ج.ۇشكەمپىروۆ اتىنداعى جەكپە-جەك سارايىندا ۇيىمداستىرىلعان سايىسقا پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ ارنايى بارىپ, جەڭىمپازداردى مارپاتتادى.
ماۋلەن اشىمباەۆ سپورتشىلارعا ءىلتيپات بىلدىرە كەلىپ, اتالعان سپورت تۇرىنەن قازاقستانداعى العاشقى جاتتىقتىرۋشى سۇلتانبەك ورىنباساروۆتىڭ بوچچانى دامىتۋعا قوسقان زور ۇلەسىنە توقتالدى. سۇلتانبەك ورىنباساروۆ ەرەكشە قاجەتتىلىكتەرى بار بالالاردىڭ الەۋەتىن جۇزەگە اسىرۋعا جول اشىپ, جاس بۋىندى سپورت پەن جەتىستىكتەر الەمىنە جەتەلەدى. جىل سايىن ەلىمىزدە بوچچا قاۋىمداستىعىنا قوسىلۋعا جانە جارىستار مەن سپارتاكيادالارعا قاتىسۋعا نيەت بىلدىرۋشىلەردىڭ ارتىپ كەلە جاتقانى, اتا-انالاردىڭ ەرەكشە قىزىعۋشىلىعى مەن وڭىرلەردە فەدەراتسيا فيليالدارىنىڭ اشىلۋى وسى سپورت تۇرىنە دەگەن سۇرانىستىڭ جوعارى دەڭگەيدە ەكەنىن كورسەتەدى.
سونىمەن قاتار ماۋلەن اشىمباەۆ ينكليۋزيۆتى قوعام قۇرۋدىڭ ماڭىزىنا جانە بۇل باعىتقا مەملەكەت باسشىسى باسا ءمان بەرىپ كەلە جاتقانىنا نازار اۋداردى.
«پرەزيدەنتىمىز قاسىم-جومارت كەمەل ۇلى توقاەۆ ءار ازاماتقا تەڭ مۇمكىندىكتەر بەرەتىن قوعام قۇرۋدىڭ ماڭىزدى ەكەنىن ءاردايىم ايتىپ كەلەدى. وسى رەتتە بۇگىنگى سايىس ەرەكشە مانگە يە. ويتكەنى بۇل تۋرنير ءبىزدىڭ قوعامدا ينكليۋزيا مادەنيەتىن ناسيحاتتاۋعا ەسەلى ەڭبەك سىڭىرگەن ازاماتتى ەسكە الۋعا ارنالىپ وتىر. سۇلتانبەك باۋىرىمىزدىڭ تاباندىلىعىنىڭ ارقاسىندا قازاقستاندا بوچچا قوزعالىسى قارقىندى دامي باستادى. بۇگىندە وسى يگى باستامانىڭ وڭ ناتيجەلەرىنە ءبارىمىز كۋا بولىپ وتىرمىز. بوچچا – جاي پاراسپورت قانا ەمەس. ول – ۇلكەن مادەنيەت جانە دۇرىس قۇندىلىقتار جۇيەسىن دارىپتەيتىن ينكليۋزيا قوزعالىسى. سونداي-اق بۇل ەرەكشە قاجەتتىلىكتەرى بار بالالاردىڭ ۇلكەن ومىرگە بەيىمدەلۋىنە جول اشاتىن ماڭىزدى ءارى كەرەكتى تەتىك ەكەنى انىق», – دەپ, ماۋلەن اشىمباەۆ جارىسقا قاتىسۋشىلارمەن بىرگە اتا-انالارعا, جاتتىقتىرۋشىلارعا جانە ۇيىمداستىرۋشىلارعا العىس ءبىلدىردى.
تۋرنير باعدارلاماسىنا سايكەس سپورتشىلار جەكە, كوماندالىق جانە جۇپتىق سايىستاردا باق سىنادى. جارىستىڭ باستى ماقساتى – ەلىمىزدەگى ۇزدىك بوچچيستەردى انىقتاۋ جانە ينكليۋزيۆتى قوعام قۇرۋ, ەرەكشە قاجەتتىلىكتەرى بار ازاماتتارعا تەڭ قۇقىقتار مەن مۇمكىندىكتەر قالىپتاستىرۋ باعىتىندا اتقارىلىپ جاتقان جۇمىستارعا جۇرتشىلىقتىڭ نازارىن اۋدارۋ.
سايىس قورىتىندىسى بويىنشا كوماندالىق جارىستا ءبىرىنشى ورىندى استانا قالاسى مەن جەتىسۋ وبلىسىنىڭ قۇرامالارى (قۋانىش اسقاربەكوۆ, اماناي باتحانوۆ, مەرۋەرت تىلەبالدى) ءبولىستى. ەكىنشى ورىندى ەلوردا كومانداسى (ەرحات المات, ۆيكتوريا شايدۋروۆا, مەيىربەك ورازبەك) ەنشىلەسە, باتىس قازاقستان وبلىسىنىڭ سپورتشىلارى (گۇلسەزىم ارىستانعاليەۆا, نازەركە وتەعاليەۆا, ناۋرىزبەك نۇربەرگەن) ۇزدىك ۇشتىكتى تۇيىندەدى.
ۆس3 دارەجەسىندەگى جۇپتىق جارىستا جامبىل وبلىسى مەن استانا قالاسىنىڭ قۇرامالارى توپ جاردى. استانانىڭ تاعى ءبىر جۇبى ەكىنشى ورىننان كورىنسە, ءۇشىنشى ورىندى جامبىل جانە جەتىسۋ وبلىستارى ءبولىستى.
ۆس4 دارەجەسىندەگى جۇپتىق جارىستا ءبىرىنشى ورىندى – جەتىسۋ وبلىسىنىڭ سپورتشىلارى (ماديار مۇراتقان, ايىم مۇحامەتقان), ەكىنشى ورىندى – ماڭعىستاۋ وبلىسىنىڭ جۇپتىق كومانداسى (تاتتىمبەت تەڭەلگەنوۆ, ايگەرىم تانىسباەۆا), ءۇشىنشى ورىندى جامبىل وبلىسىنىڭ كومانداسى (رۋسلان عايباتوۆ, بالجان بەيسەباەۆا) جەڭىپ الدى.
ايتا كەتەيىك, بوچچادان اشىق رەسپۋبليكالىق تۋرنير 5-10 ناۋرىز ارالىعىندا ەلورداداعى «اسپان» سپورت كەشەنىندە جانە ج.ۇشكەمپىروۆ اتىنداعى جەكپە-جەك سارايىندا ءوتتى. وعان 130 سپورتشى قاتىستى. بۇل كورسەتكىش بىلتىرعىدان ەكى ەسەگە جۋىق كوپ ەكەنىن ايتا كەتكەن ءجون. سپورتشىلار ەلىمىزدىڭ 14 وڭىرىنەن كەلدى. ولاردىڭ قاتارىندا استانا, الماتى جانە شىمكەنت قالالارىمەن بىرگە قاراعاندى, اتىراۋ, پاۆلودار, ماڭعىستاۋ, جامبىل, جەتىسۋ جانە اباي وبلىستارىنىڭ وكىلدەرى بار.
ءتۋرنيردى استانا قالاسى اكىمدىگىنىڭ, ERG كومپانيالار توبىنىڭ جانە باسقا دا سەرىكتەستەر مەن دەمەۋشىلەردىڭ قولداۋىمەن قازاقستان بوچچا فەدەراتسياسى ۇيىمداستىردى.
