ينفوگرافيكانى جاساعان – امانگەلدى قياس, «EQ»
زاڭدى تۇلعالار سالىمىنىڭ جىلدىق ءوسىمى بويىنشا «Bereke Bank» ءابسوليۋتتى كوشباسشى اتاندى: سالىمدار بىردەن 51,8%-عا ارتىپ, جىل باسىندا 857,3 ملرد تەڭگەگە دەيىن جەتتى. بانك سالىمدارىنىڭ پورتفەلى تەپە-تەڭدىگىمەن ەرەكشەلەنەدى: ونداعى بيزنەس سالىمدارى 56,8%-دى قۇرايدى, ال قارجى ينستيتۋتىنىڭ ءوزى كورپوراتيۆتىك جانە بولشەك سەگمەنت باعىتىندا دا جۇمىس ىستەيدى.
ۇزدىك بانكتەر اراسىندا زاڭدى تۇلعالاردىڭ سالىمدارىنىڭ جىلدىق ءوسىمى بويىنشا «Bank RBK» ەكىنشى ورىنعا جايعاستى: سالىمدار 47,6%-عا ارتىپ, 1 ترلن تەڭگەگە دەيىن جەتتى. اتالعان قارجى ينستيتۋتىندا بيزنەس-دەپوزيتتەر سالىمداردىڭ 61,2%-ىن قۇرايدى.
ۇزدىك ۇشتىكتى «تسەنتر كرەديتبانكى» تۇيىندەيدى: سالىمدار جىلىنا 42,2%-عا ارتىپ, جىل باسىنا قاراي 2,5 ترلن تەڭگەگە دەيىن جەتتى. بيزنەس سالىمدارى بانكتىڭ دەپوزيتتىك پورتفەلىنىڭ 46,9%-ىن قۇرايدى. سونداي-اق «شينحان بانك قازاقستان» (+35,6%), «ForteBank» (+32,1%) جانە «Kaspi Bank» (+26,4%) سياقتى سەكتورداعى ءىرى بانكتەردىڭ بيزنەس سالىمدارىنىڭ پورتفەلدەرى سەكتور بويىنشا جىلدام ءوستى.
جالپى, سەكتور بويىنشا ەلدەگى 21 ەكىنشى دەڭگەيلى بانكتىڭ (ەدب) 19-ى, ونىڭ ىشىندە اتالعان بارلىق ۇزدىك 10 بانك وڭ كورسەتكىشكە قول جەتكىزدى. بيزنەس سالىمدار پورتفەلى قارقىندى تۇردە ءوسىپ جاتىر. ماسەلەن, بەس جىل بۇرىنعى كەزەڭمەن سالىستىرعاندا, اعىمداعى كورسەتكىش 2,1 ەسە, ون جىلدىق ديناميكادا 2,6 ەسە وسكەن.
«بانك سەكتورىنا, اتاپ ايتقاندا, بيزنەس-سالىمدار سەگمەنتىندە بايقالعان وڭ ديناميكا بولاشاقتا دا ساقتالۋعا ءتيىس, سەبەبى رەتتەۋشىلەر مەن حالىقارالىق اگەنتتىكتەردىڭ تسيفرلارى دا, وڭ باعالارى دا وسىنى مەڭزەيدى. مىسالى, «S&P Global Ratings» ءوزىنىڭ BICRA رەيتينگىندە ەلدىڭ پوزيتسياسىن كوتەردى: ساراپشىلار بانك سەكتورىنىڭ تاۋەكەلدەرىن باعالاۋدى «8» توبىنان «7» توبىنا دەيىن جاقسارتتى. ەدب سالىمدارىنىڭ جيىنتىق پورتفەلىندە زاڭدى تۇلعالار دەپوزيتى 42,2%-دى قۇرايدى, وتكەن جىلدىڭ باسىندا بۇل كورسەتكىش 41,8% بولسا, بەس جىل بۇرىن 48,2%-عا تەڭ بولدى», دەپ مالىمدەيدى «Ranking» ساراپشىلارى.
