سەكتوردا 2024 جىلدىڭ ءبىرىنشى جارتىجىلدىعىندا ءونىم شىعارۋ كولەمى 34,3 ترلن تەڭگەگە جەتىپ, نومينالدى ماندە ءبىر جىلدا 19%-عا ارتتى. مامانداردىڭ ايتۋىنشا, مۇنداي ءوسىم ۇدايى تىركەلە بەرمەيدى. وعان ايتۋلى سەبەپ بار. ول سەبەپ – سالاداعى تسيفرلاندىرۋ كوكجيەگىنىڭ كەڭەيۋى. تسيفرلىق سەرۆيستەردى ىسكە قوسىلۋى ناتيجەسىندە, اسىرەسە بانكتەر ىسكە قوسقان سەرۆيستەردىڭ كومەگىمەن شاعىن جانە ورتا كاسىپكەرلىك جوعارى دەڭگەيگە كوتەرىلدى.
بۇرىن جەكە كاسىپكەرلىك نەمەسە بانكتە شوت اشۋ ءۇشىن ءتۇرلى قۇجات جيناپ, ءتيىستى مەملەكەتتىك ورگاندارعا جۇگىنۋ قاجەت بولاتىن جانە ءبىراز اۋرەلەنىپ, اقشا جۇمساۋعا تۋرا كەلەتىن. ونىڭ سىرتىندا اپتالاپ كۇتۋ قاجەتتىگى تاعى بار. قازىر مۇنىڭ ءبارى ءبىر باتىرماعا سىيىپ كەتتى. ءموبيلدى قوسىمشانى ورناتىپ, ءوتىنىم بەرۋ عانا جەتىپ جاتىر.
قازىر قارجى ينستيتۋتتارىنىڭ ءموبيلدى قوسىمشالارى سان الۋان قارجىلىق جانە مەملەكەتتىك قىزمەتتەردى دە قولجەتىمدى ەتتى. اتاپ ايتقاندا:
قارجىلاندىرۋ قولجەتىمدى بولدى
ونلاين-قارىزداردىڭ كومەگىمەن بىرنەشە سەكۋند ىشىندە قارجى الۋعا بولادى, بۇل بيزنەسكە ۇلكەن سەپتىگىن تيگىزەدى. جالپى, ونلاين-وتىنىمدەر, كرەديت قابىلەتتىلىگىن اۆتوماتتاندىرۋ جولىمەن باعالاۋ جانە كەپىلسىز قارجىلاندىرۋ باعدارلامالارى كاسىپكەرلەرگە قارىزداردى قولجەتىمدى ەتتى.
جەڭىلدەتىلگەن قارجىلىق باسقارۋ جانە بيزنەستى باقىلاۋ جاقساردى
بانكتەردىڭ بيزنەسكە ارنالعان ءموبيلدى قوسىمشالارى بۋحگالتەرلىك ەسەپتى, اۋدارىمداردى, سالىق تولەۋدى, قارجىنى تالداۋدى جانە باسقا دا دۇنيەلەردى الدەقايدا جەڭىلدەتتى. بۇگىندە بيزنەس ءۇشىن ەڭ سۇرانىسقا يە ءموبيلدى قوسىمشا – «Kaspi.kz» ۇسىناتىن «Kaspi Pay». ودان كەيىن «Halyk Bank»-ءتىڭ بيزنەسكە ارنالعان «Onlinebank», «تسەنتر كرەديتبانك» ۇسىنىپ وتىرعان «BCC Business» قوسىمشالارى.
بانكتەردىڭ ماركەتپلەيسى دامىدى
وتاندىق بانكتەردىڭ پاندەمياعا دەيىن-اق ماركەتپلەيستەردى ىسكە قوسۋى ەلىمىزدە شوب دامۋىنا سەرپىن بەردى. بۇگىندە كاسىپكەرلەر بانكتەر ماركەتپلەيسىندە بەرىلگەن تولەمدەر, جەتكىزۋ جانە ساتىپ الۋشىلارعا كرەديت بەرۋ قىزمەتتەرىنىڭ كومەگىمەن تاۋارلار مەن قىزمەتتەردى ساتۋ مۇمكىندىگىنە يە. «Kaspi.kz» العاشقىلاردىڭ ءبىرى بولىپ ماركەتپلەيستى ىسكە قوسىپ, وسى سەگمەنتتە ءالى كۇنگە دەيىن كوش باستاپ تۇر. كومپانيانىڭ ارقاسىندا جۇزدەگەن مىڭ كاسىپكەر جاڭا ساتۋ قۇرالىن الدى. سونىمەن قاتار ماركەتپلەيستەر ەلدەگى بيزنەستى «اعارتۋدىڭ» جانە كولەڭكەلى ەكونوميكانى ازايتۋدىڭ ءتيىمدى قۇرالىنا اينالدى.
