ارالاس جەكپە-جەك پەن كاسىپقوي بوكستى قاتار الىپ جۇرگەن قازاقتىڭ قايسار ۇلى راسۋل مىرزاەۆپەن ايقاستى. بۇل ەسىم جانكۇيەرلەرگە جاقسى تانىس. «قارا جولبارىس» دەگەن بۇركەنشىك ەسىممەن تانىلعان داعىستاننىڭ تۋماسى جاۋىنگەرلىك سامبودان الەم چەمپيونى, پانكراتيوننان الەم كۋبوگىنىڭ يەگەرى, جەكپە-جەكتىڭ سان الۋان تۇرىنەن كوپتەگەن ءدۇبىرلى دودانىڭ جەڭىمپازى. 2009–2016 جىلدار ارالىعىندا 17 مارتە وكتاگونعا شىققان ر.ميرزاەۆ بارلىق باسەكەدە جەڭىسكە جەتتى. قارسىلاسىنىڭ دەنىن ايقىن باسىمدىقپەن ۇتتى.
راسۋل 2013, 2014 جىلدارى ەلىمىزگە كەلىپ, ەرجان ەستانوۆپەن كۇش سىناستى. بۇل كەزدەسۋدىڭ ەكەۋىندە دە داعىستاندىق جەڭىسكە جەتتى. 2020 جىلدىڭ كوكتەمىندە الماتى تورىندە جالاۋى جەلبىرەگەن اسا تۋرنيرىندە ارمان وسپانوۆ («سۇڭقار») ونى جەرگە جىعىپ الىپ, اۋىر سوققىلاردىڭ استىنا الدى. «قارا جولبارىستىڭ» شاراسىز كۇيىن كورگەن تورەشى دەرەۋ جەكپە-جەكتى توقتاتتى. كەيىننەن سول باسەكەدە راسۋلدىڭ جاعى سىنعانى بەلگىلى بولدى.
ارادا بەس جىل وتكەننەن كەيىن ميرزاەۆ الاتاۋ باۋرايىنا قايتا ات باسىن بۇردى. «نايزا» پروموۋشەنى ۇيىمداستىرعان جارىستا ج.جۇمابەكوۆپەن جۇدىرىقتاستى. قانداسىمىز ونىڭ ەركىن كوسىلۋىنە ەش مۇمكىندىك بەرگەن جوق. ەكىنشى راۋندتا جۇماننىڭ جويقىن سوققىسى قارسىلاسىنا ءدال ءتيدى, راسۋل تالتىرەكتەپ قالدى. سول مەزەتتە وعان تاعى بىرنەشە سوققى جۇمساپ ۇلگەردى. ميرزاەۆتىڭ قورعانۋعا شاماسى كەلمەدى. داعىستان وكىلىنىڭ ءالى دە ەس جيا الماي تۇرعانىن بايقاعان تورەشى اراعا ءتۇستى. وسىلايشا, الماتىداعى ايقاس ج.جۇمابەكوۆتىڭ ايقىن جەڭىسىمەن اياقتالدى.
