فوتو: Polisia.kz
ءىس-شاراعا قاتىسۋ ءۇشىن كۇن سايىن قوزعالىستا بولاتىن جانە بىلتىر جول قوزعالىسى ەرەجەلەرىن مۇلدەم بۇزباعان اۆتوكولىك جۇرگىزۋشىلەرى تاڭدالعان. ىنتالاندىرۋ رەتىندە كولىك يەلەرىنە ءبىر جىلدىق مەرزىمگە ساقتاندىرۋ پوليسىنە سەرتيفيكاتتار تابىستالعان.
ايتا كەتەيىك, اكتسيا پوليتسيا, Sergek جانە Freedom Insurance كومپانيالارىنىڭ ءوزارا ءىس-قيمىلى ناتيجەسىندە ۇيىمداستىرىلعان.
«ىشكى ىستەر مينيسترىمەن جاريالانعان «پروفيلاكتيكا جىلى» اياسىندا وتكىزىلىپ جاتقان «قاۋىپسىز جول» اكتسياسىنىڭ باستى ماقساتى – جول-كولىك وقيعالارىنىڭ الدىن الۋ, جول جۇرىسىنە قاتىسۋشىلاردىڭ بارلىعىنىڭ قاۋىپسىزدىگىن قامتاماسىز ەتۋ جانە قاعيدالاردى بۇزۋدى بولدىرماۋ. سونىمەن قاتار بۇگىنگى تاڭدا وتكىزىلىپ جاتقان اكتسيا بارىسىندا جىل كولەمىندە ەشقانداي قۇقىق بۇزۋشىلىققا جول بەرمەگەن, جول اپاتتارىنا تۇسپەگەن جۇرگىزۋشىلەر ماراپاتتالادى», دەدى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
ۆەدومستۆونىڭ حابارلاۋىنشا, كۇن سايىن استانا جولدارىنا 284 مىڭنان استام اۆتوكولىك شىعادى, ونىڭ 77 مىڭى سوڭعى جىلى جول قوزعالىسى ەرەجەلەرىن بۇزباعان. ولاردىڭ اراسىنان ءجۇرىسى كوپ, ياعني كوپتەگەن قاشىقتىقتى ەڭسەرگەن, ماراپاتقا لايىق ون جۇرگىزۋشى تسيفرلىق جۇيەلەردىڭ كومەگىمەن تاڭداپ الىنعان.
ۇيىمداستىرۋشىلاردىڭ پىكىرىنشە, مۇنداي اكتسيالار جۇرگىزۋشىلەردى قاۋىپسىز قوزعالىسقا, قاعيدالاردى بۇزباۋعا, جول اپاتتارىن بولدىرماۋعا ىنتالاندىرادى.
