فوتو: قىرمىزى جۇماعاليقىزى
الامان ايتىستى ايتىسكەر اقىن, قر پارلامەنتى ءماجىلىسىنىڭ دەپۋتاتى, فيلولوگيا عىلىمدارىنىڭ دوكتورى, پروفەسسور, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى امانجول ءالتاي جۇرگىزدى.
جىر سايىسىنا ەلىمىزدىڭ تۇكپىر-تۇكپىرىنەن كەلگەن 14 اقىن قاتىسىپ, ءسوز بارىمتاسىنا ءتۇستى. قالامگەرلەر تاپقىرلىق پەن تەرەڭ ويدىڭ كورىنىسىن كورسەتىپ, سان عاسىرلىق جىراۋلىق ءداستۇردى جالعادى. تۇركىستان تورىندە وتكەن بۇل ايتىس – تەك جىر بايگەسى عانا ەمەس, ەلدىك مۇراتتاردى دارىپتەگەن رۋحاني كەش بولدى.
ايتىستىڭ ءادىل باعاسىن بەرەتىن قازىلار القاسىنىڭ قۇرامىندا ءسوز ونەرىنىڭ مايتالماندارى وتىردى. ولاردىڭ ىشىندە قازاق ايتىسىنىڭ ابىز اقساقالى, «قازاقستان ايتىس اقىندارى مەن جىرشى تەرمەشىلەردىڭ حالىقارالىق وداعىنىڭ» باسقارما توراعاسى ءجۇرسىن ەرمان جانە ەلىمىزگە تانىمال اقىندار بار.
قازىلار القاسىنىڭ شەشىمىمەن سۋىرىپسالما ونەردىڭ جۇيرىكتەرى انىقتالدى. باس جۇلدە مەن 1 500 000 تەڭگەنى جاس اقىن شۇعايىپ سەزىمحان قانجىعاسىنا بايلادى. ونىڭ وتكىر ءتىلى, ۇتىمدى ۇيقاسى, استارلى ويلارى كورەرمەننىڭ دە, قازىلاردىڭ دا كوڭىلىنەن شىقتى.
ءسوز بايگەسىندە جۇلدەلى ورىندارعا لايىق دەپ تانىلعان اقىندار:
• ءى ورىن – داۋرەن اقساقالوۆ
• II ورىن – نۇربەك باكىر
• III ورىن – ءۇش بىردەي اقىنعا بۇيىردى: اسەل ەرەجەقىزى, مۇحتار نيازوۆ جانە زىليحا ناۋرىزالينا
جۇلدەسىز قالعان ايتىسكەر بولعان جوق.قاتىسۋشىلاردىڭ بارلىعىنا 500 000 تەڭگەلىك سەرتيفيكاتتار تابىستالدى.
كوپشىلىك اسىعا كۇتكەن بۇل ايتىس ۇلتتىق رۋحتىڭ بيىكتىگىن تاعى ءبىر دالەلدەدى. اقىندار ەلدىڭ تۇيتكىلدى ماسەلەلەرىن جىرلاپ, قوعامداعى وزەكتى تاقىرىپتاردى قوزعادى. شابىت پەن شىندىقتىڭ شارپىسقان الامانى كورەرمەندەردى بەيجاي قالدىرعان جوق.
تۇركىستان تورىندە وتكەن بۇل ءدۇبىرلى دودا ەل ەسىندە ۇزاق ساقتالارى انىق. ۇلتتىق ونەرىمىزدى ۇلىقتاعان الامان ايتىس كەلەشەكتە دە ءداستۇرلى تۇردە جالعاسىپ, قازاق ءسوز ونەرىنىڭ مارتەبەسىن كوتەرە بەرەتىنى ءسوزسىز.
