«بىرىڭعاي پلاتفورما بارلىق گەولوگيالىق اقپاراتقا اشىق قول جەتكىزۋگە مۇمكىندىك بەرەدى. دەمەك ەلدەگى كەز كەلگەن ازامات اتالعان پلاتفورماعا كىرىپ, حالىقتىڭ جەراستى بايلىعى قالاي يگەرىلىپ جاتقانىن قاداعالاي الادى. پلاتفورمادا 22 مەملەكەتتىك قىزمەت تسيفرلاندىرىلعان. ىسكە قوسىلعاننان بەرى 506 ءوتىنىم وڭدەلدى. جەر قويناۋىن پايدالانۋدىڭ بىرىڭعاي پلاتفورماسى كومەگىمەن بارلاۋعا نەمەسە وندىرۋگە ءوتىنىم بەرۋدەن باستاپ, ونىڭ اۋكتسيونى مەن ليتسەنزياسىن بەرۋگە دەيىنگى ۇزدىكسىز ۇدەرىس جۇزەگە اسىرىلادى», دەدى ۆيتسە-مينيستر ءجاننات ءدۇبىروۆا.
پلاتفورمادا بارلىق گەولوگيالىق ەسەپتەردىڭ ءتىزىلىمى, العاشقى كىتاپتار, سونىڭ ىشىندە رەفەرات, ەسەپ مازمۇنى, گرافيكالىق قوسىمشالار ءتىزىمى, جۇمىس ناتيجەلەرى, قورىتىندىلار, تۇجىرىمدار, پايدالانىلعان ادەبيەتتەر ءتىزىمى, تەگىن ونلاين شولۋ جانە ورىندالعان جۇمىستاردى ءتۇسىنۋ ءۇشىن 60 000-نان استام ەسەپ بار.
مۇددەلى اۋماق تۋرالى قاجەتتى اقپاراتتى العاننان كەيىن پايدالانۋشىعا قولدانىستاعى ليتسەنزيالار مەن كەلىسىمشارتتار, بوس اۋماقتار, سونداي-اق اۋماقتا جۇرگىزىلگەن گەولوگيالىق-گەوفيزيكالىق بارلاۋ جۇمىستارى تۋرالى اقپارات بەرىلەدى. ناقتى قاجەتتى گەولوگيالىق ماتەريالداردى ساتىپ الۋ ءۇشىن جەر قويناۋىن پايدالانۋشىلار ۇلتتىق گەولوگيالىق قىزمەتتىڭ ينتەرنەت-رەسۋرسىندا ءوتىنىم بەرەدى. ءوتىنىم 5 جۇمىس كۇنىنەن كەشىكتىرىلمەي وڭدەلەدى.
ال بىرىڭعاي مەملەكەتتىك قىزمەتتىڭ ينتەراكتيۆتى كارتاسىن بولەك اتاپ وتكەن ءجون. سونىڭ ارقاسىندا الەۋەتتى جەر قويناۋىن پايدالانۋشىلار ينفراقۇرىلىمنان باستاپ گەولوگيالىق-گەوفيزيكالىق ەسەپتەرگە دەيىن سۇرالعان اۋماقتىڭ تولىق بەينەسىن الا الادى. ينتەراكتيۆتى كارتا جەر قويناۋىن پايدالانۋ ءۇشىن الىپ جاتقان بارلىق اۋماقتى قامتيدى. سونداي-اق اۋكتسيونعا قولجەتىمدى اۋماقتاردى ورنالاستىرۋعا مۇمكىندىك بەرەدى.
جۇيەدە تيىمدىلىك پەن اشىقتىقتى ارتتىرۋ ماقساتىندا قاتتى پايدالى قازبالار بويىنشا بەرىلگەن ليتسەنزيالار مەن كەلىسىمشارتتارعا مىندەتتەمەنىڭ ورىندالۋىن باقىلاۋ ۇدەرىسى تسيفرلاندىرىلعان. بۇرىن بۇل باقىلاۋ قولمەن جۇزەگە اسىرىلاتىن.
ونەركاسىپ جانە قۇرىلىس ءمينيسترى قانات شارلاپاەۆتىڭ ايتۋىنشا, قازىر ەلىمىزدە جاڭا كومىرسۋتەك كەن ورىندارىن اشۋعا مۇمكىندىك بار. گەولوگتەر شارتتى وتىننىڭ بولجامدى رەسۋرسى شامامەن 76 ملرد توننا بولاتىن 15 شوگىندى باسسەيندى ءبولىپ وتىر. بۇگىندە مۇناي-گاز ءوندىرۋدىڭ بارلىق كولەمى يگەرىلگەن 5 باسسەينگە تيەسىلى. ەڭ ءىرىسى – كاسپي ماڭى. وندا رەسۋرستىق بازانىڭ شامامەن 80%-ى بار.
2026 جىلدىڭ سوڭىنا دەيىن 2,2 ملن شارشى شاقىرىم اۋماقتا گەولوگيالىق-گەوفيزيكالىق زەرتتەۋ جۇرگىزۋ جوسپارلانعان. وسى كەزدە مۇنداي زەرتتەۋ كولەمى 1255,6 مىڭ شارشى شاقىرىمدى قۇرايدى.
