ەڭبەك جولىن جوعارى وقۋ ورنىندا مۇعالىم بوپ باستاعان كەيىپكەرىمىزدىڭ كەدەن سالاسىنا كەلۋى كەزدەيسوق ەمەس. تاعدىر قوسقان سەرىگى بولات مۇسابەكوۆتىڭ جۇمىس بابىمەن شەكارا شەبىندەگى دوستىق بەكەتىنە قونىس اۋدارىپ, قالالىق جايلى ءومىردى ارتقا تاستاعان ەرلى-زايىپتىلار ارمانعا بىرگە قانات قاققان. بولات – كەدەن ينسپەكتورى, بيبىگۇل مەكتەپكە مۇعالىم بولىپ ورنالاستى. تاعدىر تارتۋىمەن ايسۇلۋ مەن ءجۇسىپ ەسىمدى ۇل-قىزدارى ءومىر ەسىگىن اشتى.
ول كەزدە قىتاي شەكاراسىنا جاقىن ستانتسياعا كەدەندىك ينسپەكتور بولىپ قىزمەتكە تۇرعان جاس ماماندى الداعى ۋاقىتتا قانداي سىناق كۇتىپ تۇرعانى بەيمالىم ەدى. ومىرگە قۇشتار ازاماتتىڭ ارمانى دوستىق-ءۇشارال تاس جولىنداعى قارلى بوراندا ءۇزىلدى. قاپيادا جارىنان ايىرىلۋ بيبىگۇل حانىمعا ۇلكەن سوققى بولدى. «قايعىنى كوتەرگەن ادام شىڭدالادى» دەگەندەي, كەلەر كۇننەن ءۇمىت ۇزبەگەن ول شيەتتەي ەكى بالاسىنىڭ بولاشاعى ءۇشىن كۇيەۋىنىڭ جۇمىسىن جالعاستىرۋعا بەل بۋادى. 2002 جىلى كەدەن سالاسىنداعى جاۋاپكەرشىلىگى مول جۇمىسقا كىرىسەدى. سول ساتتەن باستاپ ونىڭ ءومىرى جاڭا ارناعا ءتۇستى.
«وتكەن كۇندەردىڭ ەلەسىن شولىپ وتكەندە, كوڭىلگە كوپ وي ورالادى. باسقا تۇسكەن سىناق ادامدى قايراتتاندىرادى ەكەن. اۋىر جەلدىڭ وتىندە ءجۇرىپ, العا ۇمتىلدىم. قۇلادىم, قايتا تۇردىم. قۇداي ادامعا كوتەرە المايتىن سىناق بەرمەيدى دەگەنى راس ەكەن. ازاماتىمنىڭ وشاعىن وشىرمەي, ۇل-قىزىن اياقتاندىرىپ, ادال ەڭبەگىمنىڭ جەمىسىن كورىپ وتىرمىن», دەيدى بيبىگۇل تۇرىسبەكقىزى.
ول دوستىق ستانتسياسىنداعى جۇمىسىن 2012 جىلعا دەيىن جالعاستىرىپ, 2012 جىلى كەدەن قىزمەتى قايتا ۇيىمداستىرىلعان تۇستا الماتى وبلىسى بويىنشا مەملەكەتتىك كىرىستەر دەپارتامەنتىنىڭ باس مامانى قىزمەتىنە كىرىستى. ەڭبەگى جانعان بىلىكتى ماماندى ارىپتەستەرى مەن ورتاسى ءوز ءىسىنىڭ بىلگىرى رەتىندە قۇرمەتتەيدى. كەيىپكەرىمىزدىڭ قىزمەت جولى 2013 جىلى قورعاس كەدەنىندە باس مامان, كەيىنىرەك «قورعاس-شىعىس قاقپاسى» حالىقارالىق ىنتىماقتاستىق ورتالىعىندا جانە قالجات كەدەن بەكەتىندە جالعاسىن تاپتى. ونىڭ ەڭبەك جولى «ماقساتقا ۇمتىلعان ادام جەتىستىككە جەتەدى» دەگەن ءسوزدىڭ دالەلى ىسپەتتى.
شەكارا شەبىندە ەڭبەك ەتۋ ۇلكەن كۇشتى قاجەت ەتەدى. قاجىر-قايراتىڭ مەن دەنساۋلىعىڭدى دا سارپ ەتەتىن ساتتەر از ەمەس. 2022 جىلى التىنكول كەدەن بەكەتىندە قىزمەت اتقارىپ جۇرگەندە بيبىگۇل تۇرىسبەكقىزى مي ارتەريالارىنىڭ ترومبوزىنان ينسۋلت الدى. بۇل وعان اۋىر سىناق بولدى, بىراق «رۋحتىڭ كۇشىمەن اۋرۋدى دا جەڭۋگە بولادى» دەگەندەي, مىقتى ەرىك-جىگەرى مەن وتباسىنىڭ قولداۋى وعان دەم بەردى. سىرقاتىنان ايىعىپ, سۇيىكتى جۇمىسىنا قايتا ورالدى. كۇنى بۇگىن ول جەتىسۋ وبلىسىنداعى «التىنكول جول» كەدەن بەكەتىندەگى قىزمەتىن جالعاستىرىپ كەلەدى.
ءوز ىسىنە جانىمەن بەرىلگەن مامان ۇزاق جىلعى ەڭبەگىنىڭ ارقاسىندا زور قۇرمەتكە يە بولدى. كەدەن ورگاندارىنداعى 10 جانە 20 جىل ءمىنسىز قىزمەتى ءۇشىن مەدالدارىمەن, كەدەن قىزمەتىنىڭ 30 جىلدىعىنا ارنالعان مەرەيتويلىق مەدالمەن, سونداي-اق «وفيتسەردىڭ اناسى» مەدالىمەن ماراپاتتالدى. «ەڭ ۇلكەن ەڭبەك – ۇرپاق تاربيەسى» دەگەن ول, بالالارىنىڭ ومىردەن ءوز جولىن تاپقانىنا قۋانادى. بۇگىندە قىزى ايسۇلۋ الماتىداعى قىتاي بانكىندە جەتەكشى اۋديتور بولىپ ەڭبەك ەتسە, ۇلى ءجۇسۇپ سىبايلاس جەمقورلىققا قارسى قىزمەتتە كاپيتان شەنىندە.
مىقتى مامان – قاي ۇجىمنىڭ دا ماقتانىشى. قۋاتتى قۇرىلىمنىڭ تىنىس تىرشىلىگىن تەرەڭ سەزىنەتىن بيبىگۇل تۇرىسبەكقىزىن كوكتەم مەرەكەسىمەن قۇتتىقتاپ, ەل يگىلىگى جولىنداعى ەڭبەگىڭىز ەلەنە بەرسىن دەپ تىلەك ايتامىز!
