ايەلدەر اراسىندا الەم چەمپيونى اتانعان شەتەلدىك بالۋانداردىڭ قارىمى قۋانتتى. حالىقارالىق ارەنادا ۇلتتىق كۇرەسىمىزدىڭ ناسيحاتى نىعايىپ, قارقىن الىپ كەلە جاتقانى ايقىندالا ءتۇستى. وزگە ەلدەردىڭ بالۋاندارى ازيا چەمپيوناتى, الەم كۋبوگى سىندى سايىستاردا دا التىن مەدال ءۇشىن نە بەل, نە بەلبەۋ ۇزىلگەنشە كۇرەسىپ ءجۇر. دەلي تورىندە دە باسەكەلەستىكتىڭ جوعارى ەكەنى كورىندى. اسىرەسە 52 كگ سالماقتا سىنعا تۇسكەندەر اراسىندا وزبەك قىزى سيتورا ەلمۋرادوۆا شەبەرلىگىمەن ءتانتى ەتتى. فينالدىق بەلدەسۋدە ۇندىستاندىق مۋسكان مۋسكاندى «تياگارادج» ۇلتتىق ستاديونىن دۇبىرگە بولەگەن جەرگىلىكتى جانكۇيەرلەردىڭ قيقۋلاي قولداعانىنا قاراماستان ايقىن جەڭدى. ۇندىستاندىق قىزداردى دا قازاق كۇرەسىنەن وسال دەۋگە استە بولمايدى. ماسەلەن, 60 كگ سالماقتا ۇندىستاندىق اننۋ اننۋ قالاي بەلدەستى! مۋسكان جەرلەسىنىڭ كەتكەن ەسەسىن قايتارىپ, فينالدىق بەلدەسۋدە وزبەكستان سپورتشىسى حۋرشيدا تۋحليەۆادان باسىم ءتۇستى. ال 70 كگ سالماقتا نيدەرلاند ەلىنىڭ بالۋان قىزى سەم ۆان دۋنگە قۇددى ءبىر قازاق دالاسىندا تۋىپ, بالا جاسىنان ءتول كۇرەسىمىزبەن تەل وسكەندەي اسەر قالدىردى. ءادىس-ءتاسىلدى ورايلى قولدانۋى قالاي, قورعانىستا دا اپتىققان جوق. 77 كگ سالماق دارەجەسىندە قارسىلاستارىنىڭ ءبارىن قوعاداي جاپىرعان گرۋزين قىزى نينو ودزەلاشۆيليدىڭ قىرقا شالۋدى, توبىقتان قاعۋدى شەبەر مەڭگەرگەنىنە ءتانتى بولاسىڭ.
ەرلەر سىنىندا اسا اۋىر سالماقتا (+100 كگ) وزبەكستاندىق بالۋان مۋكسين حيسوميددينوۆ الەمدىك دودانىڭ التىن مەدالىن يەلەندى. فينالدا ول جەرلەسىمىز نۇرداۋلەت جارىلعاپوۆتى جىعىپ كەتتى.
قازاق كۇرەسى 2022 جىلدان بەرى بىرىككەن كۇرەس الەمى (UWW) حالىقارالىق ۇيىمىنا مۇشە بولىپ بەكىتىلدى. وسىدان باستاپ ۇلتتىق ويىنىمىزدان وتەتىن عالامدىق دودالار وسى ۇيىمنىڭ كۇنتىزبەلىك جوسپارىنا ەنگىزىلىپ كەلەدى. تاعى ءبىر اقجولتاي اقپارات «Qazaq kuresi» قاۋىمداستىعىنىڭ باس ديرەكتورى دامير بەكبوسىنوۆ وسى ۇيىمنىڭ ۇلتتىق كۇرەس تۇرلەرى كوميتەتى اتقارۋشى كەڭەسىنە قابىلداندى. بۇل بايلام ءتول ويىنىمىز, ۇلتتىق كۇرەسىمىز جازعى ازيا ويىندارىنىڭ باعدارلاماسىنا ەنۋىنە نىق قادام بولۋعا ءتيىس.
