فوتو: ۇكىمەت
پرەمەر-مينيستر ولجاس بەكتەنوۆ قىتايدىڭ Xinjiang Lihua (Group) Co., Ltd كومپانياسىنىڭ ديرەكتورلار كەڭەسىنىڭ توراعاسى چجان تسيحايمەن كەزدەستى. تۇركىستان وبلىسىنداعى TURAN ارنايى ەكونوميكالىق ايماعىندا ماقتا-توقىما كلاستەرىن قۇرۋ جونىندەگى ينۆەستيتسيالىق جوبانى ىسكە اسىرۋ بارىسى قارالدى.
جوبا ماقتا وسىرۋدەن باستاپ يىرىلگەن ءجىپ, ماتا, كيىم تۇرىندەگى باسقا دا دايىن توقىما ونىمدەرىن شىعارۋعا دەيىن ءوندىرىستىڭ تولىق تسيكلىن, ياعني, ماقتا اگروونەركاسىبى كەشەنىن قالىپتاستىرۋعا باعىتتالعان. ەگىس القاپتارىنا 50 مىڭ گەكتاردان استام جەر ءبولىندى, 10 زاۋىت سالۋ جوسپارلانىپ وتىر, ونىڭ ىشىندە 4-ءۋى ەگىس القاپتارىنا جاقىن ماقتا وڭدەۋ بويىنشا, 2-ءۋى – زاماناۋي سۋ ۇنەمدەۋ تەحنولوگيالارىن قولدانا وتىرىپ, تامشىلاتىپ سۋارۋ جۇيەلەرىن ءوندىرۋ بويىنشا, سونداي-اق تىگىن جانە بوياۋ-ارلەۋ فابريكاسىن قوسا العاندا, 4 توقىما زاۋىتى بار. ينۆەستيتسيالاردىڭ جالپى سوماسى 200 ملرد تەڭگەدەن اسادى. 4 مىڭنان استام جۇمىس ورنىن اشۋ كوزدەلگەن, ولاردىڭ ىشىندە 3 مىڭ تۇراقتى جۇمىس ورنى بار.
بۇگىندە كلاستەردىڭ قاجەتتىلىكتەرىن قامتاماسىز ەتۋ ءۇشىن پۆح قۇبىرلارىن شىعاراتىن زاۋىت ىسكە قوسىلدى, توقىما فابريكالارىنىڭ قۇرىلىسى باستالدى. ينۆەستور سۋارۋ ينفراقۇرىلىمىنىڭ (كانالدار جەلىسى, سورعى ستانساسى) قۇرىلىسىن جۇرگىزىپ جاتىر.
Xinjiang Lihua (Group) Co., Ltd كومپانياسى ديرەكتورلار كەڭەسىنىڭ توراعاسى چجان تسيحاي ەلىمىزدەگى قولايلى ينۆەستيتسيالىق احۋالدى جانە جوبا ءۇشىن ءوڭىردىڭ قولايلى كليماتتىق ەرەكشەلىكتەرىن اتاپ ءوتتى. چجان تسيحاي بيىلعى قازان ايىنان باستاپ دايىن ءونىمنىڭ العاشقى ءوندىرىسىن ىسكە قوسۋ جوسپارلانىپ وتىرعانىن حابارلادى.
پرەمەر-مينيستر ولجاس بەكتەنوۆ ىسكە اسىرىلىپ جاتقان جوبانىڭ ءمانىن جانە ەكونوميكانى دامىتۋداعى كلاستەرلىك ءتاسىلدىڭ ماڭىزدىلىعىن اتاپ ءوتتى. تۇركىستان وبلىسى – قازاقستاننىڭ ماقتا وسىرەتىن جالعىز ءوڭىرى.
«مەملەكەت باسشىسى ەكونوميكانى ءارتاراپتاندىرۋ جانە ناقتى سەكتورعا ينۆەستيتسيا تارتۋ مىندەتىن قويدى. ماقتا-توقىما كلاستەرىن قۇرۋ ءونىمنىڭ قوسىلعان قۇنىن ارتتىرۋعا, قايتا وڭدەۋگە جانە ەلىمىزدىڭ ەكسپورتتىق الەۋەتىن ارتتىرۋعا باسا نازار اۋدارا وتىرىپ, اۋىل شارۋاشىلىعى ءوندىرىسىن دامىتۋعا ىقپال ەتەدى. ۇكىمەت ءوز تاراپىنان قاجەتتى قولداۋ كورسەتەدى», دەدى ولجاس بەكتەنوۆ.
