ەكونوميكاداعى ۇلەسى
«قازمۇنايگاز» – ەلدەگى بارلىق مۇناي ءوندىرۋدىڭ 26%-ىن, تاسىمالداۋدىڭ 56%-ىن جانە مۇناي وڭدەۋدىڭ 80%-ىن قامتاماسىز ەتىپ وتىرعان ۇلتتىق كومپانيا. ونىڭ مەملەكەت بيۋدجەتى مەن ۇلتتىق قورداعى شوعىرلاندىرىلعان ۇلەسى شامامەن 10%-عا جەتەدى. بۇگىندە كومپانيا – ەلىمىزدىڭ ەڭ ءىرى جۇمىس بەرۋشىلەرىنىڭ ءبىرى. مەردىگەر ۇيىمداردى ەسكەرسەك, قمگ قۇرىلىمىندا 80 مىڭنان استام ادام ەڭبەك ەتەدى. بۇل كومپانيانىڭ ەلدىڭ الەۋمەتتىك-ەكونوميكالىق دامۋىنا ايتارلىقتاي ىقپال ەتىپ ءارى ماڭىزدى ءرول اتقارىپ كەلە جاتقانىن كورسەتەدى.
حالىقارالىق رەيتينگ اگەنتتىكتەرى قمگ-عا جوعارى باعا بەردى. IPO وتكىزىلگەن ساتتەن باستاپ 2024 جىلدىڭ سوڭىندا كومپانيا اكتسيالارىنىڭ قۇنى 73,9%-عا ءوستى. اكتيۆتەرىنەن تۇراقتى ءتۇسىپ تۇراتىن ديۆيدەند قمگ-نىڭ قارجىلىق ورنىقتىلىعىن كورسەتەدى. مىسالى, 2020 جىلدان باستاپ تولەنگەن ديۆيدەند سوماسى 7 ەسە ءوستى. مەملەكەت باسشىسى قمگ الدىنا ەلىمىزدىڭ رەسۋرستىق قورىن جانە مۇناي مەن گاز ءوندىرۋ كولەمىن ۇلعايتۋ, مۇناي-گاز حيمياسىن دامىتۋ, ءىرى ينۆەستيتسيالىق جوبالاردى ىسكە اسىرۋ باعىتتارىندا ناقتى تاپسىرمالار جۇكتەگەن. بۇل رەتتە قمگ اتالعان مىندەتتەردى ورىنداۋ ءۇشىن جۇمىستاردى جۇيەلى جۇرگىزىپ كەلەدى.
ەلدىڭ رەسۋرستىق قورىن تولىقتىرۋ
گەولوگيالىق بارلاۋ قىزمەتى اۋەلدەن قمگ جۇمىستارىنىڭ نەگىزگى باعىتى بولىپ كەلەدى. 2025 جىلعى 1 قاڭتارداعى مالىمەت بويىنشا مۇناي مەن كوندەنساتتىڭ وندىرىلەتىن قورى – 767 ملن توننا. كەيىنگى 5 جىلدا قوسىمشا بارلاۋ ءىس-شارالارى مەن اكتيۆتەردى ساتىپ الۋ ەسەبىنەن قوردى تولتىرۋ كوەففيتسيەنتى 176%-عا جەتتى. قازىر گەولوگيالىق مۇناي قورىنىڭ كولەمى شامامەن 2 ملرد تونناعا تەڭ كەلەتىن جەر قويناۋىن پايدالانۋعا ارنالعان 11 كەلىسىمشارت بار. ولاردىڭ ءبىر بولىگى ستراتەگيالىق سەرىكتەستەردىڭ قاتىسۋىمەن ىسكە اسىرىلىپ جاتىر. جەر قويناۋىندا تەرەڭ ورنالاسقان قورلاردىڭ مۇمكىندىگىن زەرتتەۋ اياسىندا بىلتىر قىزىلوردا وبلىسىندا تورعاي پالەوزوي جانە اتىراۋ وبلىسىندا قاراتون پودسولەۆوي ۋچاسكەلەرىندە تەرەڭدىگى 5 500 مەتر ۇڭعىمالاردى بۇرعىلاۋ جۇمىستارى باستالدى.
تەرەڭ ۇڭعىمالاردى بۇرعىلاۋ كوپ قارجىنى قاجەت ەتەدى. ءارى بۇل جۇمىستى ۇلكەن گەولوگيالىق ءارى تەحنولوگيالىق تاۋەكەل دەسەك تە بولادى. مەملەكەت باسشىسىنىڭ تاپسىرماسى بويىنشا قابىلدانعان «جاقسارتىلعان مودەلدىك كەلىسىمشارت» تەتىگى وسىنداي كۇردەلى جوبالاردىڭ تارتىمدىلىعىن ارتتىردى. سونىمەن قاتار «قاراجار» جانە «تايسويعان» ۋچاسكەلەرىندە بۇرعىلاۋ باستالدى. ماڭعىستاۋ, اتىراۋ, باتىس قازاقستان جانە اقتوبە وبلىستارىنداعى بولاشاعى زور ۋچاسكەلەردە بۇرعىلاۋ جۇمىستارىن باستاۋعا قاتىستى جاڭا كەلىسىمشارتتار قولعا الىنۋدا. بۇل جوبالارعا «Shell», «Chevron», CNOOC, «Sinopec», CNPC سىندى الەمدىك ءىرى كومپانيالار قىزىعۋشىلىق تانىتىپ وتىر.
