سۋرەتتە: «اdal» كومپانياسى جانە وزات مەحانيزاتور ەرعالي شەگەباەۆ.
ەڭبەكشىقازاق اۋدانىنىڭ جاڭاشار اۋىلدىق وكرۋگىندە ورنالاسقان «اdal» اگروونەركاسىپتىك اكتسيونەرلىك قوعامىندا 650 ادام ەڭبەك ەتەدى. كومپانيا قۇرىلىمىنا اۋىل شارۋاشىلىعى, ءسۇت زاۋىتى, فەرما, دايىن ءونىمدى تاراتۋ دەپارتامەنتتەرى كىرەدى.
ءىسىن ىلگەرىلەتىپ وتىرعان اگروونەركاسىپ كەشەنىنە ءالى دە بولسا اگرونوم, مەحانيك, تراكتورشى, باقتاشىنىڭ بوس جۇمىس ورىندارى بار. جاز ايلارىندا ەگىس القاپتارىن سۋاراتىن سۋشىلاردى تاپپاي قينالاتىندىقتارىن ايتقان سالا باسشىلىعى جۇمىس كۇشىن كورشىلەس ەلدەردەن ىزدەيتىنىن ايتادى. جۇمىسقا ورنالاسۋعا نيەتتى ازاماتتاردى ۋاقىتشا باسپانامەن قامتاماسىز ەتۋ ماقساتىندا كومپانيا زاماناۋي ۇلگىدەگى 30 ورىندىق جاتاقحانا دا سالعان.
فەرمانى كەڭەيتۋمەن قاتار, ونىمدىلىكتى ارتتىرۋ ماقساتىندا وتكەن جىلى جالپى قۇنى 1 ملرد تەڭگەگە زاماناۋي جاڭا تەحنيكالار ساتىپ الىنعان. سونىڭ ءبىرى – «John Deere 6195م» تراكتورىن كومپانيانىڭ بىلىكتى مەحانيزاتورى, III دارەجەلى «ەڭبەك داڭقى» وردەنىنىڭ يەگەرى ەرعالي شەگەباەۆ تىزگىندەپ ءجۇر.
«بۇگىندە كومپانيا قاراۋىنداعى 70 تەحنيكا, 30-عا تارتا سوقا, تىرما, ءشوپ شاپقىش سىندى قوسالقى قۇرالداردى كوكتەمگى ناۋقاندىق جۇمىسقا دايىنداپ جاتىرمىز. وسىلاردىڭ ىشىندەگى ەڭ ءونىمدىسى, جوعارىدا اتالعان جاڭا تراكتور كۇنى-ءتۇنى اۆتوپيلوتپەن جۇمىس ىستەيدى. ونى وتكەن جىلى رەسپۋبليكا كۇنى قارساڭىندا پرەزيدەنت قاسىم-جومارت توقاەۆتىڭ قولىنان وردەن الىپ كەلگەن وزات مەحانيزاتور, بارلىق تەحنيكانى ەمىن-ەركىن مەڭگەرگەن بىلىكتى ءارى تاجىريبەلى مامان, ۇجىمداعى ەڭ بەدەلدى جۇمىسشىمىز ەرعالي شەگەباەۆتىڭ قولىنا تاپسىردىق», دەيدى كومپانيانىڭ اۋىل شارۋاشىلىعى جونىندەگى ديرەكتورى سۇڭعات تويشىبەك.
اباي وبلىسى, اياگوز اۋدانى, مىڭبۇلاق اۋىلىنان 2012 جىلى جۇمىس ىزدەي كەلىپ, كوسموس اۋىلىنا قونىس تەپكەن ە.شەگەباەۆ سودان بەرى وسى كومپانيادا تۇراقتى ەڭبەك ەتەدى. كىشكەنتاي كەزىنەن تراكتور تىزگىندەگەن اكەسىن جاعالاپ ءجۇرىپ, تەمىر-تەرسەككە كوزى ۇيرەنگەن ەرعالي نۇرعازى ۇلى ەسەيە كەلە اكە جولىن قۋىپ, تراكتورشى بولعان. دالا ءتوسىن دۇبىرگە بولەگەن قاراپايىم جۇمىسشىنىڭ ەڭبەگى اقتالىپ, مەملەكەتتىك ماراپاتقا يە بولدى.
