كۇنى كەشە تۇركىستان قالاسىنىڭ اكىمى ازىمبەك پازىلبەك ۇلى الەمنىڭ ءتۇرلى ەلدەرىندەگى قولونەرشىلەر مەن قولونەردى بىرىكتىرۋشى – «World Craft Council» حالىقارالىق ۇيىمىنىڭ ساراپشىلارىمەن كەزدەستى. تۇركىستانعا ارنايى كەلگەن دۇنيەجۇزىلىك قولونەر كەڭەسىنىڭ ازيا-تىنىق مۇحيتى ايماعى بويىنشا ۆيتسە-پرەزيدەنتى ايدارحان كاليەۆ پەن ساراپشىلارى ۇندىستاندىق سوحان كۋمار دجا, تۇركيالىق ماحووتچيان يالدا, دۇنيەجۇزىلىك قولونەر كەڭەسىنىڭ وڭتۇستىك-شىعىس ازيا ايماعى بويىنشا ۆيتسە-پرەزيدەنتى جانە ساراپشىسى لە با نگوك قالانىڭ قولونەر سالاسىنىڭ دامۋىمەن تانىسىپ, تاجىريبەلەرىمەن ءبولىستى. سونىمەن قاتار «قولونەرشىلەر قالاسى» مارتەبەسىنە يە بولۋى ءۇشىن اتقارىلاتىن جۇمىس باعىتتارى مەن سالاداعى ىنتىماقتاستىق جايى تالقىلاندى.
ازىمبەك پازىلبەك ۇلى سان عاسىرلىق تاريحى بار, مادەنيەتى مەن ونەرى ۇشتاسقان قاسيەتتى شاھار تۋرالى بايانداپ, «حالىقارالىق قولونەرشىلەر قالاسى» مارتەبەسىن الۋدىڭ ماڭىزىنا توقتالدى. « ۇلى جىبەك جولىنىڭ ماڭىزدى ورتالىقتارىنىڭ ءبىرى بولىپ, ەجەلدەن قولونەردىڭ دامۋىنا ۇلكەن ۇلەس قوسقان تۇركىستان اتالعان مارتەبەنى الۋعا نيەتتى. بۇگىندە قالامىزدىڭ قولونەر سالاسى ءوزىنىڭ تەرەڭ تامىرى مەن ۇلتتىق ەرەكشەلىكتەرىن ساقتاي وتىرىپ, زاماناۋي ۇردىستەرمەن ۇيلەسىمدى دامىپ كەلەدى. تۇركىستاندىق شەبەرلەر جاساعان كەراميكالىق بۇيىمدار وزدەرىنىڭ اسەمدىگىمەن, ناقىشتى ورنەكتەرىمەن جانە ساپاسىمەن ەرەكشەلەنەدى. الداعى ۋاقىتتا قولونەرشىلەردى قولداۋعا باعىتتالعان ۇلكەن جوبالارىمىز بار», دەدى قالا اكىمى.
سونداي-اق باسقوسۋدا دۇنيەجۇزىلىك قولونەر كەڭەسىنىڭ ازيا-تىنىق مۇحيتى ايماعى بويىنشا ۆيتسە-پرەزيدەنتى ايدارحان كاليەۆ قالا اكىمىنە العىس ايتىپ, تۇركىستانمەن ىنتىماقتاستىقتى دامىتۋعا دايىن ەكەنىن جەتكىزدى. تۇركىستانعا «حالىقارالىق قولونەرشىلەر قالاسى» مارتەبەسىن الۋ ورتاق ماقسات ەكەنىن جەتكىزىپ, وسى جولدا بىرلەسىپ جۇمىس ىستەۋگە نيەت ءبىلدىردى.
