ءبىر ايتا كەتەرلىگى, «Tengri milk» – ەلىمىز نارىعىندا 1996 جىلدان بەرى جۇمىس ىستەپ كەلە جاتقان «Agroholding Dinara Group» جشس-نا ەنشىلەس كاسىپورىن. العاشىندا ونىڭ نەگىزگى باعىتى سيىر ەتىن ءوندىرۋ بولعان. ۋاقىت وتە كەلە ءسۇت سالاسىنا دا نازار اۋدارىلىپ, ونى دامىتۋ باعىتىندا جۇمىس جۇرگىزىلە باستادى. باستاپقىدا ءسۇت ساتۋمەن اينالىسىپ, كەيىننەن ونى وڭدەپ, ودان ءونىم الۋدى جولعا قويدى.
– تابيعي تازا ءارى پايدالى ءونىم شىعارۋ يدەياسىن ىسكە اسىرۋعا الدىمەن ىرگەلى اۋىلدىق وكرۋگىنەن اۋماعى جەتى گەكتارلىق كەشەندى ساتىپ الدىق. ەشكى ءسۇتى جانە ىرىمشىك وندىرۋمەن اينالىسقان «زەرەندى» كومپانياسىنان ءبىرشاما اسىل تۇقىمدى ەشكى الدىق. ءسويتىپ 2022 جىلعى قاراشادا ءبىزدىڭ سەرىكتەستىك ءوز جۇمىسىن باستادى. بىرتىندەپ ەشكى فەرماسىن ءسۇت وڭدەۋ زاۋىتىمەن بىرىكتىردىك. وسىلايشا ءىرى اگروونەركاسىپ كەشەنى قۇرىلدى.
ەشكى ءسۇتى وزىمىزدە, ال سيىر ءسۇتىن تالعار اۋدانىندا ورنالاسقان اسىل تۇقىمدى سيىرعا ماماندانعان شارۋاشىلىقتان الامىز. ول «Dinara Group» اگروحولدينگىنىڭ قۇرامىنا كىرەدى. قاجەت جەمشوپپەن دە «Dinara Group» اگروحولدينگىنىڭ ەنشىلەس كاسىپورنى قامتاماسىز ەتەدى. ونىڭ قىزمەتكەرلەرى قازىردىڭ وزىندە جەر جىرتىپ, ەگىن ەگىپ, ءداندى جانە مال ازىقتىق داقىلداردى ءوسىرىپ, ءشوپ پەن سۇرلەم دايىندايدى. جالپى, اتالعان سەرىكتەستىكتە قاجەتتى قۇرال-جابدىقتار, ەلەۆاتور, استىق ساقتايتىن قويما بار, دەيدى «Tengri milk» جشس-نىڭ ديرەكتورى جازيرا شاياحمەت.
بايقاعانىمىزداي, ءبارىن جان-جاقتى جاقسى ويلاستىرىپ, ءار ءىستى تياناقتى جوسپارلاپ جاساعان اگروحولدينگتىڭ ارقاسىندا وعان قاراستى كاسىپورىنداردىڭ جۇمىسى جۇيەلى تۇردە جۇزەگە اسىپ, وڭ ناتيجەسىن بەرىپ وتىر. بۇگىندە «Fresh house» برەندىمەن ەش قوسپاسىز تازا ءونىم شىعارىپ جاتقان «Tengri milk» جشس سونىڭ دالەلى.
«Tengri milk» سەرىكتەستىگىندە ءسۇت ونىمدەرىنىڭ 30-دان استام ءتۇرى شىعارىلادى. بۇل – سيىر مەن ەشكى سۇتىنەن جاسالاتىن ايران, قايماق, سۇزبە, ماي, قۇرت. سونداي-اق مۇندا كوپتەگەن بالا سۇيسىنە وتىرىپ ىشەتىن شوكولادتى ءسۇت پەن ماي دا بار. ولاردى جاساۋعا ساپالى برازيليالىق كاكاو قولدانىلادى. بال قوسىلعان ەشكى سۇتىنەن دايىندالاتىن مايدى ەرەكشە اتاۋعا بولادى. كاسىپورىن باسشىسىنىڭ ايتۋىنشا, اتالعان ءونىمنىڭ ەمدىك قاسيەتى بار, اسىرەسە ول برونحى مەن وكپە جۇيەسىنىڭ اۋرۋلارىن ەمدەۋگە وتە پايدالى. كومپانيا جاقىندا جاڭا تابيعي يوگۋرتتاردىڭ دايىنداۋ ءتاسىلىن ازىرلەدى. ازىرگە ءتورت ءتۇرى بار – ۇشەۋى سيىر سۇتىنەن, بىرەۋى جارما قوسىندىسى بار ەشكى سۇتىنەن. قازىردە ساتىلىمعا دايىندالىپ جاتىر.
كەشەن اۋماعىندا قىمبات ءارى ساپالى قۇرال-جابدىقتارمەن, جەكە زەرتحانامەن جابدىقتالعان ۇلكەن وندىرىستىك تسەح ورنالاسقان. جاقسى يتالياندىق جابدىقتار ءونىمنىڭ جوعارعى ساپاسىن, ارنايى زەرتحانا ماماندارى ونىمدەردىڭ ەرەسەكتەر مەن بالالار دەنساۋلىعىنا پايدالى دارۋمەندەردىڭ ەكولوگيالىق تازا بولۋىن قامتاماسىز ەتەدى.
