ينۆەستيتسيالىق احۋالدى جاقسارتۋ – باسىم باعىت

ەلىمىزدىڭ ينۆەستيتسيالىق تارتىم­دىلىعىن ودان ءارى ارتتىرۋ, ونىڭ ىشىندە سالىق ساياساتىن جەتىلدىرۋ ماسەلەلەرىنە نازار اۋدارىلدى.

وتىرىسقا قاتىسۋشىلار ۇكىمەتتىڭ قولايلى بيزنەس-ورتا قۇرۋعا, ءوسۋ سەر­پىنىن ساقتاۋعا جانە ەكونوميكالىق دامۋ ساپاسىن ارتتىرۋعا باعىتتالعان رەفورمالارى تۋرالى حاباردار بولدى.

ازىرلەنىپ جاتقان جاڭا سالىق كودەكسى شەڭبەرىندە اكىمشىلەندىرۋدىڭ سەرۆيستىك مودەلىن ەنگىزۋ, سالىق ەسەپتىلىگىن 30%-عا قىسقارتۋ جانە سالىق تولەمدەرى تۇرلەرىنىڭ سانىن 20%-عا ازايتۋ كوزدەلگەنى اتاپ ءوتىلدى. ءوز ءونىمىن وندىرۋشىلەر ءۇشىن تابىس سالىعىنىڭ تومەندەتىلگەن مولشەرلەمەسى ەنگىزىلەدى, شيكىزاتتى قايتا وڭدەۋشىلەر جابدىقتىڭ يمپورتى بويىنشا ققس تولەۋ مەرزىمىن ۇزارتادى. سونىمەن قاتار رويالتيگە سالىق سالۋداعى وزگەرىستەر ءتۇسىندىرىلدى.

جيىندا ەلىمىزدەگى امەريكالىق ساۋ­دا پالاتاسىنىڭ اتقارۋشى ديرەك­تورى دجەفف ەرليح, اقش-تىڭ الماتىداعى باس كونسۋلى ميشەل يەركين, ۇلىبريتانيا ەلشىسى كەتي ليچ, ەو-نىڭ قازاقستانداعى ۋاقىتشا سەنىمدى وكىلى ماچەي مادالين­سكي, Deloitte سەرىكتەسى ەلدوس سىزدىقوۆ, كاۆكاز جانە ورتالىق ازيا ەلدەرىندەگى EY باسقارۋشى سەرىكتەسى ەرلان دوسىمبەكوۆ, Beeline قازاقستان باس ديرەكتورى ەۆگەني ناسترادين, ExxonMobil قازاقستان بو­يىنشا باسقارۋشى ديرەكتورى سەسيل راۋلين, Pfizer ايماقتىق ديرەكتورى دميتري كوزەنكوۆ ءسوز سويلەدى.

كوتەرىلگەن تاقىرىپتارعا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, قارجى ءمينيسترى ءمادي تاكيەۆ تۇسىنىك­تەمە بەردى.

قارجى مينيسترلىگىنىڭ مالىمە­تىنشە, 2024 جىلى ققس قايتارۋ اياسىندا رەكوردتىق 1,2 ترلن تەڭگە تولەنگەن. 2026 جىلعى 1 قاڭتاردان باستاپ سالىق­تى قايتارۋ ءراسىمىنىڭ تيىمدىلىگى مەن اشىق­تىعىن ارتتىراتىن جاڭا اقپاراتتىق جۇيە قولدانىسقا ەنگىزىلەدى.

وتىرىستى قورىتىندىلاعان پرەمەر-مينيستر ولجاس بەكتەنوۆ ايتىل­­عان ۇسىنىستار مەن باستامالار ءۇشىن العىسىن ءبىلدىردى. قازاقستان ۇكىمەتى اشىق ديالوگ پەن ءوزارا ۇيلەسىمدى ءىس-قيمىلعا دايىن.