپتى قالىپتاستىرۋدى كوزدەيتىن جاھاندىق باستامالارىن قولدايتىنىن جەتكىزدى.
بۇدان بولەك, قاسىم-جومارت توقاەۆ ەلىمىزدىڭ ء«بىرتۇتاس قىتاي» ساياساتىنا بەيىل ەكەنىن راستادى.
ءوز كەزەگىندە ليۋ تسزيانچاو مەملەكەت باسشىسىنا توراعا سي ءتسزينپيننىڭ ىستىق ىقىلاسىن جەتكىزدى. ونىڭ ايتۋىنشا, قىتاي قازاقستاندى ستراتەگيالىق تۇرعىدان ماڭىزدى سەرىكتەس رەتىندە قاراستىرادى جانە قازاق-قىتاي ماڭگى ءارى جان-جاقتى ارىپتەستىگىن تەرەڭدەتۋگە ەرەكشە ءمان بەرەدى.
كەزدەسۋ بارىسىندا ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى نىعايتۋ جولدارى تالقىلاندى. وسى ورايدا قاسىم-جومارت توقاەۆ ەكى ەلدىڭ تاۋار اينالىمىن ۇلعايتىپ, كولىك-لوگيستيكا, ەنەرگەتيكا جانە جاساندى ينتەللەكتىنى دامىتۋ سالالارىندا ءىرى ينۆەستيتسيالىق جوبالاردى جۇزەگە اسىرۋعا وراسان زور مۇمكىندىك بار ەكەنىن اتاپ ءوتتى.