تولەم ينفراقۇرىلىمىن ينتەگراتسيالاۋ جولعا قويىلدى
ەدب تسيفرلىق قىزمەتتەرىنىڭ كومەگىمەن شاعىن جانە ورتا بيزنەس ءوز قىزمەتىنە ينتەرنەت-ەكۆايرينگتى, ءموبيلدى POS-تەرمينالداردى جانە QR-تولەمدەردى وڭاي قوستى, بۇل ساۋدانى جەڭىلدەتىپ, كوپ كليەنت تارتتى.
نارىققا شىعۋعا كەدەرگىلەر ازايدى
قارجى ينستيتۋتتارىنىڭ تسيفرلىق قىزمەتتەرى بيزنەستى باستاۋ جانە ونى باسقارۋ جۇمىستارىن ەداۋىر جەڭىلدەتتى. جك-ءنى, بانكتىك شوتتاردى ونلاين اشۋ جانە باسقا دا قىزمەتتەر ۋاقىت شىعىنىن, قارجىلىق شىعىنداردى ايتارلىقتاي قىسقارتتى. بۇگىندە بارلىق جاڭا بانكتىك شوتتاردىڭ 80%-ى ونلاين اشىلادى.
ۇلتتىق بانك دەرەكتەرىنە سايكەس كەيىنگى جىلدارى قولما-قول اقشاسىز تولەم قابىلدايتىن كاسىپورىنداردىڭ سانى ارتىپ كەلەدى. 2024 جىلدىڭ ءۇشىنشى توقسانىنىڭ قورىتىندىسىندا ەلىمىزدەگى وسىنداي كاسىپورىنداردىڭ سانى ءبىر جىلدا 26,9%-عا, ياعني 967,6 مىڭعا دەيىن ءوستى. ال وسى كاسىپورىنداردىڭ ساۋدا نۇكتەلەرىنىڭ سانى ءبىر جىلدا 22,7%-عا, ياعني 1,1 ملن-عا دەيىن كوبەيدى. POS-تەرمينال سانى 31,9%-عا, 1,3 ملن-عا دەيىن كوبەيدى. ۇلتتىق بانك حابارلاۋىنشا, مۇنداي دامۋ سەرپىلىسى بيزنەس ءۇشىن دە, تۇتىنۋشىلار ءۇشىن دە ەلەكتروندىق تولەمدەردى پايدالانۋدىڭ ىڭعايلىلىعىن ارتتىرۋعا ىقپال ەتەدى. POS-تەرمينال ينفراقۇرىلىمى تسيفرلىق ەكونوميكانى, اسىرەسە شاعىن جانە ورتا كاسىپكەرلىكتى ىنتالاندىرۋدىڭ ماڭىزدى قۇرالىنا اينالدى.
«ۇزاقمەرزىمدى ديناميكانى بولەك اتاپ وتكەن ءجون. مىسالى, 2020 جىلدىڭ ءۇشىنشى توقسانىمەن سالىستىرعاندا, قولما-قول اقشاسىز تولەم قابىلدايتىن كاسىپورىنداردىڭ سانى 9,4 ەسە, ساۋدا نۇكتەلەرىنىڭ سانى 7 ەسە, ال POS-تەرمينال سانى 6,7 ەسە ءوستى. بۇگىندە بانكتىك ءموبيلدى قوسىمشالاردى بەلسەندى پايدالانۋشىلاردىڭ سانى كۇن ساناپ ارتىپ جاتىر. ءبىر جىلدىڭ ىشىندە عانا كورسەتكىش 12,4%-عا ۇلعايدى. تيىسىنشە كاسىپكەرلەردىڭ كوبى تسيفرلىق سەرۆيستەرگە كوشىپ, ماركەتپلەيستەر ارقىلى جۇمىس ىستەپ, تولەم ينفراقۇرىلىمىن پايدالانىپ جاتىر. ەلەكتروندىق ساۋدا كولەمىنىڭ ستاتيستيكاسى دا تسيفرلىق قارجى تەحنولوگيالارىنىڭ ەكونوميكانى ترانسفورماتسيالاۋعا سەپتىگىن تيگىزگەنىن راستايدى. جالپى, ەلەكتروندىق كوممەرتسيا نارىعى تۇراقتى وڭ ديناميكانى كورسەتىپ وتىر: ورتاشا جىلدىق ءوسۋ قارقىنى 58%-دى قۇرادى. 2019–2023 جىلدار ارالىعىندا ترانزاكتسيالار سانى 4,3 ەسە, ال ورتاشا چەك 1,5 ەسە ءوستى», دەيدى تالداۋشىلار.
