كەلىسسوزدەر بارىسىندا تاراپتار جالپى سوماسى 7 ميلليارد دوللاردى قۇرايتىن جول كارتاسى جوبالارىن ىسكە اسىرۋ, «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ نورماتيۆتىك-قۇقىقتىق بازاسىن دامىتۋ جانە UZKAZTRADE بىرلەسكەن كاسىپورنىنىڭ قىزمەتىن كەڭەيتۋ ماسەلەلەرىن تالقىلادى.
سونداي-اق شەكارا ماڭىنداعى ىنتىماقتاستىقتى دامىتۋ, ونەركاسىپتىك كووپەراتسيانى تەرەڭدەتۋ جانە ەكى ەلدىڭ بيزنەسىن قولداۋدىڭ جاڭا قۇرالدارىن قۇرۋ ماسەلەلەرى ءسوز بولدى.
مينيسترلەر 2030 جىلعا دەيىن ءوزارا ساۋدانى 10 ميلليارد دوللارعا دەيىن ارتتىرۋ باعدارلاماسىنا قول قويىپ, 2025 جىلعا ارنالعان قازاقستان مەن وزبەكستان وڭىرلەرىنىڭ ءوزارا ساپارلار كەستەسىن بەكىتتى. بۇل وڭىرارالىق ىنتىماقتاستىقتى جانداندىرىپ, بىرلەسكەن ينۆەستيتسيالىق جوبالاردى جۇزەگە اسىرۋعا مۇمكىندىك بەرەدى.
وسى سەرىكتەستىكتىڭ ناتيجەسىنىڭ ءبىرى – تەرمەز حالىقارالىق ساۋدا ورتالىعى اۋماعىندا قازاقستان پاۆيلونىنىڭ اشىلۋى بولدى.
«بۇگىنگى شارا – قازاقستان, وزبەكستان جانە اۋعانستان اراسىنداعى ساۋدا-ەكونوميكالىق بايلانىستاردىڭ نىعايۋىنىڭ جارقىن كورىنىسى. ەكى ەلدى تەك كورشىلەستىك قانا ەمەس, ءارتۇرلى سالالارداعى قارقىندى دامىپ كەلە جاتقان ىنتىماقتاستىق بىرىكتىرەدى», دەپ اتاپ ءوتتى ارمان شاققاليەۆ.
سالتاناتتى ءىس-شاراعا وزبەكستان ينۆەستيتسيالار جانە ونەركاسىپ ءمينيسترىنىڭ ورىنباسارى حۋررام تەشاباەۆ, قازاقستاننىڭ وزبەكستانداعى ەلشىسى بەيبىت اتامقۇلوۆ, قازاقستان رەسپۋبليكاسىنىڭ اۋعانستانداعى ۋاقىتشا سەنىمدى وكىلى گازيز اقباسوۆ, اۋعانستان كاسىپكەرلەر پالاتاسىنىڭ اعا زاڭگەرلىك جانە حالىقارالىق كەڭەسشىسى حادجي كالاندار راحيمي جانە باسقا دا قۇرمەتتى قوناقتار قاتىستى.
پاۆيلون – «QazTrade» ساۋدا ساياساتىن دامىتۋ ورتالىعى» اق قۇرعان قازاقستاندىق شيكىزاتتىق ەمەس ەكسپورتتى ىلگەرىلەتۋدىڭ شەتەلدىك ينفراقۇرىلىمىنىڭ ءبىر بولىگى. ول قازاقستاندىق تاۋارلاردى تانىستىرۋ, وتكىزۋ نارىقتارىن كەڭەيتۋ, جاڭا ساۋدا كەلىسىمدەرىن جاساۋ جانە بيزنەس قاۋىمداستىقتارى اراسىنداعى بايلانىستى نىعايتۋ ءۇشىن نەگىزگى الاڭعا اينالادى.
قازىرگى ۋاقىتتا پاۆيلوندا قازاقستاندىق وندىرۋشىلەردىڭ ازىق-ت ۇلىك ونىمدەرى مەن حالىق تۇتىناتىن تاۋارلارى ۇسىنىلعان. ال ەكى ەلدىڭ ءوڭىر باسشىلارىنىڭ ساپارلارى باستالعاننان كەيىن وزبەكستاندىق تۇتىنۋشىلارعا ۇسىنىلاتىن قازاقستاندىق ونىمدەردىڭ اسسورتيمەنتى كەڭەيەدى.
ايتا كەتەيىك, تەرمەزدەگى پاۆيلون – قازاقستان مەن ورتالىق ازيا ەلدەرى اراسىنداعى ساۋدا-ەكونوميكالىق ىنتىماقتاستىقتى دامىتۋعا باعىتتالعان ستراتەگيالىق قادام بولىپ ەسەپتەلەدى.
