كەيىپكەرىمىزدىڭ ءوزى دە ۇستازدار اۋلەتىنەن شىققان. اكەسى سۇلتان ىسقاق وڭتۇستىك قازاقستان ولكەسىنىڭ حالىق اعارتۋ سالاسىنىڭ بەلدى قايراتكەرى, بىرنەشە جەردە مەكتەپ سالدىرعان, ۇلى وتان سوعىسىنىڭ ارداگەرى, قازاقستاننىڭ ەڭبەگى سىڭگەن مۇعالىمى, 45 جىل ۇستازدىق ەتكەن كوزى اشىق جان ەكەن. بۇقار جىراۋدىڭ سوزىمەن ايتساق, ۇلى ابدىقايىم دا «نەگىزىنە تارتپاي قويعان جوق».
كوممۋنيستىك پارتيانىڭ كەزەڭىندە مەكتەپتە ارنايى «ولكەتانۋ بۇرىشىن» اشتى. ول جەرگە ابدىقايىم ۇستاز ۇلتتىق ونەگەنى ناسيحاتتايتىن باتىردىڭ دۋلىعاسى, ساۋىتى, قىلىشتارى, ەر-تۇرمان ابزەلدەرى, ساۋكەلە, قازاق ايەلىنىڭ اشەكەيلەرى سەكىلدى جادىگەرلەردى قويدى. ال ۇلىستىڭ ۇلى كۇنىن كوكتەم مەرەكەسى رەتىندە اتاپ, وقۋشىلارعا ۇلتتىق مەيرامىمىزدى تانىستىردى. وسىلايشا قازاقى ءداستۇردىڭ قايماعىن بۇزباي, حالىقتىق مەرەكەنىڭ تامىرىن ۇزبەي, اۋىلدان ەل ەرتەڭىنە جاۋاپتى ازاماتتاردىڭ شىعۋىنا ىقپال ەتە ءبىلدى.
ءيا, عاسىرعا جۋىق عۇمىرىن عيبراتپەن ءسۇرىپ, عىلىم-بىلىممەن تولتىرعان ابدىقايىم ىسقاقتىڭ ەڭبەگى بۇگىنگى ۇرپاق ءۇشىن ۇلكەن ماڭىزعا يە. ۇستاز ءوز ىسىنە دەگەن شەكسىز سۇيىسپەنشىلىگى مەن جاۋاپكەرشىلىگى ارقىلى شاكىرتتەرىنىڭ جۇرەگىنە ۇلتتىق رۋحتى ۇيالاتا ءبىلدى. سوندىقتان ابىز اقساقالدىڭ ەسىمى ەلىمىزدىڭ ءبىلىم تاريحىندا التىن ارىپتەرمەن جازىلاتىنى شىندىق.
