سۋرەتتەردى تۇسىرگەن – جانگەلدى ابدىعالىم
«قاراعاندى ءوڭىرى – ەلىمىزدىڭ يندۋستريالدى جۇرەگى. وڭدەۋ ونەركاسىبىنىڭ كولەمى بويىنشا كوشباسشى ورىندامىز. وتكەن جىلى وبلىس 3 ترلن تەڭگەدەن استام ءونىم شىعاردى. ءبىز بيزنەستىڭ وسۋىنە جانە ينۆەستيتسيا تارتۋعا جاعداي جاساپ جاتىرمىز. بيىل 1,5 ترلن تەڭگەدەن استام ينۆەستيتسيا تارتۋدى جوسپارلاپ وتىرمىز, ونىڭ 90 پايىزعا جۋىعى – جەكەمەنشىك ينۆەستيتسيا. «Qarmet» كومپانياسىمەن بىرگە مەتاللۋرگيالىق كلاستەردى دامىتۋعا, سونىڭ ىشىندە قالدىقتاردى قايتا وڭدەۋگە ەرەكشە نازار اۋدارىپ وتىرمىز. كومپانيامەن بىرگە ماسەلەلەردى جەدەل شەشۋ ءۇشىن جوبالىق كەڭسە قۇرىلادى. ءبىزدىڭ باستى بايلىعىمىز – ادامدار. «جۇمىسشى ماماندىقتارى جىلى» اياسىندا ءبىز جاڭا سالالار ءۇشىن كادرلاردى بەلسەندى دايارلاپ جاتىرمىز. قاراعاندى تەحنيكالىق ۋنيۆەرسيتەتىنىڭ بازاسىندا وڭىرلىك يننوۆاتسيالىق-يندۋستريالىق حاب قۇرىلادى», دەدى ايماق باسشىسى ەرماعانبەت بولەكپاەۆ.
ەگەر ونەركاسىپتىك كلاستەر وركەندەسە, ءوندىرىس كولەمى عانا ءوسىپ قويمايدى. سايكەسىنشە تسيفرلىق شەشىمدەردى ەنگىزۋ مەن بيزنەستىڭ مەملەكەتتىك ورگاندارمەن ءوزارا ءىس-قيمىلى وڭتايلانادى.
«بۇل فورۋم – «Qarmet» ءىرى كاسىپورنىنىڭ اينالاسىندا شاعىن جانە ورتا بيزنەستى دامىتۋعا باعىتتالعان ماڭىزدى قادام. مينيسترلىك ءىرى كومپانيالاردىڭ جەرگىلىكتى جەتكىزۋشىلەرىمەن ءوزارا سەرىكتەستىك بويىنشا بەلسەندى جۇمىس جۇرگىزىپ جاتىر. ءبىز بۇل ونەركاسىپتىڭ تۇراقتى ءوسۋىنىڭ كەپىلى ەكەنىنە سەنىمدىمىز», دەدى ونەركاسىپ جانە قۇرىلىس ۆيتسە-ءمينيسترى يران شارحان.
ءماجىلىس دەپۋتاتى ارمان قالىقوۆ «Qarmet» ەلىمىزدىڭ 17 سەرپىندى جوباسىنىڭ قاتارىنا كىرگەنىنە قۋانىشتى ەكەنىن جەتكىزدى.
«بۇل ءسوزسىز, كاسىپورىننىڭ ەل وندىرىسىندەگى ماڭىزدى ءرولىن ايقىندايدى. ءبىز جۇمىسشىلار مەن كاسىپورىندار مۇددەسىن قورعاۋدى ودان ءارى جالعاستىرامىز», دەدى ا.قالىقوۆ.
بۇگىندە وبلىستاعى قىرىققا جۋىق شاعىن جانە ورتا بيزنەس كاسىپورىندارى «Qarmet» كومپانياسىمەن ءوزارا سەرىكتەستىك ورناتىپ وتىر. فورۋمدا قاراعاندى وبلىسىنىڭ اكىمدىگى مەن «Qarmet» اق اراسىندا ەل ىشىندەگى قۇندىلىقتاردى دامىتۋ بويىنشا مەموراندۋمعا قول قويىلدى. ماڭىزدى قۇجات ءىرى ءوندىرىس وشاعى مەن وڭىرىمىزدەگى شاعىن جانە ورتا بيزنەستىڭ اراسىنداعى ىنتىماقتى ودان ءارى جاراستىرۋعا كەپىل. مۇنىمەن قوسا «Qarmet» كومپانياسى وندىرىستىك قۇرىلىمدارى ورنالاسقان باسقا دا قالالاردا شاعىن ونەركاسىپتىك ايماقتار قۇرۋدى جوسپارلاپ وتىر. بۇل دا ءوز كەزەگىندە جەرگىلىكتى وندىرىستىك الەۋەتتى ارتتىرادى.
وبلىس اكىمدىگى «Qarmet» كومپانياسىمەن بىرلەسىپ, باستاما اياسىندا 20 مىڭ شارشى مەتر دايىن ءۇي-جايعا ارنالعان شاعىن ونەركاسىپتىك ايماق قۇرادى. جاڭا جۇمىس ورىندارى اشىلادى. وندىرىستىك تىزبەكتەر نىعايتىلىپ, يمپورتقا تاۋەلدىلىك قىسقارادى. سونىمەن قاتار جوبا اياسىندا ءىرى بيزنەس پەن شاعىن كاسىپكەرلىك ينتەگراتسياسى جۇزەگە اسىپ, تسيفرلىق شەشىمدەر ەنگىزىلمەك.
«مەتاللۋرگيانى جانە ساباقتاس سالالاردى دامىتۋ, وتاندىق وندىرۋشىلەردىڭ الەمدىك نارىقتاعى ۇستانىمىن نىعايتۋ, ەلىشىلىك قۇندىلىقتى قۇرۋ – ەلىمىزدىڭ ۇزاقمەرزىمدى ورنىقتى دامۋىنىڭ نەگىزگى فاكتورلارى. بىلتىر كۇردەلى سىرتقى ەكونوميكالىق جاعدايلارعا قاراماستان, «Qarmet» بولات ءوندىرىسىن 15 پايىزعا, ياعني 3,5 ملن تونناعا دەيىن ۇلعايتتى. بۇل ءوسىم ەلىمىزگە بولات ءوندىرۋ قارقىنى بويىنشا الەمدە 8-ورىنعا تۇراقتاۋعا مۇمكىندىك بەردى. 2028 جىلعا قاراي بولات ءوندىرىسىن جىلىنا 5 ملن تونناعا جەتكىزۋ ماقساتىن قويىپ وتىرمىز. بۇل باعدار ءوندىرىستى اۋقىمدى جاڭعىرتۋعا, شىعىنداردى وڭتايلاندىرۋعا, ۇدەرىستەردى تسيفرلاندىرۋعا جانە كاسىپورىن اينالاسىنداعى ونەركاسىپتىك كلاستەردى دامىتۋعا نەگىزدەلگەن», دەدى «Qarmet» كومپانياسىنىڭ باس ديرەكتورى ۆاديم باسين.
قاراعاندى وبلىسى
