وبلىس اكىمى سەرىك شاپكەنوۆتىڭ ايتۋىنشا, الدىنا الا باعالاۋعا سايكەس بىلتىرعى تاسقىن قاۋپىنىڭ قايتالانۋىن جوققا شىعارۋعا بولمايدى. سول سەبەپتى بۇعان دەيىن سوعىلعان بوگەتتەر رەكونسترۋكتسيالانىپ, قالىپقا كەلتىرىلىپ جاتىر. وعان قاجەتتى قارجى قاراستىرىلعان. ماتەريالدىق-تەحنيكالىق رەزەرۆتەر تولىق جيناقتالعان.
ء«دال قازىر جايىق وزەنىنەن قاۋىپ ءتونىپ تۇرعان جوق. دەگەنمەن, رەسەي فەدەراتسياسىنىڭ ورىنبور وبلىسىنداعى ارىپتەستەرمەن بايلانىس جاساپ وتىرمىز. جايىق وزەنىنىڭ جاعالاۋىندا بوگەت سوعىلىپ, بەكىتىلدى», دەيدى س.شاپكەنوۆ.
اكىمنىڭ پىكىرىنشە, وڭىردەگى ءار اۋدانعا جاۋاپتى ادام بەكىتىلىپ, ۋچاسكەلەرگە نەگىزگى كۇشتىك قۇرىلىمدار بولىنەدى. كورشىلەس اقتوبە, رەسەيدىڭ ورىنبور وبلىستارىنداعى ءتيىستى قۇرىلىمدارمەن ۇدايى بايلانىس ورناتىلىپ سۋ تاسقىنىنىڭ قاۋپى جونىندەگى دەرەكتەر كۇن سايىن جاڭارتىلادى.
«سۋ تاسقىنى قاۋپى ءتونۋى ىقتيمال ەلدى مەكەندەردىڭ تىزبەسى قايتا ناقتىلاندى. باقىلاۋعا الىنعان 51 ەلدى مەكەننىڭ 14-ىندە تاسقىن قاۋپى ازايدى. الايدا 37 ەلدى مەكەندە ءالى دە قاۋىپ بار. قىزىلقوعا اۋدانىنىڭ 9 اۋىلدىق وكرۋگى مەن 5 ەلدى مەكەنىندە جالپى ۇزىندىعى 41,2 شاقىرىم بوگەت سالىندى. جىلىوي اۋدانىندا سۋ ارنالارىنىڭ 95,3 شاقىرىم ءتۇبى تەرەڭدەتىلدى. ونىڭ ىشىندە 47,2 شاقىرىمى قۇرساي كانالىندا, 48,1 شاقىرىمى جەم وزەنىندە تازالاندى. جاعالاۋعا 65,3 شاقىرىم بوگەت تۇرعىزىلدى», دەپ مالىمدەدى وبلىس اكىمى.
تاسقىن سۋدان بولۋى مۇمكىن زالالدى جويۋعا 1 511 ادام, 244 تەحنيكا, 187 موتوپومپا, 20 ءجۇزۋ قۇرالى, 3 تىكۇشاق ءازىر تۇر. سونداي-اق 48,5 توننا جانار-جاعارماي, 235 توننا ينەرتتى ماتەريال, 866 مىڭنان استام قاپشىق, 69 دانا شاتىر, 5 مىڭنان استام توسەك جابدىعى دايىندالعان. تۇرعىنداردىڭ قاۋىپسىزدىگى ءۇشىن 200 ەۆاكۋاتسيالىق بەكەت ازىرلەندى.
قىزىلقوعا اۋدانىندا ءۇش وزەننەن تاسقىن قاۋپى ءتونۋ مۇمكىن ەكەنى انىقتالىپ وتىر. ولار – ويىل, نوعايتى, ساعىز. كەيىنگى ەكەۋى شاعىن سۋ ارناسى بولعانىمەن, ەلدى مەكەندەرگە تونەتىن قاۋىپ از ەمەس. بۇعان اقتوبە وبلىسىنداعى اششى ويىل وزەنىنىڭ ارناسىنان اسۋى, مول قاردىڭ كۇرت ەرۋى اسەر ەتەدى.
«سۋ تاسقىنىنىڭ الدىن الۋدا «قازگيدرومەت» رمك اتىراۋ وبلىستىق فيليالىنىڭ بولجامىنا تالداۋ جاسالىپ وتىر. بولجامعا سايكەس اۋانىڭ تەمپەراتۋراسى كۇرت جوعارىلاسا, وزەندەردە سۋ دەڭگەيى كوتەرىلىپ, جايىلماعا تارالۋ قاۋپى بار», دەيدى اۋداندىق توتەنشە جاعدايلار ءبولىمىنىڭ باستىعى باقتىبەك تولەگەنوۆ.
اۋدان اكىمى قانات ءازمۇحانوۆتىڭ مالىمەتىنشە, «قاراسۋ» وزەگى بويىنداعى اۋىزسۋ ۇڭعىمالارى قورشالىپ, بوگەت تۇرعىزىلىپ جاتىر. قازىر اۋداندا 6 قايىق, 66 موتوپومپا, 60 مىڭ قاپشىق, كۇرەك, سۋعا وتكىزبەيتىن اياقكيىم سەكىلدى قاجەتتى قۇرالدار جيىنتىعى بار. اتىراۋ قالاسىندا قوسىمشا 10 قايىق رەزەرۆتە تۇر. تۇرعىنداردى ورنالاستىراتىن 24 ەۆاكۋاتسيالىق بەكەت دايىن.
اتىراۋ وبلىسى
