فوتو: اقتوبە وبلىسى اكىمدىگىنىڭ ءباسپاسوز قىزمەتى
اتالعان شارا شەڭبەرىندە قار شىعارۋ, ارنالاردى تازارتۋ, ينەرتتى ماتەريالداردى دايىنداۋ, جادىنامالار تاراتۋ جانە باسقا دا جۇمىستار اتقارىلىپ جاتىر. توتەنشە جاعدايلاردا ارەكەت ەتۋ ءۇشىن 2 454 ادام, 866 تەحنيكا بىرلىگى جانە ارنايى قايىقتار دايىندالعان.
اقتوبە قالاسىنىڭ اكىمى ازامات بەكەتتىڭ ايتۋىنشا قالاداعى قاردى شىعارۋعا 310 جۇك كولىگى جۇمىلدىرىلىپ, 255 مىڭ تەكشە مەتر قار شىعارىلعان. «قازگيدرومەت» وبلىستىق فيليالىنىڭ ديرەكتورى ايگۇل سايموۆانىڭ حابارلاۋىنشا, ناۋرىزدىڭ 1-5 كۇندەرى اقتوبە قالاسىندا 13,6 مم قار تۇسكەن. 9 ناۋرىزعا دەيىن قالادا تاعى قاردىڭ جاۋى كۇتىلىپ وتىر. سونداي-اق ايتەكە بي, بايعانين, مارتوك, مۇعالجار, ىرعىز, حرومتاۋ جانە باسقا دا اۋدانداردا مولشەردەن كوپ قار جاۋعان.
«قازسۋشار» وبلىستىق فيليالى ديرەكتورىنىڭ ورىنباسارى تيمۋر تلەۋوۆتىڭ مالىمەتىنشە, سۋ قويمالارىنداعى جاعداي ازىرگە تۇراقتى. 280 ملن تەكشە مەترگە دەيىن سۋ جينايتىن قارعالى سۋ قويماسىندا بۇگىندە 81 ملن تەكشە مەتر سۋ بار. اقتوبە سۋ قويماسىندا 183 ملن, ال سازدى سۋ قويماسىندا 5 ملن تەكشە مەتر بوس ورىن ساقتالعان.
«قاردىڭ كولەمى وتە كوپ, ونى سۋ تاسقىنى باستالعانعا دەيىن شىعارىپ ۇلگەرۋىمىز كەرەك, وعان وندىرىستىك كاسىپورىنداردىڭ تەحنيكالارىن تارتۋىمىز قاجەت. مۇزدىڭ ەرۋىن باقىلاۋ دا ماڭىزدى. جاعدايدى كۇندەلىكتى باقىلاپ, قاجەت بولعان جاعدايدا قوسىمشا شارالار قابىلدايمىز. ءاربىر جاۋاپتى تۇلعا ءوز مىندەتىن ۋاقىتىلى ورىنداۋ, ازاماتتاردىڭ قاۋىپسىزدىگى ءۇشىن جاۋاپ بەرەدى», دەپ تۇيىندەدى وبلىس اكىمى.
