سۋرەت: zh-shugylasy.kz
– وسىدان ون شاقتى كۇن بۇرىن كورشىمنىڭ قوراسىنا كىرىپ, ءتورت قوزىسىن جايراتىپ سالعان. كەشە ءبىزدىڭ ءۇيدىڭ مالىنا شابۋىلداپ, ءبىر قوزىمىزدى جەپ كەتتى. ايدىڭ-كۇننىڭ امانىندا قاڭعىباس يتتەردەن قورلىق كورىپ وتىرمىز. ۆەتەرينارلىق ستانسانىڭ قىزمەتكەرلەرى كورشىمنىڭ ۇيىنە كەلىپ, ولگەن مالدان سىناما الىپ كەتكەن ەكەن, ازىرگە حابار جوق. بالالارىمىز مەكتەپتەن قاراڭعىدا قايتادى. ەندى سولاردىڭ ومىرىنە الاڭداي باستادىق. جاۋاپتى ورگاندار جانۋارلاردى اۋلاپ, كوزىن قۇرتپاسا, مالىمىز شىعىندالا بەرەتىنى انىق. ولگەن مالدىڭ قۇنىن بىزگە ەشكىم وتەپ بەرمەيدى, – دەپ قىنجىلادى اۋىل تۇرعىنى ءمارۋا كونسەلحان.
وڭىرلىك ۆەتەريناريا باسقارماسى ۆەتەريناريا جانە ليتسەنزيالاۋ ءبولىمىنىڭ باسشىسى عالىم بەيسەنوۆتىڭ ايتۋىنشا, اۋدان باسىندا تۇراتىن ازاماتتاردان ازىرشە ەشقانداي شاعىم تۇسپەگەن.
– الەۋمەتتىك جەلىدە تاراعان بەينەجازبادان ۇساق مالداردىڭ ءولىپ جاتقانىن كوردىك. بىراق مال يەلەرى بىزبەن بايلانىسقا شىقپادى, دەرەكتەردى ناقتىلاي المادىق. ەگەر شاعىم تۇسسە, مالداردان سىناما الىنىپ, يتتەردە قانداي دا ءبىر اۋرۋدىڭ بار-جوقتىعى تەكسەرىلەدى. الگوريتمگە سايكەس ودان ءارى قاڭعىباس جانۋارلاردى اۋلاۋ جۇرگىزىلەدى. وتكەن جىلى قاڭعىباس يتتەردىڭ مالعا شابۋىلداعانى تۋرالى دەرەكتەر بولدى. بيىل ازىرشە ونداي وقيعالار رەسمي تۇردە تىركەلگەن جوق, – دەيدى ول.
پاۆلودار وبلىسى,
اقتوعاي اۋدانى
