اباي داڭعىلىنىڭ بويىنداعى تەمىر جولدىڭ ۇستىنەن وتەتىن كوپىر تۇرعىندار قاۋىپسىزدىگى ءۇشىن سالىنباق. وبلىس اكىمدىگىنىڭ ءباسپاسوز قىزمەتى تاراتقان دەرەككە سەنسەك, وتكەلدىڭ جالپى ۇزىندىعى 0,946 شاقىرىمدى قۇرايدى. باس مەردىگەر «قازاقدورستروي» جشس بارلىق ساپا ستاندارتتارىن ساقتاي وتىرىپ, وزىق ينجەنەرلىك تەحنولوگيالاردى قولداناتىن بولادى.
نىسان ەكى جەدەلساتىمەن جابدىقتالادى. سونداي-اق باعدارشام ورناتۋ, اۋماقتى اباتتاندىرۋ, جارىقتاندىرۋ جۇمىستارى جۇرگىزىلەدى. جاڭا كوپىر قالا ورتالىعىن تەمىرجول جەلىسىنىڭ ارعى بولىگىندە ورنالاسقان تۇرعىن ۇيلەرمەن بايلانىستىرىپ, قالانىڭ ترانزيتتىك كولىك قوزعالىسىن جەڭىلدەتەدى.
اۋقىمدى ينفراقۇرىلىمدىق جوبانى جۇزەگە اسىرۋ وبلىس ورتالىعىنداعى لوگيستيكانى جاقسارتۋعا, كولىك قوزعالىسىنىڭ تيىمدىلىگىن ارتتىرۋعا جانە كولىك قاۋىپسىزدىگىن قامتاماسىز ەتۋگە مۇمكىندىك بەرەدى.
«مەملەكەت باسشىسى قاسىم-جومارت كەمەل ۇلى توقاەۆ «قۋاتتى وڭىرلەر – قۋاتتى ەل» قاعيداسى ارقاشان وزەكتى ەكەنىن اتاپ ءوتتى. پرەزيدەنت تاپسىرماسى بويىنشا بىرقاتار ماڭىزدى باستامالاردى جۇزەگە اسىرۋدىڭ ارقاسىندا وڭىرلەردى دامىتۋ ءۇشىن جاڭا مۇمكىندىكتەرگە جول اشىلىپ جاتىر.
تاراز اۋماعى كەڭەيىپ, قالاعا بايزاق جانە جامبىل اۋداندارىنان 14 ەلدى مەكەن قوسىلىپ, حالىق سانى 480 مىڭ ادامدى قۇرادى, بۇل, ارينە, كولىك اعىنىنىڭ ارتۋىنا اسەر ەتەدى. وبلىس ورتالىعىندا اۋليەاتا جانە جىبەك جولى اتاۋىمەن ەكى اكىمشىلىك اۋدان قۇرىلدى. جاڭا كوپىر قوس اۋدان اراسىنداعى قوسىمشا بايلانىستى قامتاسىز ەتىپ, ايماقتا كولىك-لوگيستيكا سالاسىنىڭ دامۋىنا وڭ اسەر ەتەدى», دەيدى ەربول قاراشوكەەۆ.
جامبىل وبلىسى
