قاسىم-جومارت توقاەۆقا مەملەكەتتىك قىزمەت ىستەرى اگەنتتىگى بىلتىر اتقارعان قىزمەتىنىڭ قورىتىندىلارى, سونداي-اق الداعى كەزەڭگە ارنالعان جوسپارى جونىندە باياندالدى.
دارحان جازىقباي كادرلىق ۇدەرىستەردى اۆتوماتتاندىرۋ جانە تسيفرلاندىرۋ, ماماندىعى مەن فۋنكتسيونالدىق باعىتى بويىنشا بىلىكتىلىك تالاپتارىنا سايكەس الەۋەتتى كانديداتتاردىڭ دەرەكتەر بازاسىن قالىپتاستىرۋعا مۇمكىندىك بەرەتىن eQyzmet ينتەگراتسيالانعان اقپاراتتىق جۇيەسىن جاپپاي قولدانىسقا ەنگىزۋ ناتيجەلەرى تۋرالى مالىمەت بەردى.
سونداي-اق مەملەكەت باسشىسىنا ەلەكتروندى جەكە ىستەر نەگىزىندە باسشىلىق لاۋازىمدارعا ۇمىتكەرلەردىڭ رەيتينگىن جاساقتاۋعا جول اشاتىن «پەرسونالدى ىرىكتەۋ» تسيفرلىق فۋنكتسيونالىنىڭ ەنگىزىلۋ بارىسى جونىندە ايتىلدى. ۇمىتكەرلەر جەكە جانە كاسىبي دامۋىن ەسكەرەتىن تسيفرلىق رەيتينگتى قولدانۋ ارقىلى ىرىكتەلەدى.
پرەزيدەنتكە مەملەكەتتىك بيۋدجەتتەن قارجىلاندىرىلاتىن ۇيىمداردىڭ كادرلىق قىزمەتىن اۆتوماتتاندىرۋ تۋرالى بۇعان دەيىن بەرگەن تاپسىرماسىنىڭ ورىندالۋ ناتيجەلەرى تانىستىرىلدى. اگەنتتىك توراعاسى «بىرىڭعاي كادر قىزمەتى» اقپاراتتىق جۇيەسىنە 8 مەملەكەتتىك ورگاننىڭ 19 ۆەدومستۆولىق باعىنىستاعى ۇيىمى قوسىلعانىن ايتتى. بيىل اقپاراتتىق جۇيەگە شامامەن 500 مىڭداي ادام جۇمىس ىستەيتىن 47 مەملەكەتتىك ورگاننىڭ 2 400-گە جۋىق ۆەدومستۆولىق باعىنىستى ۇيىمىن قوسۋ جوسپارلانىپ وتىر.
بۇعان قوسا قاسىم-جومارت توقاەۆ مەملەكەتتىك قىزمەتكە بىلىكتى ماماندار مەن دارىندى جاستاردى تارتۋ, مەملەكەتتىك اپپاراتتى بيۋروكراتيادان ارىلتۋ شارالارى تۋرالى ەسەپتى تىڭدادى.
كەزدەسۋدە قىزمەت الۋشىلار قۇقىقتارىنىڭ ساقتالۋىنا جۇرگىزىلگەن تسيفرلىق مونيتورينگ ناتيجەلەرىنە, ادامي رەسۋرستى باسقارۋ سالاسىنداعى وزىق تاجىريبە الماسۋ جانە مەملەكەتتىك قىزمەتشىلەردى شەتەلدە تاعىلىمدامادان وتكىزۋ ماسەلەلەرىنە ايرىقشا ءمان بەرىلدى.
پرەزيدەنت «مەملەكەتتىك قىزمەت تۋرالى» جاڭا زاڭ جوباسىن ازىرلەۋگە جانە مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسىن جۇزەگە اسىرۋعا قاتىستى بىرقاتار تاپسىرما بەردى. سونىمەن قاتار قاسىم-جومارت توقاەۆ مەملەكەتتىك اپپاراتتىڭ تيىمدىلىگىن ارتتىرۋ ءۇشىن زاماناۋي HR-قۇرالدارىن ەنگىزۋ ماڭىزدى ەكەنىنە نازار اۋداردى.
