كىتاپتىڭ تۇساۋىن ەۋرازيا ۇلتتىق ۋنيۆەرسيتەتىنىڭ اكادەميالىق ماسەلەلەر جونىندەگى پرورەكتورى ارداق بەيسەنباي, ۇلتتىق عىلىم اكادەمياسىنىڭ اكادەميگى شەرۋباي قۇرمانباي ۇلى, جازۋشىلار وداعىنىڭ استانا فيليالى ديرەكتورى, «تۇركىستان» گازەتىنىڭ باس رەداكتورى باۋىرجان باباجان ۇلى, بەلگىلى قالامگەر وراز قاۋعاباي, فيلولوگيا فاكۋلتەتىنىڭ دەكانى, اقىن سەرىكزات دۇيسەنعازى كەستى.
ارداق بەيسەنباي قالامگەردىڭ ءومىرى مەن شىعارماشىلىق جولىنا قاتىستى ويىن ورتاعا سالدى. «بەلگىلى جازۋشى تۇرلىبەك مامەسەيىت اعامىز ۇزاق جىل بويى ءبىزدىڭ ۋنيۆەرسيتەتتىڭ فيلولوگيا جانە جۋرناليستيكا فاكۋلتەتتەرىندە عالىم رەتىندە ءونىمدى ەڭبەك ەتىپ, جۇزدەگەن شاكىرت تاربيەلەدى. ارتىندا قانشاما عىلىمي جانە ادەبي ەڭبەگى قالدى. الداعى ۋاقىتتا سول ەڭبەكتەردى ۋنيۆەرسيتەتىمىزدىڭ ماگيسترانتتارى مەن دوكتورانتتارى زەرتتەپ, ديسسەرتاتسيالار قورعالۋى كەرەك دەپ ويلايمىن», دەدى.
پارلامەنت ءماجىلىسىنىڭ دەپۋتاتى جاناربەك ءاشىمجان تۇرلىبەك مامەسەيىتتىڭ ەسىمىن ەل ەسىندە قالدىرۋ ماسەلەسىنە توقتالىپ, باستاما كوتەردى. ء«ومىرىن شىعارماشىلىققا ارناعان تۇلعا. تۇرلىبەك اعا تاۋلى وڭىردە مەكەندەگەن قاراپايىم حالىقتىڭ باسىنان وتكەرگەن قيلى كەزەڭدى شىعارماشىلىعىنا ارقاۋ ەتىپ, ەل باسىنان وتكەن ءتۇرلى تاعدىردى قاعازعا كەستەلەدى. قالامگەردىڭ قاي تۋىندىسىن وقىساڭىز دا, ۋاقىتتىڭ تىنىسىن, ادامنىڭ ءىس-ارەكەتىن, كەيىپكەرلەرىنىڭ مىنەزىن تابيعي بولمىسىمەن قوسا سەزىنە الاسىز. ەل ارالاپ, جەر كەزىپ, كوزبەن كورىپ, قولمەن ۇستاعان دۇنيەسىن كوركەم شىعارماعا اينالدىراتىن. تۇرلىبەك اعا استانا قالاسىنىڭ رۋحاني تۇرعىدا ءوسىپ-وركەندەۋىنە دە ولشەۋسىز ۇلەس قوستى. شاكىرت تاربيەلەۋ ىسىندە تەر توكتى. الداعى ۋاقىتتا قالامگەردىڭ ەسىمىن ماڭگى ەستە قالدىرۋ ماقساتىندا ءوزى تۇرعان ءۇيدىڭ قابىرعاسىنا ەسكەرتكىش تاقتا ورناتىپ, جازۋشىلار وداعىنىڭ استانا قالالىق فيليالىمەن بىرلەسىپ, ءتۇرلى ءىس-شارانى قولعا الامىز», دەپ اتاپ ءوتتى.
كىتاپ تۇساۋكەسەرىنە الماتىدان ونلاين قوسىلعان بەلگىلى جازۋشى, سىنشى نۇرداۋلەت اقىش پەن اقىن داۋلەتبەك بايتۇرسىن ۇلى قالامگەر شىعارماشىلىعى تۋرالى كەڭ مازمۇندى اڭگىمەلەرىن ايتتى. «العاشىندا تۇرلىبەك مامەسەيىت بۇقاراعا سىنشى رەتىندە تانىلدى. سىن جانرىنان «توعىسقان تولقىن», «زەردەلىلىك ايناسى», «ديدار», «تانىم تارازىسى» كىتاپتارىن, زەرتتەۋ باعىتىندا «ەگىز ەلدىڭ اۋەنى», «شەرحان مۇرتازا», «شەر مەن شەرحان» اتتى ەڭبەكتەر جازدى. ول عىلىمعا دا تۇرەن سالىپ, قازاقتىڭ قايسار ۇلى, قازىنالى جازۋشى شەرحان مۇرتازانىڭ شىعارماشىلىعىن ىندەتە زەرتتەپ, فيلولوگيا عىلىمدارىنىڭ كانديداتى اتاندى. ياعني, بىرىنشىدەن, قالامگەردىڭ سىنشى, زەرتتەۋشى باعىتىنداعى قىرىنا ءمان بەرۋىمىز كەرەك. ەكىنشى باعىتى – جازۋشىلىق. ءوزى جازۋشىلىققا سىننان كەلگەنىن ءجيى ايتاتىن. العاشقى جازعان تۋىندىسىن قازاقتىڭ كلاسسيك جازۋشىسى سايىن مۇراتبەكوۆ ۇناتىپ, باتاسىن بەرگەن. سول باتادان كەيىن تاۋ تابيعاتىنىڭ تامىلجىعان كورىنىستەرى مەن قاھارلى مىنەزىن ادام تاعدىرىمەن, كوڭىل كۇيىمەن استاستىرا سۋرەتتەي ءبىلدى. ءۇشىنشى قىرى – دراماتۋرگيا.
ول كىسى كۇردەلى جانرعا دا تاۋەكەل ەتىپ, «باكەي قىز», «تۋلاق», «تاڭجارىق», «قۇلقىننىڭ ق ۇلى» قاتارلى پەسالاردى ومىرگە اكەلدى», دەدى داۋلەتبەك بايتۇرسىن ۇلى.
ادەبي ءىس-شارادا «توعىسقان تولقىن», «زەردەلىلىك ايناسى», «ديدار», «بەتورامال», «تۇسىمە تاۋ كىرەدى», «بەسىك پەن نەسىپ», «پلاچ وحوتنيكا», «اۋليە-شوقى», «تەكتىنىڭ كەگى», «تاۋ», «قارقارا كوتەرىلىسى», «جاسىن تۇسكەن ماۋسىم», «تاڭجارىق», ت.ب كىتاپتاردىڭ اۆتورى تۇرلىبەك مامەسەيىت تۋرالى اكادەميك شەرۋباي قۇرمانباي ۇلى, جازۋشىلار وداعى استانا فيليالىنىڭ ديرەكتورى, اقىن باۋىرجان باباجان ۇلى, ەۇۋ فيلولوگيا فاكۋلتەتىنىڭ دەكانى, اقىن سەرىكزات دۇيسەنعازى, ت.ب. اقىن-جازۋشى, ادەبيەتتانۋشىلار وي-پايىمدارىن ورتاعا سالدى.
