«ەرمەگىم وسى بولدى. تۇندە ۇيقىم قاشسا كىتاپ وقىپ, تاڭ اتىرامىن. باياعىدا عوي, بەينەتپەن ءجۇرىپ, بەل جازۋعا ۋاقىت تاپپايتىن ەدىك. ەندى قۇداي قايتارىمىن بەرىپ جاتىر», دەپ ازىلمەن اڭگىمە تيەگىن اعىتاتىن ۇلتۋار اپانىڭ ءومىر جولى ءبىر كىتاپقا جۇك بولارى انىق.
16 جاسقا تولعاندا اتا-اناسى اق باتاسىن بەرىپ, قۇتتى ورنىنا قوندىرعان. قول ۇستاسقان قوساعى جولسەيىت مولداسانوۆ ەكەۋى الدىنا ءبىر وتار قوي سالىپ, ەرتە جاستان ەڭبەككە ارالاسادى. قىسى قاتال ءارى التى ايعا سوزىلاتىن تاۋلى ءوڭىر قاسيەتتى قارقارا اۋلىنىڭ تاريحى تەرەڭدە جاتقان قۇمتەكەي قىستاۋىن قىستاپ, مال شىعىنىنا جول بەرمەۋگە كۇش سالادى. كوكتەمگى تولدە قوي قوزداتىپ, ءجۇز ساۋلىقتان ءجۇز جيىرما, ءجۇز ەلۋگە دەيىن قوزى ورگىزىپ, اۋدانداعى وزات شوپانداردىڭ كوشىن باستايدى. ەسەلى ەڭبەگى جانعان جولسەيىت مولداسانوۆ ەڭبەك ەرى اتانادى. كەۋدەسىنە التىن جۇلدىز وردەنىن جارقىراتا تاعادى. باسىنا باق قوندىرعان قۇتتى مەكەندى ۇرپاعى ۇمىتپاسىن دەگەن نيەتپەن جولسەيىت اتا كەيىن نەمەرەسىنە قۇمتەكەي دەپ ات قويدى. ەڭبەك ەرىنىڭ كەنجە ۇلى قانات مولداسانوۆ اكە جولىن قۋىپ, مال ءوسىرۋدى وزىنە مۇرات تۇتتى.
«وتپەن كىرىپ, كۇلمەن شىعىپ, جۇمىس ىستەدىك. مىڭعىرعان مالمەن وي مەن قىردا جۇردىك. جولسەيىت اتاڭنىڭ اعاسى سوعىستان قايتپاي قالدى. جالعىز ۇلىنىڭ تىلەۋىن تىلەگەن ەنەمنىڭ كوپ كومەگىن, مەيىرىمىن كوردىم, اق باتاسىن الدىم. «باتالى قۇل ارىماس, باتاسىز قۇل جارىماس» دەپ بەكەر ايتپاعان عوي. ەڭبەگىمىز اقتالىپ, ۇلكەن ماراپاتقا بولەندىك. الىس-جاقىن شەتەلدى كوردىك. سونىڭ ءبارى وزدىگىنەن كەلگەن جوق, شۇمەكتەگەن ماڭداي تەردىڭ وتەۋى», دەپ تولعاناتىن ۇلتۋار اپا ون بالانى ومىرگە اكەپ, وسىرگەن. ءسويتىپ, التىن قۇرساق انانىڭ ارقاسىندا ءبىر اۋلەتتىڭ جالعىز تۇياعى جولسەيىت اتانىڭ جاپىراعى جايىلىپ, ۇلكەن بايتەرەككە اينالادى. بۇگىندە ون بالادان 30-عا جۋىق نەمەرە ءسۇيىپ, 10 شاقتى شوبەرەنىڭ الاقانىنان ماي جالاپ وتىرعان باقىتتى اجە.
«ايەل – تىرشىلىكتىڭ تىرەگى. وتىن جاعىپ, قازانىن قايناتىپ وتىرعان انالاردىڭ ارقاسىندا ءۇي شۋاققا بولەنىپ, بەرەكەسى كىرەدى. كەلىندەرىمىنىڭ كەسە-كولدەنەڭ وتكەنىن كورگەنىم جوق. «تەك» دەگەن ۇعىمنىڭ توركىنىن تۇسىنەتىن, ۇلكەن-كىشىنى قۇرمەتتەيتىن كورگەندى جاندار. ءبارىن ۇيرەنىپ, مەڭگەرىپ ءوستى. قازىر زامان باسقا دەسە دە, ايەلدىڭ وتباسى الدىنداعى مىندەتى وزگەرگەن جوق, شىراعىم», – دەگەن ۇلتۋار اپانىڭ اڭگىمەسى ۇلتتىق تاربيەمەن ۇشتاستى.
«بالانى اتا-انا جامان بولسىن دەمەيدى, بىراق ۇيادا كورگەنىن بويىنا سىڭىرەدى. ۇل-قىز ءوسىرىپ وتىرعان سوڭ ولارعا نان يلەپ, ەت اسۋدى, كەستە تىكپەسە دە ءۇي جيناۋدى, ءتىپتى وبال-ساۋاپتى ساناسىنا سىڭىرسە, ونىڭ راحاتىن وزدەرى كورەدى. ەڭبەكپەن ەسەيگەن بالانىڭ ومىرگە بەيىم كەلەدى», دەگەن دانالىعىن ءبولىستى.
ءومىردىڭ ىستىق-سۋىعىن كورىپ, عاسىر جاسىنا جۋىقتاعان ۇلتۋار اپانىڭ اسەرلى اڭگىمەسىن تىڭداي بەرگىڭ كەلەدى. اسىرەسە ۇلتتىق تاعام تۇرلەرىن دايىنداۋداعى شەبەرلىگىن كەلىندەرى جەتىك مەڭگەرگەندىگىنە قۋانادى. ىرىمشىك قايناتىپ, قۇرت-ماي الۋ, بابىنا كەلتىرە قىمىز اشىتۋ, جاۋبۇيرەك, شۇجىق جاساۋ, ناۋرىز كوجە دايىنداۋ, تىزبەلەي بەرسەك, مالدىڭ ەت-ءسۇتىن كادەگە جاراتىپ, تابيعي ازىق-ت ۇلىكتىڭ مول قورىن جاساۋ – اسىل اجەلەردىڭ اينىماس ءداستۇرى بولعانىن ءجيى ەسكە سالىپ وتىرادى.
الماتى وبلىسى
