سوڭعى 37 جىلدا العاش رەت ءبىر جىل ىشندە كەلۋشىلەر سانى 1 097 236 ادامعا جەتكەن. بۇگىندە قالالىق حايۋاناتتار باعىندا 361 تۇرگە جاتاتىن 3 838 جانۋار بار. ولاردىڭ كۇتىمىمەن 223 قىزمەتكەر اينالىسادى.
2024 جىلى 250 مىڭ ادام زووباقتى تەگىن تاماشالاعان. بۇل – 6 جاسقا دەيىنگى بالالار, بالالار ۇيلەرى مەن مەكتەپ-ينتەرناتتاردىڭ تاربيەلەنۋشىلەرى, كوپبالالى جانە از قامتىلعان وتباسىندعى بالالار, سونداي-اق زەينەتكەرلەر مەن مۇمكىندىگى شەكتەۋلى جاندار.
حايۋاناتتار باعى اكىمشىلىگىنىڭ ايتۋىنشا, مۇنداعى بيلەت باعاسى دا قولجەتىمدى بولىپ قالا بەرمەك. اتاپ ايتقاندا, ەرەسەكتەر ءۇشىن – 800 تەڭگە, ال بالالار ءۇشىن – 300 تەڭگە. كەلۋشىلەر سانىنىڭ جاڭا رەكوردىنا حايۋاناتتار باعىنىڭ ارتىپ كەلە جاتقان تانىمالدىعى سەبەپ بولعان. ول تابيعاتتى سۇيەتىندەر مەن وتباسىلىق دەمالىستى قالايتىن ادامدار ءۇشىن تارتىمدى ورىنعا اينالىپ وتىر.
الداعى ۋاقىتتا حايۋاناتتار باعىن حالىقارالىق ستاندارتقا سايكەس جاڭعىرتۋ جوسپارلانعان. بيىل جوبالىق-سمەتالىق قۇجاتتامانى ازىرلەۋ بويىنشا بايقاۋ جاريالانادى. كەيىن كەزەڭ-كەزەڭىمەن رەكونسترۋكتسيا جۇمىستارى باستالىپ, 2028 جىلعا دەيىن جالعاسادى.
«كەلۋشىلەردىڭ, اسىرەسە بالالاردىڭ, قىزىعۋشىلىعىن ارتتىرۋ جانە تانىمدىق دەڭگەيىن كوتەرۋ ماقساتىندا حايۋاناتتار باعىندا ءار جانۋار بويىنشا اننوتاتسيالىق تاقتايشالار ازىرلەنگەن. وندا جانۋاردىڭ اتاۋى, تارالۋ ايماعى, بيولوگيالىق ەرەكشەلىكتەرى مەن قىزىقتى فاكتىلەر كورسەتىلگەن. بارلىق اقپارات كەلۋشىلەرگە ىڭعايلى بولۋ ءۇشىن قازاق, ورىس جانە اعىلشىن تىلدەرىندە ۇسىنىلعان. سونىمەن قاتار, حايۋاناتتار باعىندا ناۆيگاتسيالىق جانە اقپاراتتىق ستەندتەر مەن ينتەراكتيۆتى ەلەمەنتتەر ورناتىلعان. ءبىز بالالارعا ارنالعان ءتۇرلى ۇيىرمەلەر مەن زوومەكتەپ جۇمىسىن دا ۇيىمداستىرىپ كەلەمىز», دەيدى حايۋاناتتار باعىنىڭ اكىمشىلىگى.
