ناۋرىز مەرەكەسىنە وراي, تۇركىتىلدەس حالىقتاردىڭ ەتنيكالىق تاريحى مەن مادەني مۇراسىن ناسيحاتتاۋعا باعىتتالعان فورۋم مەملەكەتتىك ورتالىق مۋزەي ديرەكتورىنىڭ مىندەتىن اتقارۋشى عاليا تەمىرتوننىڭ قۇتتىقتاۋ سوزىمەن اشىلدى. ول ادامزات وركەنيەتىندە وزگەشە مانگە يە تۇركى حالىقتارىنىڭ كورنەكتى داستۇرلەرى مادەني مۇرالارىمىزدىڭ قايماعى ەكەنىن اتاپ ءوتتى.
فورۋمنىڭ پلەنارلىق وتىرىسىندا ناۋرىز مەيرامىنىڭ تاريحى مەن تامىرىن ارقاۋ ەتكەن مازمۇندى باياندامالار وقىلدى. ءىس-شارا قوناقتارىنىڭ قاتارىندا تۇركسوي مۋزەيلەر قاۋىمداستىعىنىڭ باس ۇيلەستىرۋشىسى دجاۆيد موۆسيۋمليۋ, قر ماتەريالدىق ەمەس مادەني مۇرانى قورعاۋ جونىندەگى ۇلتتىق كوميتەت توراعاسىنىڭ ورىنباسارى رۋستام مۋزافاروۆ, تۇرىك رەسپۋبليكاسىنىڭ باس كونسۋلدىعىنىڭ باسشىسى ەۆرەن مۋدەرريسوگلۋ, الماتى قالاسىنداعى يران باس كونسۋلدىعىنىڭ مادەني اتتاشەسى حوسسەين اگازادە, ءازىربايجاننىڭ الماتى قالاسىنداعى باس كونسۋلى انار گۋسەينزادە, رەسەي عىلىم اكادەمياسىنىڭ ءسىبىر بولىمشەسىنىڭ گۋمانيتارلىق زەرتتەۋلەر جانە سولتۇستىك شاعىن حالىقتار ماسەلەلەرى ينستيتۋتىنىڭ ارحەولوگيا جانە ەتنوگرافيا ءبولىمىنىڭ باس عىلىمي قىزمەتكەرى ەكاتەرينا رومانوۆا, وزبەكستانداعى «جىبەك جولى» حالىقارالىق عىلىمي زەرتتەۋ ينستيتۋتىنىڭ پروفەسسورى ەلميرا گيۋل, قىرعىز رەسپۋبليكاسى ۇلتتىق تاريحي مۋزەيىنىڭ باس قور ساقتاۋشىسى نۋرحات يمانقۇلوۆا, «قىرىم ارالى» زەرتحاناسىنىڭ ديزاينەرى جانە قالپىنا كەلتىرۋشىسى ەلينا التىنبەكوۆا, قازاقستان قولونەرشىلەرى وداعىنىڭ توراعاسى, سۋرەتشى-ەتنوديزاينەر, ماتەريالدىق ەمەس مادەني مۇرا ۇلتتىق كوميتەتىنىڭ ساراپشىسى ايجان بەككۋلوۆا باستاعان ساراپشىلار ءسوز الىپ, تاقىرىپقا قاتىستى وي-پىكىر الماستى.
فورۋم اياسىندا «تۇركى داستۇرلەرى: ەتنومادەني ەرەكشەلىكتەر» تاقىرىپتىق سەكتسياسى مەن مۋزەيلەر قاۋىمداستىعى وكىلدەرىنىڭ, شىعارماشىلىق پەن عىلىم سالاسىنداعى جاستاردىڭ, ونەر قايراتكەرلەرىنىڭ, تاريح, مادەنيەت, تۋريزم, ءبىلىم بەرۋ, باق ماماندارىنىڭ قاتىسۋىمەن OPEN SPACE – «ۇلتتىق مادەنيەتتى ناسيحاتتاۋدىڭ زاماناۋي باعىتتارى» الەۋمەتتىك-مادەني پىكىرلەسۋ الاڭى ۇزدىك ساراپشىلاردى ءبىر الاڭدا جينادى.
ورتالىق مۋزەي ديرەكتورىنىڭ ورىنباسارى اننا كۋششەنكو مادەني مۇرالاردى زامان تالابىنا ساي ناسيحاتتاۋ مەن جەتىلدىرۋدىڭ وزەكتى ماسەلەلەرىن سارالاسا, مۋزەيدىڭ باس قور ساقتاۋشىسى ءۇمىت ءاشىموۆا مۋزەي زاتتارىن جيناقتاۋ, ەسەپكە الۋ جانە ساقتاۋ تۋرالى اقپارات بەردى.
ءىس-شارا بارىسىندا قاتىسۋشىلار قازىرگى زامانعى كوممۋنيكاتسيالار مەن مۋزەيلەردىڭ, مادەني جانە شىعارماشىلىق ۇيىمداردىڭ ۇلتتىق مادەنيەتتى, بەينەلەۋ ونەرىن ناسيحاتتاۋداعى ءرولى, الەۋمەتتىك-مادەني ءوزارا ارەكەتتەسۋ مەحانيزمدەرى, سونداي-اق ءبىلىم بەرۋ مەن ەتنوكوركەمدىك ىنتىماقتاستىقتى ۇيىمداستىرۋ ارقىلى تالانتتى جاستاردى قولداۋ ماسەلەلەرىن تالقىلادى.
فورۋم مەملەكەتتىك ورتالىق مۋزەيىنىڭ قورىنان الىنعان ەتنوگرافيالىق كوللەكتسيالار مەن قازاقستان قولونەرشىلەرى مەن ەتنوديزاينەرلەرىنىڭ اۆتورلىق تۋىندىلارىن كورسەتەتىن «شەبەرلەر الاڭى» كورمەسىنە ۇلاستى. بۇل كورمە ەجەلگى داستۇرلەردى زاماناۋي ينتەرپرەتاتسيالار ارقىلى جەتكىزۋىمەن ەرەكشەلەندى.
«فورۋم جۇمىسىنىڭ مىندەتى تۇركىتىلدەس حالىقتاردىڭ تاريحي ەتنوگەنەزىن, مادەنيەتى مەن ونەرىن زەردەلەۋ. تۇركىتىلدەس حالىقتاردىڭ تاريحي-مادەني قۇندىلىقتارىن دارىپتەۋ ءھام ولاردى زەرتتەۋ قاي كەزدە دە ماڭىزدى. جوبا مادەنيەت پەن عىلىم ۇيىمدارى اراسىنداعى ىنتىماقتاستىقتى جانداندىرىپ, عىلىمي جانە مادەني-ءبىلىم بەرۋ قىزمەتى سالاسىنداعى ءداستۇرلى جانە يننوۆاتسيالىق باعىتتاردى دامىتۋ پەرسپەكتيۆالارىن تالقىلاۋ ءۇشىن تاپتىرماس الاڭ», دەيدى قر مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى عاليا تەمىرتون.
