كەش ايگىلى «عاسىرلار پەرنەسى» ءانسامبلىنىڭ ورىنداۋىنداعى «اقساۋىت» كۇيىمەن اشىلدى.
جانگەلدين اۋدانى اكىمىنىڭ ورىنباسارى ەرەنبول الماتوۆ جارتى عاسىرلىق تاريحى بار انسامبلگە قازاقستاننىڭ حالىق اقىنى قونىسباي ءابىلدىڭ ەسىمى بەرىلگەنىن اتاپ ءوتتى.
كونتسەرت بارىسىندا نۇرحان احمەتبەكوۆ اتىنداعى مادەنيەت ءۇيىنىڭ ونەرپازدارى « ۇلىلار ىزىمەن» اتتى پرولوگىن ۇسىنىپ, ۇلتتىق مۇراعا دەگەن ەرەكشە قۇرمەت كورسەتتى. بۇدان بولەك, «بالقاديشا» جەتىگەنشىلەر توبى, «ەركەناز» ۇلگىلى بي ءانسامبلى, باقىتجان بايقاداموۆ اتىنداعى كامەرالىق حور, رەسپۋبليكالىق جانە حالىقارالىق بايقاۋلاردىڭ لاۋرەاتتارى ونەر كورسەتتى. كۇي تارتىس شەبەرلەرى ءادىل اقانوۆ پەن پەريزات قالابايقىزىنىڭ ورىنداۋى كورەرمەندى ءتانتى ەتتى.
كەش بارىسىندا احمەت بايتۇرسىن ۇلىنىڭ 150 جىلدىعىنا ارنالعان «احمەت اندەرى» بايقاۋىنىڭ جەڭىمپازدارىنىڭ جانە جەرگىلىكتى كومپوزيتورلاردىڭ شىعارمالارى ورىندالدى. سونىمەن قاتار, حالىقارالىق بايقاۋلاردىڭ لاۋرەاتى جاۋكە وڭداعاننىڭ ورىنداۋىنداعى قونىسباي ءابىلدىڭ ايگىلى «بالا ماحابباتى» ءانى ورىنداۋشىسىن ەندى تاپقانداي اسەر بەردى.
بۇدان بولەك, رەسپۋبليكالىق بايقاۋلاردىڭ جەڭىمپازى فاريزا بۇركىتبايدىڭ ورىنداۋىندا بولات ءحامزيننىڭ «شولپانىم – جۇلدىزىم», سەرىكبولسىن ابىكەننىڭ ورىنداۋىندا «ۇيالماشى, قالقاتاي» اندەرىنىڭ تۇساۋى كەسىلدى.
كونتسەرت سوڭىندا الماس سەيىلحان, الماس نۇرلان, فاريزا بۇركىتباي, مەيرامبەك بەيسەنبەك, ميراس ابدىكارىم سەكىلدى بىرقاتار ونەرپازدارعا مادەنيەت جانە اقپارات مينيسترلىگى مەن وقۋ-اعارتۋ مينيسترلىگىنىڭ العىس حاتتارى تابىستالدى.
استانا قالاسىنىڭ ارداگەرلەرى, حالىق اقىنى قونىسباي ءابىلدىڭ تۋىستارى جانە تورعاي سەلوسىنىڭ 1964 جىلى تۋعان ازاماتتارى ونەرپازدارعا ىقىلاس گۇلدەرىن تارتۋ ەتتى.
انگە تولى سىرلى كەش – تورعاي ونەرپازدارىنىڭ اسقاق رۋحى مەن ونەرىن پاش ەتكەن ۇمىتىلماس مادەني وقيعا رەتىندە ەستە قالدى.
