بۇل مەرەكەلىك كەش تۇركىستان قالاسى اكىمدىگىنىڭ قولداۋىمەن ءوتتى. كۇندىزگى ناۋرىز تويىنىڭ دۋمانىنان شابىتتانعان تۇركىستاندىقتار مەن قالا قوناقتارى كەشكى ۋاقىتتا ءان مەن جىردىڭ مەرەكەسىنە كۋا بولدى. تۇركى دۇنيەسىنىڭ رۋحاني استاناسىنا اينالعان كيەلى شاھاردا قازاق ەستراداسىنىڭ جارىق جۇلدىزدارى ونەر كورسەتىپ, حالىققا تاماشا كوڭىل-كۇي سىيلادى.
كەشكە قازاق مۋزىكاسىنىڭ ماقتانىشتارى – روزا رىمباەۆا مەن ماقپال ءجۇنىسوۆا باستاعان ونەر يەلەرى قاتىستى. بۇل قوس ءانشى – قازاق ەستراداسىنىڭ سيمۆولىنا اينالعان دارا تۇلعالار. ولاردىڭ ورىنداۋىنداعى اسەم اندەر تىڭدارمان جۇرەگىنە جەتىپ, ءاربىر تىڭداۋشىعا ەرەكشە اسەر قالدىردى.
سونىمەن قاتار, ساحنادا تامارا اسار, ءابدىجاپپار القوجا, ءمولدىر اۋەلبەكوۆا ايدار تۇرعامبەك, ايگۇل يمانباەۆا جانە نۇربولات ابدۋللين سىندى تاعى باسقا دا انشىلەر ءوز ونەرلەرىن ورتاعا سالدى. ولار تەك تانىمال حيت اندەرىن ەمەس, ۇلتتىق اۋەندەر مەن حالىق اندەرىنە نەگىزدەلگەن ەرەكشە شىعارمالاردى دا ورىنداپ, كەشتىڭ ءسانىن كەلتىردى.
اسىرەسە, قازاقتىڭ ءداستۇرلى اندەرى مەن زاماناۋي وڭدەۋدەگى مۋزىكالىق قويىلىمدار كورەرمەندى ەرەكشە اسەرگە بولەدى. جاندى داۋىستاعى كەرەمەت ورىنداۋلار, ساحناداعى اسەم بەزەندىرۋ مەن جارىق شوۋلارى كونتسەرتتىڭ ءسانىن ارتتىرىپ, تىڭدارماندى ونەردىڭ سيقىرلى الەمىنە جەتەلەدى.
«كەرۋەن ساراي» كەشەنى حالىققا لىق تولىپ, قالا قوناقتارى مەن تۇرعىندارى مۋزىكا اۋەنىمەن تەربەلىپ تۇردى. تۇركىستان اسپانىن ءان مەن جىر تەربەپ, كوكتەمنىڭ ەرەكشە لەبىن سەزدىردى. اسىرەسە, حالىقتىڭ سۇيىكتى انشىلەرى ساحناعا شىققاندا, كورەرمەن بىرگە شىرقاپ, كەشتىڭ اتموسفەراسىن ودان ءارى جانداندىرا ءتۇستى.
بۇل كونتسەرت تەك ادەمى ءان كەشى عانا ەمەس, ۇلتتىق مادەنيەتىمىزدى ناسيحاتتايتىن, رۋحىمىزدى اسقاقتاتاتىن ۇلكەن مەرەكەلىك دۋمان بولدى.
