فوتو: «اۋىل» پارتياسىنىڭ ءباسپاسوز قىزمەتى
بەلسەندى ورەندەردىڭ جيىنىنا «اۋىل» پارتياسى ۇيىتقى بولدى. ەلىمىزدەگى وزگە ەتنوس جاستارىنىڭ ساياسي باستامالارعا وڭ كوزقاراسىن قالىپتاستىرۋدى مەجە تۇتقان جيىنعا پارتيا توراعاسى, ءماجىلىس دەپۋتاتى س.ەگىزباەۆ, فراكتسيا دەپۋتاتى ن.اريۋستين قاتىستى. جاستارمەن ەمەن-جارقىن اڭگىمە وربىتكەن س. ەگىزباەۆ بابادان امانات بولىپ جەتكەن ىرىستى ىنتىماق جولىن جالعاي تۇسۋگە ۇندەدى.
«قازىر قازاقستاننىڭ بايلىعى رەتىندە كوبىنە جەر استىنداعى پايدالى قازبالارىمىز ايتىلىپ ءجۇر. بىراق ءبىزدىڭ باستى بايلىعىمىز - جەر استىندا ەمەس, جەر بەتىندە. ول - حالقىمىزدىڭ بىرلىگى. اتا-بابالارىمىز, اعا بۋىن وكىلدەرى باعا جەتپەس وسى بايلىقتى ءسىز بەن بىزگە مۇرا قىلىپ قالدىردى. ونى ساقتاپ, ءارى قاراي ەسەلەپ, ەلگە ۇلگى ەتۋ سىزدەردىڭ, ياعني بۇگىنگى جاستاردىڭ ەڭ اسىل مۇراتى بولۋى كەرەك», دەدى «اۋىل» پارتياسىنىڭ توراعاسى.
بىرلىك تۋىن بەكەمدەپ, بيىككە كوتەرۋگە بەيىلدى جاستار قوعامداعى كەلەلى ماسەلەرگە الاڭداۋشىلىق ءبىلدىردى. ماسەلەن وسى جيىنعا قاراعاندىدان ارنايى جەتكەن بولاشاق جۋرناليست دەۆيۆىە البينا عالامتورداعى قازاقشا كونتەنت ۇلەس-سالماعىنىڭ ازدىعىن ايتىپ, بۇل ءوز كەزەگىندە بالدىرعاندار ءتىلىنىڭ شۇبارلانۋىنا سوقتىراتىنىن تىلگە تيەك ەتتى.
«ايگىلى ءمادي اقىن «اتىڭنان اينالايىن, قارقارالى» دەپ جىرلاعان ولكەدەگى قاراكول اۋىلىندا تۋىپ, ءوستىم. بويىمىزدا نەمىس, تاتار, ورىس ۇلتتارىنىڭ قانى بار. دارحان كوڭىلدى قازاعىمنىڭ ورتاسىندا بويجەتكەن سوڭ ءتىلىم قازاق تىلىندە شىقتى, قازاق مەكتەبىندە ءبىلىم الدىم. قازىر دە ە. بوكەتوۆ اتىنداعى ۋنيۆەرسيتەتتە قازاق توبىندا ءبىلىم الامىن. ورىس ءتىلىن قاراعاندىعا كەلىپ ۇيرەندىم. مەنى الەۋمەتتىك جەلىلەردەگى جالعان اقپارات پەن قازاق تىلىندەگى كونتەنتتىڭ ازدىعى تولعاندىرادى», دەگەن البينا «اۋىل» پارتياسىنا ۇلتتىق قۇندىلىققا سۋارىلعان جاڭالىقتاردى كوبەيتۋ جولىن قاراستىرىپ, ءوتىنىش - تىلەگىن ءماجىلىس مىنبەرىنەن كوتەرۋدى سۇرادى.
ءوز كەزەگىندە پارتيا مۇشەلەرى اعا بۋىن مەن جاستاردىڭ تالاپ-تىلەگى ءبىر ارنادا توعىسىپ جاتقانىنا توقتالىپ, بۇل باعىتتا قازىردىڭ وزىندە اتقارىلىپ جاتقان شارالاردى تارماقتادى ءارى الداعى ۋاقىتتا دا بۇل ءىس جالعاساتىنىن جەتكىزدى.
جيىندا «اۋىل» پارتياسى قوعامدىق-ساياسي جۇمىس دەپارتامەنتىنىڭ ديرەكتورى, ەتنيكالىق ساياسات بويىنشا زەرتتەۋشى ج. كارينباەۆ تەرەڭ تاريحتى ەتنوسارالىق قاتىناس تۋرالى بايانداما جاسادى.
اشىق سۇحبات بارىسىندا جاستار كوكەيىندەگى ساۋالدارىن ورتاعا سالىپ, پارتيا مۇشەلەرى تاراپىنان تۇششىمدى جاۋاپ الدى.
شارا سوڭىندا «اۋىل» ساپىنان كورىنۋگە سۇرانىس بىلدىرگەن 10 جاسقا پارتيالىق بيلەت تابىستالدى.
