«سوتسياليستىك قازاقستان» (قازىرگى «Egemen Qazaqstan») گازەتىنىڭ 1944 جىلدىڭ 14 قاراشا كۇنگى №226 سانىندا «قازاقستاندىق ديۆيزيا جاۋىنگەرلىك مىندەتتەرىن ابىرويمەن اتقارۋدا» دەگەن ماقالا جاريالانىپتى. وندا جاۋ قورشاۋىندا قالىپ, ارىستانداي ارپالىسىپ, ەرلىك كورسەتكەن قازاق جاۋىنگەرى توقتىباەۆ تۋرالى اڭگىمەلەنەدى.
«قازاق حالقىنىڭ ادال ۇلى, باتىر كوممۋنيست, پۋلەمەتشى توقتىباەۆ جاۋمەن ەرلىكپەن شايقاستى. ول جاۋعا قارسى ەكى كۇن ۇدايىمەن ۇرىس سالدى. ونىڭ سەرىگى ءۇشىنشى كۇنى جارالانىپ قالدى. جالعىز قالعان توقتىباەۆتى جاۋ پۋلەمەتشىلەرى تىرىدەي قولعا تۇسىرمەك بولىپ ارەكەتتەندى. سوۆەتتىڭ باتىر جاۋىنگەرى باسقىنشىلارعا قارسى ايانباي ۇرىسىپ, وقتى بوراتا بەردى. نەمىستەر وعان «ورىس, قولعا ءتۇس!» دەپ ايعايلاپ اينالا قورشاپ الدى. ءدال وسى كەزدە باتىر پۋلەمەتشىگە كومەككە كەلگەن سوۆەت اۆتوماتشىلارى نەمىستەرگە وقتى جاۋدىرىپ قويا بەردى.
انە-مىنە دەگەنشە قولما-قول ۇرىس باستالدى. توقتىباەۆ ءوزىنىڭ قول پۋلەمەتىنىڭ قۇنداعىمەن ۇرىپ بىرنەشە نەمىستىڭ كوزىن جويدى. قاجىرلى ۇرىستىڭ ناتيجەسىندە ەرجۇرەك سوۆەت جاۋىنگەرى توقتىباەۆ پەن ونىڭ سەرىكتەرى جاۋدى جەڭىپ شىقتى. توقتىباەۆ وسىنداي تاماشا ەرلىگى ءۇشىن كەڭەس وداعىنىڭ باتىرى اتاعىن الۋعا ۇسىنىلدى».
ەكى-ءۇش كۇن بويى جاۋمەن جالعىز الىسقان ارىستان جۇرەكتى ۇلعا قاپەلىمدە كومەك كەلمەسە, جاۋدىڭ قولىنا تۇسەرى انىق ەدى. جاۋ قولىنا تۇسسە, ءسوزسىز «ساتقىن» سانالىپ, بۇكىل ەرلىگى قۇمعا سىڭگەن سۋداي جوق بولار ەدى. ءتىپتى ەلدە قالعان اعايىنى دا «ساتقىننىڭ تۋىسى» سانالىپ كوز تۇرتكى بولار ەدى.
وسىدان 81 جىل بۇرىن گازەتكە جاريالانعان ماقالانى وقىپ وتىرىپ, اتاق پەن ساتقىندىقتىڭ اراسى ءبىر-اق تۇتام ەكەنىن تەرەڭ ءتۇيسىنىپ, قولما-قول ۇرىستا جاۋ اسكەرىن پۋلەمەتىنىڭ قۇنداعىمەن ۇرىپ سۇلاتقان باتىر توقتىباەۆتىڭ باعى بار ەكەنىن بايقايسىز.
