سوت انىقتاعانداي, كامەلەتكە تولماعان ل. مەن ت. جابىرلەنۋشىنى ءوز ءۇيىنىڭ اۋلاسىندا جولىقتىرعان. بۇرىن ل. مەن ب. اراسىندا جانجال تۋىنداپ, سوڭى توبەلەسكە ۇلاسقان. كەيىن ولارعا م., ۆ., س. جانە ش. قوسىلىپ, جابىرلەنۋشىگە شاعىمدارىن ايتقان.
- ل., ت., م. جانە ۆ. جابىرلەنۋشى ب.-نى قازاندىق اۋماعىنا اپارىپ, وعان دەنە جاراقاتىن سالعان. وسى ۋاقىتتا م., ۆ. جانە ش. بولعان جاعدايدى تەلەفونعا تۇسىرگەن. كەيىن بۇل ۆيدەو قالالىق پابليكتەردىڭ بىرىندە جاريالاندى, – دەپ حابارلادى اباي وبلىستىق سوتىنىڭ ءباسپاسوز قىزمەتى.
ءۇش جاسوسپىرىمگە قاتىستى تالاپ-ارىز قاناعاتتاندىرىلمادى. ولاردىڭ ەكەۋى 11 جاسقا تولماعان, ال زاڭ بويىنشا ارنايى مەكتەپكە تەك وسى جاستان باستاپ جىبەرۋگە بولادى. 12 جاستاعى ۆيدەوعا تۇسىرگەن قىز ارنايى ەسەپتە تۇرماعان, جۇيەلى قۇقىق بۇزۋشىلىق جاساماعان جانە وقۋ ۇلگەرىمى جاقسى بولعان. دەگەنمەن, ۇشەۋى دە جاسوسپىرىمدەر ءىسى جونىندەگى پوليتسيا ەسەبىنە قويىلدى. قالعان ءۇش ءجاسوسپىرىم ارنايى مەكتەپتەرگە جىبەرىلدى.
- 13 جانە 16 جاستاعى ەكى قىز دەۆيانتتى مىنەز-ق ۇلىقتاعى بالالارعا ارنالعان ارنايى مەكتەپكە جىبەرىلدى. سوت ولاردىڭ ءبىرى جۇيەلى تۇردە ءبىلىم الۋدان جالتارعانىن, كوللەدجدە كوپ رەت ساباق بوساتقانىن انىقتادى. سونداي-اق, بۇل قىزداردىڭ جۇيەلى تۇردە قۇقىق بۇزۋشىلىق جاساعانى: الكوگولدى ىشىمدىكتەر ءىشۋ, تۇنگى ۋاقىتتا ەرەسەكتەردىڭ قاراۋىنسىز كوشەدە ءجۇرۋ سەكىلدى ارەكەتتەرى بەلگىلى بولدى. قىزداردى ارنايى مەكتەپكە ءتورت اي مەرزىمگە جىبەرۋ تۋرالى شەشىم قابىلداندى. ەگەر قاجەتتىلىك تۋىنداسا, مىنەز-قۇلقى تۇزەلمەگەن جاعدايدا, ءبىلىم بەرۋ ۇيىمىنىڭ ءوتىنىشى بويىنشا مەرزىم ۇزارتىلۋى مۇمكىن, – دەپ حابارلادى اباي وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ءتورايىمى قارلىعاش قاسىموۆا.
13 جاستاعى ءبىر ۇل بالا التى اي مەرزىمگە ەرەكشە تارتىپتەگى مەكتەپكە جىبەرىلدى. سوتتىڭ مالىمەتىنشە, ول وسى جىلدىڭ ەكى ايىندا ەكى قىلمىس جاساعان, بىراق جاسىنا بايلانىستى قىلمىستىق جاۋاپكەرشىلىككە تارتىلماعان.
- ول ۇرلىق جانە بۇزاقىلىق ارەكەتتەرىن جاساعان. ەكى قىلمىستىق ءىس تە ونىڭ قىلمىستىق جاۋاپكەرشىلىككە تارتىلاتىن جاسقا تولماۋىنا بايلانىستى توقتاتىلدى. ونىڭ شىنايى وكىنۋىن ەسكەرە وتىرىپ, التى اي مەرزىمگە ەرەكشە تارتىپتەگى مەكتەپكە ورنالاستىرۋ تۋرالى شەشىم قابىلداندى, – دەپ ءتۇسىندىردى قارلىعاش قاسىموۆا.
ەسكە سالساق, سەمەيدە اسا قاتىگەزدىكپەن جاسالعان وقيعا قوعامدى ءدۇر سىلكىندىردى. 24 اقپاندا الەۋمەتتىك جەلىلەردە جاسوسپىرىمدەردىڭ بالانى جەرگە قۇلاتىپ, تەپكىلەپ, ونىڭ باسىنان تەۋىپ, ۇستىنە سەكىرىپ, ءتۇرلى جولمەن قورلاعان ۆيدەوسى تارادى.
