سۋرەت: ru.freepik.com
جاستار دا بار. بىراق سول جاستار ەگدە ادامداردان دا موسقال كورىنەدى. قاۋعا ساقالدى. ال ءتورتىنشى, بەسىنشى سىنىپ وقۋشىلارى شاماسىنداعى جەتكىنشەكتەر تىپتەن كوپ. ءتورت داستارقان تولى. مۇنداي كورىنىسكە كوز ۇيرەنبەگەندىكتەن العاشقىدا تاڭىرقاي قاراعانبىز. ءمان-جايدى سۇراۋ ىڭعايسىز كورىنگەن. قاپەلىمدە كورشى وتىرعان, جەرگىلىكتى جۇرتتىڭ جايىن جاقسى بىلەتىن اقساقال قۇتقاردى.
– وسى بالالار مەشىتكە ءۇيىر. ءتىپتى جۇما نامازىنا ساباقتان سۇرانىپ شىعادى ەكەن, – دەيدى اقساقال, – مەنىڭ دە وسىلار شامالاس نەمەرەم بار. انە بىرەۋى نەمەرەممەن بىرگە وقيدى. وسى بالا نەمەرەمدى «مەشىتكە كەلسەيشى» دەپ شاقىراتىن كورىنەدى. سولاي ساباقتاسىپ, قاراسى كوبەيە تۇسەدى دە. ەندى ءوزىڭىز ويلاپ قاراڭىزشى, وسى بالالارعا قازىر ءبىلىم العان دۇرىس ەمەس پە؟ ءىت-تەحنولوگيانى مەڭگەرىپ, الەمنىڭ دامىعان ەلىندەگى العىر جاستار سياقتى مىقتى ماماندىق مەڭگەرسە شە؟ قوعام ءوسىپ, جەتىلىپ, كوسەگەمىز كوگەرمەي مە؟ ال جاستاردىڭ جۇرەگىندە يمانى بولسا, ەشكىمنىڭ الا ءجىبىن اتتاماسا, ادال ءجۇرىپ-تۇرسا بولدى ەمەس پە؟
اقساقالدىڭ اڭگىمەسى مامىراجاي وتىرعان اعايىن اراسىنا قوزعاۋ سالدى. بىرىنەن سوڭ ءبىرى وسى تاقىرىپتى قاۋزاپ, پىكىرلەرىن ءبىلدىرىپ جاتىر.
– بۇلاردى قويشى, – دەدى تاعى ءبىر اقساقال, – اناۋ وتىرعان تەپسە تەمىر ۇزەتىن جاس جىگىتتەر ۋاقىتىنىڭ كوبىن وسى مەشىتتىڭ ىشىندە وتكىزەدى. ارينە, جاراتقانعا قۇلشىلىق ەتپە, ناماز وقىما دەمەيمىز, ول اركىمنىڭ ءوز شارۋاسى, بىراق بەسىگىمىزدى تۇزەۋ ءۇشىن اركىم تىربانىپ ەڭبەك ەتۋلەرى كەرەك ەمەس پە؟
ءدام قايىراردىڭ الدىندا باستاپقى لەپەس قايتا تۇتانعان.
– تاياۋدا الەۋمەتتىك جەلىدەن تىڭدادىم, وقۋشى بالالارعا ورازا ۇستاۋعا بولا ما دەگەن تاقىرىپتى تاراتىپ ايتىپ جاتىر ەكەن. ءبىلىم سالاسى باسشىلارىنىڭ ايتۋلارىنا قاراعاندا, دەنساۋلىعىنا كىنارات كەلمەسە, قارسىلىق جوق ەكەن. دەنى ساۋ بولسىن دەلىك, ال جان ساۋلىعى شە؟
كوپتىڭ كوكىرەگىندە جۇرگەن الۋان ءتۇرلى كۇردەلى ويدىڭ كولەڭكەسى ءبىزدى دە تۇمشالاي باستادى. شىنىندا دا, بالانى يماندىلىققا كىم باۋليدى؟
كوكشەتاۋ