سۋرەت: primeminister.kz
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا تسيفرلىق شەشىمدەرگە نەگىزدەلگەن جاڭا تاسىلدەرمەن تانىستىردى, بۇل قولداۋ شارالارىنىڭ قايتالانۋىن بولدىرماۋعا جانە «الەۋمەتتىك ادىلەتتىلىك» قاعيداتىنا سايكەس الەۋمەتتىك يگىلىكتەردى ءبولۋ تيىمدىلىگىن ارتتىرۋعا مۇمكىندىك بەرەدى.
بيىلعى ناۋرىز ايىنداعى جاعداي بويىنشا ەلىمىزدە 4 ملن-نان استام ازامات ءتۇرلى الەۋمەتتىك قولداۋ, اتاپ ايتقاندا, اتاۋلى كومەك, كوپبالالى وتباسىلارعا ارنالعان تولەمدەر, مۇگەدەكتىگى بويىنشا جاردەماقىلار, بوسانعانعا دەيىنگى جانە بوسانعاننان كەيىنگى تولەمدەر, حالىقتىڭ از قامتىلعان توپتارىن قولداۋ سىندى شارالارمەن قامتىلعان.
بۇل رەتتە «وتباسىنىڭ تسيفرلىق كارتاسى» دەرەكتەرىن تالداۋ تەك 564 مىڭ ازاماتتىڭ ومىرلىك قيىن جاعدايعا تاپ بولعاندار ساناتىنا جاتاتىنىن كورسەتەدى. وسىعان بايلانىستى الەۋمەتتىك كومەك كورسەتۋ ساناتى قاعيداتىنان ناقتى مۇقتاجدىق ولشەمدەرىنە كوشۋگە باعىتتالعان تەتىك قاراستىرىلىپ جاتىر.
سونداي-اق مۇقتاج ازاماتتاردى قامتۋداعى وڭىرلىك ديسپروپورتسيالار پروبلەماسىن شەشۋ ماسەلەسىنە نازار اۋدارىلدى. اتاپ ايتقاندا, وبلىستار مەن قالالارعا قاراماستان, تولەم تۇرلەرى مەن مولشەرىن ءبىر جۇيەگە كەلتىرۋ تۋرالى يدەيالار ايتىلدى.
ولجاس بەكتەنوۆ ۇكىمەت جۇمىسىنىڭ باسىم باعىتى مۇقتاج ازاماتتاردىڭ تۇرمىس دەڭگەيى ءارى قاراي قاناعاتتانارلىق ساناتقا كوشۋى ءۇشىن ولاردى قولداۋ شارالارىمەن قامتۋ ەكەنىن اتاپ ءوتتى. ەڭبەك جانە حالىقتى الەۋمەتتىك قورعاۋ, تسيفرلىق دامۋ مينيسترلىكتەرىنە مۇقتاجدىق دەڭگەيىن باعالاۋ ءۇشىن جاقىن ارادا حالىقتىڭ ءال-اۋقاتىن جان-جاقتى تالداۋ جۇمىستارىن اياقتاۋ تاپسىرىلدى. مۇقتاجدار جۇيەسىنە كىرمەگەن ازاماتتار بويىنشا جەكە جۇمىس جۇرگىزۋ جۇكتەلدى.
