حالىقارالىق كولىك فورۋمى قانداي ماسەلەلەردى قوزعايدى

فورۋم قاتىسۋشىلارى ۇلكەن ەۋرازياداعى جاڭا كولىك دالىزدەرى مەن بالامالى باعىتتار, بريكس جانە ەەو ەلدەرىنىڭ ىنتىماقتاستىعى, ەكونوميكالىق ينتەگراتسيانى تەرەڭدەتۋدەگى كولىك پەن لوگيستيكانىڭ ءرولىن تالقىعا سالادى.

فورۋم الاڭىندا بيزنەس وكىلدەرى, مەملەكەتتىك قۇرىلىمدار, ساراپشىلار, وپەراتورلار مەن تاسىمالداۋشىلار باس قوسىپ, كولىك ينتەگراتسياسىنىڭ قازىرگى جاعدايىن, ۇردىستەرىن, مۇمكىندىكتەرى مەن كەلەشەگى جونىندە پىكىرلەرىن ورتاعا سالادى.

قاتىسۋشىلاردى پلەنارلىق پىكىرتالاستار, كونتەينەرلىك نارىق كوشباسشىلارىمەن ديالوگ, كەيس-سەسسيالار مەن پراكتيكالىق ۇسىنىستار كۇتەدى. فورۋمدا مىناداي تاقىرىپتار تالقىلانادى:

• ۇلكەن ەۋرازيا ەلدەرىنىڭ جاڭا باعىتتارى;

• ولاردىڭ ءوزارا بايلانىسى مەن تيىمدىلىگى;

• عالامدىق كونتەينەريزاتسيا;

• حالىقارالىق اۆتوتاسىمالدار جانە مۋلتيمودالدى لوگيستيكانىڭ زاماناۋي شەشىمدەرى.

فورۋمعا رەسەي, قازاقستان, موڭعوليا, قىتاي, وزبەكستان, تاجىكستان, قىرعىزستان, بەلارۋس, ءۇندىستان, ءباا, ەۋروپا جانە باسقا ەلدەردەن جەتەكشى كومپانيالار قاتىساتىنىن راستادى.

فورۋمدى «ەدينوە سووبششەستۆو ەكسپەديتوروۆ» (رەسەيدەگى كولىك فورۋمدارىنىڭ ۇيىمداستىرۋشىسى) مەن «CILT Central Asia» (قازاقستان) بىرلەسىپ ۇيىمداستىرادى. فورۋمنىڭ ىسكەرلىك باعدارلاماسىنىڭ سەرىكتەستەرى – حالىقارالىق ترانسەۆرازيالىق تاسىمالداردى ۇيلەستىرۋ كەڭەسى (كستپ) جانە قازاقستان تاراپىنان – «Kazlogistics». ورىندار شەكتەۋلى, سوندىقتان الدىن الا تىركەلۋ قاجەت.

ءىس-شارا اياسىندا الماتى ماڭىنداعى سەرىكتەس كومپانيالاردىڭ كولىك-لوگيستيكالىق تەرمينالدارىنا بيزنەس-ەكسكۋرسيا, فورۋمنىڭ باس دەمەۋشىلەرىنىڭ ءبىرى – «PTC Holding» كومپانياسىنىڭ قولداۋىمەن قازاقستان – قىتاي شەكاراسىنا («دوستىق – الاشانكوۋ») بيزنەس-تۋر ۇيىمداستىرىلادى.