«ەرتەڭ استاناعا, مەملەكەت باسشىسىنىڭ قولىنان ماراپات الۋعا باراسىز دەگەندى ەستىگەنىمدە, ءازىل شىعار دەپ ويلادىم. تراكتور ايداپ ءجۇرىپ, وردەن الامىن دەپ ويلاماپپىن. پرەزيدەنتتىڭ ەڭبەك ادامدارىن ەلەپ-ەسكەرۋى تەڭدەسسىز قۋانىش بولدى. «ەڭبەك ەتكەنگە باقىت باسىن يەدى» دەگەن وسى بولار. بيىلعى جىلدىڭ «جۇمىسشى ماماندىقتار جىلى» دەپ جاريالانۋى قاراپايىم ەڭبەك ادامدارىنىڭ مەرەيىن ءوسىردى, ەڭسەسىن تىكتەدى. قاراۋىل بولىپ, تاكسي جۇرگىزىپ جۇرگەن كەي ازاماتتاردىڭ اۋزىنان «تراكتورشى دا بولماپپىز» دەگەندى قۇلاعىمىز ءجيى شالىپ قالادى. سەبەبى تراكتورشىعا سۇرانىس جوعارى. تراكتور تىزگىندەۋگە دە ءبىلىم مەن قاجىرلى ەڭبەك كەرەك. مەنى بالا جاستان ەڭبەككە باۋلىعان اتا-اناما, 8-سىنىپتان سوڭ ۋچيليششەگە جىبەرگەن ۇستازدارىما دا العىسىم شەكسىز», دەپ ەزۋ تارتقان تراكتورشى ە.شەگەباەۆ ەڭبەگىنىڭ اقتالعانىنا ءدان ريزا.
تەحنيكانىڭ ءتۇر-ءتۇرى تىزىلگەن كەشەندە كوكتەمگى ناۋقانعا دايىندىق جۇمىسى جۇرگىزىلىپ جاتقانى بىردەن بايقالادى. كيىمدەرىنە ماي سىڭگەن مەحانيزاتورلار قولدارىنا بۇراندالارىن, ساۋىق-سايماندارىن الىپ, مۇنداعى تەحنيكالاردىڭ اقاۋلارىن جاساۋعا بىلەك تۇرە كىرىسىپ كەتكەن.
«كوكتەمنىڭ ءبىر كۇنى – جىلعا ازىق» دەگەن, الداعى ناۋقانعا ساقاداي-ساي بولۋدىڭ قام-قارەكەتىندەمىز. تسەحتا تۇرعان تراكتورلارمەن جەر جىرتىپ, تۇقىم سەبۋگە پايدالاناتىن تىركەمەلەردى مايلاپ, ب ۇلىنگەن جەرلەرىن جوندەپ جاتىرمىز. دايىندىق جۇمىسىنا ۇجىمداعى بارلىق جۇمىسشى اتسالىسادى. مەحانيزاتور تراكتور, كومباين جۇرگىزىپ قانا قويمايدى, بۇزىلىپ قالعان جاعدايدا قاراپ وتىرماي, ونى ءوزى جوندەپ الۋعا تىرىسادى. وسىنداعى ارىپتەستەرىمنىڭ قولىنان كەلمەيتىنى جوق. ولاردىڭ ارقايسىسىن «بەساسپاپ مامان» دەۋگە ابدەن لايىق», دەيدى «ەڭبەك داڭقى» وردەنىنىڭ يەگەرى.
جۇمىسشىلاردىڭ الەۋمەتتىك جاعدايلارىن جاساۋ – كومپانيانىڭ باستى نازارىندا. مۇنداعى جۇمىسشىلاردىڭ ورتاشا ايلىعى – 350 مىڭ تەڭگە, بۇدان بولەك, مەرەكەلەردە ەڭبەككەرلەرگە سىياقى بەرۋ داستۇرگە اينالعان. ەڭبەك ونىمدىلىگىن ارتتىرىپ, بەلسەندىلىك تانىتقان جۇمىسشىلار كومپانيانىڭ العىسحات, التىن مەدالىمەن قوسا, باعالى سىيلىقتار ۇتىپ الۋعا تىرىسادى. سونداي-اق شيپاجايلارعا جولداما الاتىندىقتارىن دا ماقتانىشپەن اتادى.
ءسۇت ونىمدەرىن شىعاراتىن «اdal» كومپانياسى ەڭبەك ادامدارىنا قولداۋ كورسەتۋمەن قاتار, قايىرىمدىلىق شارالارىنا ۇزبەي اتسالىسىپ كەلەدى. بۇل رەتتە اۋىلدىق اكىمدىكپەن بىرلەسە جۇمىس ىستەيدى. كوسموس اۋىلىنىڭ كوركەيۋىنە, الەۋمەتتىك جاعدايى تومەن وتباسىلارعا جاردەمدەسۋگە, سونداي-اق قىس ايلارىندا كوشەلەردى قاردان تازارتۋعا تەحنيكالارىمەن تەگىن كومەكتەسۋدى ءوز جاۋاپكەرشىلىگىنە العان جومارتتىقتارىن ايرىقشا اتاپ وتكەن ءجون.
الماتى وبلىسى,
ەڭبەكشىقازاق اۋدانى