– ءبىزدىڭ ونىمدەرىمىزدىڭ ەرەكشەلىگى – ونىڭ تابيعيلىعىندا, ياعني ەشقانداي كونتسەنترات پەن وزگە دە قوسپالارى جوق. سوندىقتان ونىڭ ساقتاۋ مەرزىمى وتە قىسقا. بۇعان قوسا نارىقتا تازا ەشكى سۇتىنەن ارنايى جاسالعان ءسۇت ونىمدەرىن تابۋ قيىن.
جالپى, ءسۇتتى وڭدەۋ ۇدەرىسى ايتارلىقتاي ەڭبەكتى قاجەت ەتەدى. العاشقى كەزەڭدە ءسۇت ونىمدەرىنىڭ 11 ءتۇرىن شىعارساق, قازىر 30-دان استام. ەڭ تانىمال, سۇرانىسقا يە ءونىمىمىز – قۇرت. ول وتە نازىك, جۇمساق, باي تابيعي ءدامى بار. تۇتىنۋشىلارىمىز ونى شۆەتسيا, شۆەيتساريا سەكىلدى شەتەلدەرگە سىيلىق رەتىندە الىپ كەتەدى.
ءاربىر جاڭا ءونىمدى الدىمەن سىناقتان وتكىزەمىز. رەتسەپتىڭ تەحنولوگيا مەن ساپا ستاندارتتارىنا ساي بولۋىن قاتاڭ قاداعالايمىز. كاسىپورىن جۇمىسىن ءبىر جۇيەگە كەلتىرىپ, تولىق قۋاتقا شىققاندا ەشكى مەن سيىر ءسۇتىن قوسا ەسەپتەگەندە, تاۋلىگىنە بەس تونناعا دەيىن ءسۇت وڭدەۋگە قاۋقارلى بولادى, – دەيدى جازيرا بەيىسبايقىزى.
قازىرگى تاڭدا كاسىپورىنداعى شارۋا قوجالىعىندا زاانەن مەن ءالپى تۇقىمدى 1500-گە جۋىق ەشكى بار. جازيرا شاياحمەتتىڭ ايتۋىنشا, بۇل ەشكىلەردىڭ ەرەكشەلىگى – سۇتتىلىگىندە. ءجۇنى تەگىس بولىپ كەلەتىن ەشكىلەر سۋىقتى اسا ۇناتپايتىندىقتان, ولاردى ۇستايتىن تەمپەراتۋرا ۇنەمى +8 ° C دەڭگەيىندە ساقتالۋى قاجەت.
ەشكىلەر كۇنىنە ەكى رەت – تاڭعى ساعات 7-دە جانە كەشكى 5-تە ساۋىلادى. ءبىر مەزگىلدە 72 مالدان ءسۇت الىنادى. ولارعا ەكى ساۋىنشى مەن ءبىر مال دارىگەرى قارايدى. كومپانيانىڭ زەرتحانا ماماندارى دا ۇلكەن ءرول اتقارادى. ولار ءسۇتتى بىرنەشە رەت تەكسەرىپ, مايلىلىعىن, ميكروبتار مەن باكتەريالاردىڭ بار-جوعىن انىقتايدى. ساپاسىنا كوز جەتكىزگەن سوڭ عانا وڭدەۋگە جىبەرەدى.
جالپى, كاسىپورىندا 60-قا جۋىق ادام جۇمىس ىستەيدى. ونىڭ 90 پايىزى – جەرگىلىكتى تۇرعىندار. قىزمەتكەرلەردىڭ جارتىسى فەرمادا, جارتىسى ءسۇت وڭدەۋ تسەحىندا جۇمىس ىستەيدى.
بۇگىندە جۇمىسشىلار الداعى تولدەۋ ماۋسىمىنا دايىندالىپ جاتىر. تولدەۋ كەزەڭىندە ماماندار تاۋلىك بويى شارۋاشىلىقتا كەزەكشىلىك جاسايدى. بۇل ۇدەرىس كۇردەلى, سونىمەن بىرگە قۋانىشقا تولى. سەبەبى تولدەۋ ماۋسىمىندا مال باسى كوبەيىپ, ءونىم كولەمى ارتىپ, كاسىپورىن ودان ءارى داميتىن بولادى.
«Fresh house» ساۋدا بەلگىسىمەن «Tengri milk» ءسۇت كومپانياسىنىڭ ونىمدەرى تەك ەلىمىزدە ساتىلعانىمەن, ونى ەكسپورتقا جىبەرۋ ماسەلەسى دە پىسىقتالىپ جاتىر. سونىمەن قاتار الداعى جوسپاردا اسىل تۇقىمدى ەشكى باسىن كوبەيتۋ ارقىلى ءسۇت وڭدەۋ كولەمىن دە ارتتىرۋ كوزدەلىپ وتىر. بۇل رەتتە شىعارىلاتىن ءونىمنىڭ ءتۇرى كەڭەيىپ, قوسىمشا جۇمىس ورىندارى اشىلادى.
اقتوتى مىرزابەكقىزى,
جۋرناليست
الماتى وبلىسى,
قاراساي اۋدانى
