سۋرەتتى تۇسىرگەن – جانگەلدى ابدىعالىم
ارقادا وتكەن القالى جيىنعا قحا توراعاسىنىڭ ورىنباسارى, پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ, سونداي-اق كورنەكتى مەملەكەت جانە قوعام قايراتكەرلەرى, ەتنوسارالىق قاتىناستاردى دامىتۋ كوميتەتىنىڭ وكىلدەرى, باسقا وڭىرلەردىڭ قحا اقساقالدار كەڭەسىنىڭ توراعالارى قاتىستى.
وبلىس اكىمى ەرماعانبەت بولەكپاەۆ قۇتتىقتاۋ سوزىندە اسسامبلەيانىڭ 30 جىل ىشىندە قوعامدىق تاتۋلىق پەن اۋىزبىرلىكتى بەكەمدەيتىن نەگىزگى ينستيتۋتقا اينالعانىن ايتتى.
قحا توراعاسىنىڭ ورىنباسارى مارات ءازىلحانوۆ اقساقالدار كەڭەسىنىڭ وتىرىسىن ەڭبەكتىڭ قارا قازانى بولعاندىقتان قاراعاندىدا وتكىزۋدى ءجون كوردىك دەيدى.
«ادال ازامات» جوباسى العاش رەت ءوتىپ وتىر. جوبا جەڭىمپازدارى – ەسەلى ەڭبەكتەرىمەن ءوڭىردىڭ عانا ەمەس, ەل دامۋىنا ۇلەس قوسىپ جۇرگەن جۇمىسشى ماماندىقتارىنىڭ وكىلدەرى. كوميسسيا قۇرامى قحا قۇرىلىمدارىنىڭ باسشىلارىنان قۇرالدى. ولار جەتى اتالىم بويىنشا ۇزدىك وكىلدەردى انىقتادى. ۇمىتكەرلەردى ىرىكتەۋ كەزىندە جەڭىمپازداردىڭ كاسىبيلىگىنە عانا ەمەس, جەكە قاسيەتتەرىنە دە ءمان بەرىلدى.
سونىمەن «ۇلاعاتتى ۇستاز» اتالىمىندا تەمىرتاۋ قالاسىنداعى №14 مەكتەپ-ليتسەيىنىڭ فيزيكا جانە روبوتتەحنيكا مۇعالىمى ۆياچەسلاۆ ۆارزين جەڭىمپاز اتاندى. 40 جىل ەڭبەك ءوتىلى بار ۇستاز ينفورماتيكا بويىنشا اۆتورلىق باعدارلاما مەن فيزيكا بويىنشا عىلىمي-ادىستەمەلىك كەشەن ازىرلەگەن. تەمىرتاۋدا روبوتتەحنيكانى ءبىرىنشى بولىپ دامىتقان مۇعالىم.
«ەرەن ەڭبەك يەسى» اتالىمىنىڭ ۇزدىك وكىلى رەتىندە ت.كۇزەمباەۆ اتىنداعى شاحتانىڭ الدىڭعى قاتارلى ۇڭعىماشىسى نۇرلان ساتماعامبەتوۆ تانىلدى. نۇرلان راشيد ۇلى – جاس كادرلاردى تاربيەلەگەن بىلىكتى مامان.
«ادىلدىك ساقشىسى» اتالىمى بويىنشا وڭتۇستىك-شىعىس پوليتسيا ءبولىمىنىڭ جەرگىلىكتى پوليتسيا قىزمەتى بولىمشەسىنىڭ يۋۆەنالدى پوليتسيا توبىنىڭ ۋچاسكەلىك پوليتسيا ينسپەكتورى ايدانا شايمەردەنوۆا ماراپاتتالدى.
بالالار مەن جاسوسپىرىمدەرگە ارنالعان تەمىرتاۋ تەاترىنىڭ 3-ساناتتاعى تىگىنشىسى تاتيانا رۋبان «مادەنيەت مايتالمانى» اتالىمىنىڭ ۇزدىك وكىلى اتاندى. 30 جىلدان اسا ۋاقىت تىگىنشى بولىپ جۇمىس ىستەيتىن ونىڭ تەاتردىڭ شىعارماشىلىق ۇجىمىنا تىككەن كيىمدەرى جاڭاشىلدىعىمەن ەرەكشەلەنەدى.
قاراعاندى قالاسى توتەنشە جاعدايلار باسقارماسىنىڭ №10 ءورت ءسوندىرۋ ءبولىمى باستىعىنىڭ ورىنباسارى ماگاربي بۋزۋركاەۆ «ەرجۇرەك قۇتقارۋشى» اتاندى. ول «حانتەر» جشس-نىڭ 10 گاز تسيستەرناسىنىڭ جارىلىسى كەزىندە ءورتتى سوندىرگەن بريگادانى باسقارىپ, 53 گاز باللونىن شىعارىپ, قاۋىپتىڭ الدىن الادى.
ال «ىزگىلىك جارشىسى» اتالىمىنىڭ ۇزدىك وكىلى بولىپ ارينا بەكباەۆا لايىق دەپ تانىلدى. جەڭىمپاز يەسىز قالعان جانۋارلارعا قامقور بولىپ, وبلىستا زووۆولونتەرلىكتى دامىتىپ ءجۇر.
«ابزال جان» اتالىمىندا قاراعاندى قالاسىنداعى №3 ەمحانانىڭ وتباسىلىق دەنساۋلىق ورتالىعىنىڭ ءبولىم مەڭگەرۋشىسى, مەديتسينا ۇزدىگى عاليا مىڭتاەۆانىڭ باعى جاندى.
جوبانىڭ باس جۇلدەسى كوپ جىل فەرمادا ساۋىنشى بولعان نەسىبەلدى دوسانوۆاعا بۇيىردى.
وبلىستىق قحا اقساقالدار كەڭەسىنىڭ توراعاسى بەكزات التىنبەكوۆ جەڭىمپازداردى قۇتتىقتاپ, قاراعاندى قاراپايىم ەڭبەك ادامىن قولداۋدا ۇنەمى الدا بولاتىنىن اتاپ ءوتتى.
القالى جيىن ءارى قاراي اقساقالدار كەڭەسىنىڭ «ادال ازامات – قوعام بىرلىگىنىڭ نەگىزى» اتتى رەسپۋبليكالىق وتىرىسىمەن جالعاستى. مۇندا ەتنوسارالىق كەلىسىمدى نىعايتىپ جۇرگەن وڭىردەگى بەلسەندى اقساقالدار العىسحاتپەن ماراپاتتالدى. وتىرىس سوڭىندا قاتىسۋشىلار قاراعاندى تاجىريبەسى نەگىزىندە «ادال ازامات» جوباسىن ماسشتابتاۋ تۋرالى شەشىم قابىلدادى.
قاراعاندى وبلىسى
