اسقاق ارمانى قيالارعا الىپ ۇشاتىن جاننۇردى اۋىلداستارى «ۇلعا بەرگىسىز قىز» دەپ كەتكەن. كىشكەنتاي كەزىنەن مالساق بولىپ وسكەن بويجەتكەنگە ءۇيدىڭ تىرشىلىگىنەن گورى جازدا مال جايىپ, قىستا قورا-جايدىڭ شارۋاسىن تىندىرىپ تاستاۋ تەز. تاۋ قىزىنىڭ اتقا اۋەستىگى ەرتە جاستان قالىپتاسقان. جانۋاردىڭ جالىن تاراپ, ماڭدايىن سيپاپ, ەرەكشە سەزىمگە بولەنەتىن جاننۇر اتتىڭ قۇلاعىندا وينايدى.
«قىزىم – وتباسىنداعى ءتورت بالانىڭ ەكىنشىسى. باۋىرلارىنا قامقور, قيمىلى شيراق, ءوزى وجەت بولىپ ءوستى. ۇلدارمەن تەز ءتىل تابىسادى. ولارمەن اسىق ويناپ كەتەتىن كەزدەرى بولدى. تابيعات اياسىنا شىققاندى, اتقا مىنگەندى وتە جاقسى كورەدى. قازىر مەكتەپ بىتىرەتىندىكتەن, كۇن-ءتۇن دەمەي ۇبت-عا دايىندالىپ جاتىر. شارشاعان ساتتەردە اتقا ءمىنىپ, ءبىر اينالىپ كەلسە, سەرگىپ, قۋانىپ قالادى», دەيدى اناسى, تاريح ءپانىنىڭ مۇعالىمى فاريدا ۇمبەتجانوۆا.
بالالاردىڭ ۇلكەنى نازىم قۋاتقىزى تۇيىق اۋىلىنداعى ورتا مەكتەپتى «التىن بەلگىمەن», ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىنىڭ شىعىستانۋ فاكۋلتەتىن قىزىل ديپلوممەن بىتىرگەن. قازىر ماگيستراتۋرادا ءبىلىمىن شىڭداپ جاتىر. جاننۇر بولسا حيميا, بيولوگيا پاندەرىن تاڭداپ, الداعى سىناققا قىزۋ دايىندىق جاساپ ءجۇر. كەلەشەكتە انا جولىن قۋىپ, ۇستاز بولۋدى قالايدى. وزىنەن كەيىنگى اقنۇر مەن ءىنىسى نۇرجاندى دا جاقسى وقۋعا باۋلىپ, قامقورلىق تانىتىپ وتىرادى.
«مەن قازاق قىزدارىنا قايران قالام,
جانارى, جانى جازداي جايراڭداعان.
«قىز وسسە – ەلدىڭ كوركى» دەگەن ءسوزدى,
قاپىسىز قالاي ايتقان قايران بابام؟»,
دەگەن جىر جولدارى جاننۇرداي جانى ىزگى, جانارىنا مەيىرىم تۇنعان, ەرىك-جىگەرى اسقاق ارۋلارعا ارنالسا كەرەك.
الماتى وبلىسى,
كەگەن اۋدانى
