قالاداعى «جاسىل قىزىلوردا» مەكەمەسىنىڭ ماماندارى كوشە بويلارىن كوگالداندىرۋعا دايىندىقتى باستادى. ارىق جۇيەلەرىن تازالاۋ جانە كوگالداردى كۇتىپ-باپتاۋ دا جۇيەلى جۇرگىزىلىپ كەلەدى. ال «قىزىلوردا تازالىعى» مەكەمەسى كوشەلەر مەن قوعامدىق ورىنداردىڭ قوقىسىن جيناپ, مەكەمە قىزمەتكەرلەرى مەن تۇرعىندار قاتىساتىن سەنبىلىكتەر ۇيىمداستىرىپ جاتىر. وتكەن سەنبىلىكتە وبلىس ورتالىعى مەن بارلىق اۋدان تۇرعىندارى بەلسەندىلىك تانىتتى.
جالپى ەكولوگيالىق ءىس-شارا باستالعالى بەرى وعان 730 000-عا جۋىق وبلىس تۇرعىنى قاتىسىپ, 27 000 توننادان استام قوقىس شىعارىلعان. ەكى جىلدان بەرى وبلىستا «ۇلگىلى ەلدى مەكەن» بايقاۋى وتكىزىلىپ كەلەدى. بايقاۋ شەڭبەرىندە وبلىستىق بيۋدجەتتەن 1,5 ملرد تەڭگە ءبولىنىپ, جەڭىمپاز ەلدى مەكەندەرگە 48 ارنايى كوممۋنالدىق تەحنيكا تابىستالدى.
