فوتو: سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتى
قوعامدا سۋ ۇنەمدەۋ مادەنيەتىن دامىتۋعا باعىتالعان جوبا سالا مينيسترلىگىنىڭ باستاماسىمەن جانە استانا قالاسى ءبىلىم باسقارماسىنىڭ قولداۋىمەن جۇزەگە اسىپ وتىر. جوبا شەڭبەرىندە ءبىر مەزەتتە استانانىڭ 111 مەكتەبىندە سىنىپ ساعاتتارى ءوتىپ, 200 مىڭعا جۋىق وقۋشى ەلىمىزدىڭ سۋ رەسۋرستارى جانە ونى ۇنەمدەۋدىڭ ماڭىزى تۋرالى ماعلۇماتتارمەن تانىستى. بالالار سول تۇرعىدا ءوز ويلارىمەن ءبولىسىپ, سۋدى ساقتاۋ تاقىرىبىندا سۋرەت سالدى.
سالا مينيسترلىگىنىڭ مالىمەتىنشە نۇرجان نۇرجىگىتوۆ №104 مەكتەپتىڭ وقۋشىلارىنا ەلىمىزدە سۋ رەسۋرستارىن ۇنەمدەۋ جانە ونى ءتيىمدى پايدالانۋ بويىنشا ۆەدومستۆونىڭ اتقارىپ جاتقان جۇمىسى تۋرالى ايتىپ بەردى. مينيسترلىك 2024-2026 جىلدارعا ارنالعان سۋ ۇنەمدەۋدىڭ جول كارتاسىن ازىرلەدى. قۇجات سۋ زاڭناماسىن جەتىلدىرۋ, سۋ سالاسىن تسيفرلاندىرۋ, سۋدى ەسەپكە الۋ مەن سۋ ۇنەمدەۋدىڭ زاماناۋي تەحنولوگيالارىن ەنگىزۋ جونىندەگى ءىس-شارالاردى كوزدەيدى. بۇدان بولەك, تۇرمىستىق جاعدايدا سۋ ۇنەمدەۋ بويىنشا ادىستەمەلىك نۇسقاۋلىق ازىرلەنگەن.
مينيستر «اشىق ميكروفون» فورماتىندا وقۋشىلار مەن مۇعالىمدەردىڭ سۇراقتارىنا جاۋاپ بەردى. كەزدەسۋدە سۋ ۇنەمدەۋ ادىستەرى, وزەن-كولدەردى ساقتاۋ جانە سۋ سالاسىنىڭ ماماندارىن وقىتۋ جونىندە سۇراقتار قويىلدى.
«نەلىكتەن ءبىز مەكتەپ وقۋشىلارىنان باستاۋدى ءجون كوردىك؟ سەبەبى, مەكتەپ جاقسى ادەت پەن دۇرىس داعدى ۇلگىسىن قالىپتاستىرۋعا قولايلى ورتا بولىپ تابىلادى. بۇل جوبا وقۋشىلاردىڭ سۋ رەسۋرستارىنىڭ ماڭىزى تۋرالى ءبىلىمىن ارتتىرۋعا, جاستاردىڭ ەكولوگيالىق جاۋاپكەرشىلىگىن دامىتىپ, قالا مەكتەپتەرىندە سۋ ۇنەمدەۋ قوزعالىسىن قالىپتاستىرۋعا ارنالعان. ءبىز الداعى ۋاقىتتا بۇل جوبانىڭ اۋقىمىن رەسپۋبليكا كولەمىندە ودان ءارى دامىتىپ, بارلىق جاستاعى ازاماتتاردى قامتۋدى جوسپارلاپ وتىرمىز. سەبەبى سۋ – ورتاق بايلىق, ءبارىمىز ءۇشىن قاجەت قۇندى رەسۋرس. ونى ۇنەمدەۋگە جانە ساقتاۋعا بارلىعىمىز ۇلەس قوسا الامىز», دەدى مينيستر ن.نۇرجىگىتوۆ.
