ونىڭ ايتۋىنشا, بۇرىن عىلىمي ەسەپتەۋلەردىڭ ونىمدىلىگىن شەتەلدىك سۋپەركومپيۋتەرلەردە تەستىلەۋدەن وتكىزسە, ەندى بۇدان بىلاي اتالعان ۋنيۆەرسيتەتتىڭ سۋپەركومپيۋتەرىندە جۇمىس ىستەۋگە مۇمكىندىك تۋىپ وتىر. وتاندىق سۋپەركومپيۋتەر كۇردەلى تاپسىرمالارعا ارنالعان جوعارى ەسەپتەۋلەردى جۇرگىزۋ ارقىلى ەلىمىزدىڭ عىلىمى مەن ەكونوميكالىق دامۋىنا زور ۇلەس قوسپاق.
بازارگۇل ماتكەرىمقىزى قازاق ۇلتتىق ۋنيۆەرسيتەتىنىڭ كومپيۋتەرلىك عىلىمدار كافەدراسىندا اعا وقىتۋشى جانە كومپيۋتەرلىك عىلىمدار زەرتحاناسىندا جەتەكشى عىلىمي قىزمەتكەر بولىپ جۇمىس ىستەيدى. ونىڭ نەگىزگى عىلىمي زەرتتەۋ باعىتى: جوعارى ءونىمدى ەسەپتەۋ ماشينالارىندا, ياعني سۋپەركومپيۋتەرلەردە ەسەپتەۋگە قاجەتتى عىلىمي ەسەپتەۋلەردىڭ پاراللەلدى باعدارلاما قوسىمشاسىن جوبالاۋ جانە وڭدەۋ.
سۋپەركومپيۋتەر – جوعارى ەسەپتەۋ قۋاتى مول قۇرال. سونداي-اق مۇندا عىلىمي جانە كۇردەلى ينجەنەرلىك ەسەپتەردى شەشەدى. بۇل ميلليونداعان ەسەپتەۋ بارىسىن نەبارى سەكۋند ىشىندە ورىندايتىن قابىلەتكە يە. سۋپەركومپيۋتەرلەر ادەتتە اۋا رايىن بولجاۋ مەن كليماتتىق مودەلدەر قۇرۋ, عىلىمي زەرتتەۋلەر (مولەكۋلالىق ديناميكا, كۆانتتىق فيزيكا, بيوينفورماتيكا), ينجەنەرلىك سيمۋلياتسيالار (اۆياتسيا, اۆتوكولىك, عارىش تەحنيكاسى), جاساندى ينتەللەكت جانە ماشينالىق وقىتۋ, ۇلكەن دەرەكتەردى تالداۋ, بولجاۋ سەكىلدى كۇردەلى تاپسىرمالاردى شەشۋگە قولدانىلادى.
ءبىزدىڭ كەيىپكەرىمىز عىلىمي زەرتتەۋ جوبالارىنا 2009 جىلدان باستاپ, بەلسەنە ارالاسىپ, وسى جىلدار ارالىعىندا 15-تەن استام عىلىمي جوباعا قاتىسقان. قازىرگى تاڭدا 2024–2026 جىلدارعا ارنالعان ەكى بىردەي عىلىمي جوبانىڭ جەتەكشىسى اتاندى. ونىڭ ءبىرى – گرانتتىق قارجىلاندىرۋ جوباسى. اتالعان جوبانىڭ ماقساتى – سۋپەركومپيۋتەرلەردە ەسەپتەۋگە باعىتتالعان ءتۇرلى ۇلگىدەگى عىلىمي ەسەپتەۋلەردىڭ باعدارلامالىق قوسىمشالارىنىڭ كودىن ارنايى جوبالاپ, مودەلىن قۇرۋ.
ءوز سالاسىنا دەندەپ كىرىسكەن مامان وسى جوباسىندا سۋپەركومپيۋتەرلەردە ەسەپتەۋگە باعىتتالعان عىلىمي ەسەپتەۋدىڭ باعدارلامالىق كودتارىن قۇرۋدى اۆتوگەنەراتسيالاۋ تەحنولوگياسىن قولدانۋ ارقىلى زەرتتەۋشىلەردىڭ جۇمىسىن وڭتايلاندىرۋعا كۇش سالىپ وتىر. ال ەكىنشىسى – جاس عالىمداردى گرانتتىق قارجىلاندىرۋعا ارنالعان جوبا. ونىڭ ماقساتى – جاساندى ينتەللەكتىنى پايدالانىپ, مرت سكانەرلەۋىن جىكتەيتىن جانە ءسۇت بەزى وبىرىن دالىرەك انىقتايتىن ەڭ ءتيىمدى تەرەڭ وقىتۋ مودەلىن جاساۋ. ۇلتتىق عىلىمي ونكولوگيا ورتالىعى ماماندارىنىڭ مالىمدەۋىنشە, ەلىمىزدە ءسۇت بەزى وبىرىنا شالدىققانداردىڭ سانى كەيىنگى ون بەس جىلدا كۇرت كوبەيگەن. سوندىقتان عالىم وسى عىلىمي زەرتتەۋ باعىتى بويىنشا ءسۇت بەزى وبىرىنا شالدىققان ايەلدەردى ەرتە انىقتاۋ ارقىلى ولاردىڭ دەنساۋلىعىن ساقتاۋدى ارماندايدى.
بۇدان بولەك, ب. ماتكەرىمقىزى كومپيۋتەرلىك عىلىمدار ءبىلىم بەرۋ باعدارلاماسى (ببب) بويىنشا ستۋدەنتتەرگە ماگيسترانتتار مەن دوكتورانتتارعا جوعارى ءونىمدى عىلىمي ەسەپتەۋگە قاتىستى پاندەردەن ءدارىس وقيدى. سونىمەن قاتار ءۇش دەڭگەي بويىنشا كومپيۋتەرلىك عىلىمدار ببب-نىڭ كورديناتورى رەتىندەر قوسىمشا مىندەتتى دە اتقارادى. ول – اتالعان ببب-نى جىل سايىن زامان تالابىنا ساي جاڭارتىپ, جەتىلدىرىپ وتىراتىن جاۋاپتى ماماننىڭ ءبىرى. كەيىنگى جاڭارتۋلار بويىنشا وسى ببب-عا جاساندى ينتەلەكت باعىتىن قوسىپ سايكەس وقۋ پاندەرىن كىرىستىرگەنىن ايتادى.
بازارگۇل ماتكەرىمقىزى اقپاراتتىق تەحنولوگيا سالاسىندا بىلىكتى مامانداردى دايارلاۋعا اتسالىسىپ جۇرگەن وقىتۋشى عانا ەمەس, كوپبالالى انا. ۇلكەن اۋلەتتىڭ كەلىنى. ءيا, ءبىزدىڭ ەلىمىزدە وسىنداي ءبىر قولىمەن بەسىك تەربەتىپ, ەكىنشى قولىمەن عىلىمدى دامىتۋعا ۇلەس قوسىپ جۇرگەن بىلىكتى ماماندار كوپ.
