ءتۋرنيردى تالعار اۋداندىق دەنە شىنىقتىرۋ جانە سپورتتى دامىتۋ ورتالىعىنىڭ ديرەكتورى, «سپورت جۇلدىزدارى» رەسپۋبليكالىق جۋرنالىنىڭ شەف-رەداكتورى, قۇرمەتتى سپورت قىزمەتكەرى جاندوس بۇسىرمانوۆ قۇتتىقتاۋ سوزىمەن اشىپ, قاتىسۋشىلارعا ساتتىلىك تىلەدى. اسا تارتىستى وتكەن اقتىق سىندا اسىق اتۋدان 20-29 جاس ارالىعىندا تۇركىستان وبلىسى ورداباسى اۋدانىنان كەلگەن اقنيەت قالدىبەكوۆ, 30-39 جاس ارالىعىندا جامبىل وبلىسى شۋ اۋدانىنىڭ مۇعالىمى باحتيار احمەتوۆ, 40-49 جاس ارالىعىندا ەسىك قالاسىنان قاتىسۋشى دارىن تاشكەنباەۆ, 50-59 جاس ارالىعىندا تۇركىستان وبلىسى كەلەس اۋدانىنىڭ مۇعالىمى قۋاندىق ناليەۆ جەڭىستىڭ بيىك تۇعىرىنان كورىندى.
بەس اسىقتان وتكەن سايىستا تالعار قالاسىنىڭ وكىلى رايحان تۇرسىنباەۆا قارسىلاسىنان باسىم ءتۇسىپ, جەڭىمپاز اتانسا, الماتىلىق گۇلجامال اساۋباەۆا ەكىنشى ورىنعا يە بولدى. ال قولا جۇلدەنى الماتى وبلىسىنىڭ ويىنشىلارى شاينۇر يلگيداەۆا مەن ماقپال ساعاتبەكوۆا ەنشىلەدى.
جەڭىمپاز جانە جۇلدەگەر اتانعان اسىقشىلارعا اسىق اتۋ فەدەراتسياسىنىڭ ديپلومدارى مەن مەدالدار تابىس ەتىلدى.
ناۋرىز مەرەكەسى قارساڭىندا جامبىل اۋدانىندا دا اسىق اتۋ مەن بەس اسىقتان جاسوسپىرىمدەر اراسىندا تارتىستى جارىس ۇيىمداستىرىلدى. بۇل باسەكەدە باق سىناسقان وسى اۋدانداعى «جاسۇلان» بالالار ءۇيىنىڭ ويىنشىلارى بارىنەن وزىپ, باس جۇلدەنى جەڭىپ الدى. جالپىكوماندالىق جارىستا جامبىل مەن تالعار اۋداندارى 2 جانە 3-ورىنداردى يەلەندى.
بەس اسىقتان وتكەن باسەكەدە قاراساي اۋدانىنىڭ قىزدارى قارسىلاستارىنان وق بويى وزىپ, ءى ورىنعا تۇراقتادى. جۇلدەلى ءىى, ءىىى ورىندى تالعار مەن ەڭبەكشىقازاق اۋدانىنىڭ ويىنشىلارى ۇتىپ الدى.
الماتى وبلىسى