بۇل رەتتە ماڭىزدى قىزمەت باعىتتىڭ ءبىرى – كاسپي ماڭى ويپاتى جانە ماڭعىشىلاق تۇبەگىندە تەرەڭ ورنالاسقان كوكجيەكتەردى تۇبەگەيلى زەرتتەۋ. اتالعان ايماقتا اۋقىمدى سەيسميكالىق بارلاۋ جۇمىستارىن جۇرگىزۋ زاماناۋي وزىق تەحنولوگيالاردى جانە قوماقتى ينۆەستيتسيالىق قاراجاتتى قاجەت ەتەدى.
مۇناي جانە گاز ءوندىرۋ كولەمىن ۇلعايتۋ
2024 جىلى قمگ 23,8 ملن توننا مۇناي ءوندىردى. جوسپار بويىنشا 23,5 ملن توننا وندىرۋگە ءتيىس ەدى. كەيىنگى 5 جىلدا مۇناي ءوندىرۋ كولەمى 2 ملن توننادان استام كورسەتكىشكە ءوستى. كومپانيا وسى كورسەتكىشتى وسىرە تۇسۋگە نيەتتى. ءۇش ءىرى كەن ورنىنداعى (تەڭىز, قاشاعان, قاراشىعاناق) بىرقاتار ينۆەستيتسيالىق جوبا, قالامقاس-تەڭىز كەن ورنىندا ونەركاسىپتىك يگەرۋدى باستاۋ, سونداي-اق گەولوگيالىق بارلاۋ جۇمىستارى ءجۇرىپ جاتقان جوبالاردىڭ پايدالانۋ كەزەڭىنە ءوتۋ باستامالارى ءوندىرىس ۇدەرىسىنە سەرپىن بەرمەك. سونىمەن قاتار جاڭا تەحنولوگيالاردى ەنگىزە وتىرىپ, ەسكى كەن ورىندارىنداعى ءوندىرۋ كولەمىن ساقتاپ تۇرۋعا ەرەكشە دەن قويىلادى. ادەتتە مۇنداي كەن ورىندارى قولدانىستاعى ينفراقۇرىلىممەن جانە ەلدى مەكەندەرمەن تىعىز بايلانىستى, سوندىقتان ولاردىڭ دامۋى مەن جۇمىس ورىندارىنىڭ ساقتالۋىن قامتاماسىز ەتۋ – ماڭىزدى مىندەت.
قمگ تەحنولوگيالىق سىن-قاتەرلەر باعدارلاماسىن ازىرلەدى. بۇل باستاما ءاربىر كەن ورنىنداعى مۇناي كولەمىن ارتتىرۋدا سارالانعان ادىستەردى قولدانۋدى كوزدەيدى. بىلتىر وسى جوبانىڭ ەسەبىنەن قوسىمشا 418 مىڭ توننا مۇناي ءوندىرىلدى.
وسى رەتتە قمگ-نىڭ تيىمدىلىگى تومەن كەن ورىندارىن يگەرۋ ماسەلەسىنە جەكە توقتالىپ وتسەك. كومپانيا ءوندىرۋ كولەمىن ۇلعايتۋ جانە مۇناي الۋ كوەففيتسيەنتىن ارتتىرۋعا ەرەكشە كوڭىل ءبولىپ وتىر. كومپانيا بۇل ماقساتتارعا جەتۋ ءۇشىن وسىنداي قيىندىقتارعا تاپ بولاتىن ستراتەگيالىق سەرىكتەستەرمەن ءوزارا جۇمىس ىستەپ, تاجىريبە الماسادى. كەيىنگى جىلدارى جەتەكشى وتاندىق جانە شەتەلدىك عىلىمي زەرتتەۋ ينستيتۋتتارمەن ىنتىماقتاسا وتىرىپ, عىلىمي زەرتتەۋ جۇمىستارى كەڭىنەن جۇرگىزىلە باستادى. مىسالى, ساتباەۆ اتىنداعى ۋنيۆەرسيتەتپەن مۇناي ءوندىرۋدى ۇلعايتۋعا باعىتتالعان مۇناي قاباتتارىنداعى اعىنداردى قايتا ءبولۋ بويىنشا جۇمىس اتقارىلدى. سوكولسكي اتىنداعى وتىن, كاتاليز جانە ەلەكتر حيمياسى ينستيتۋتىمەن مۇناي كاسىپشىلىگى جابدىقتارىنىڭ كورروزياسىمەن كۇرەسۋ بويىنشا جۇمىس جۇرگىزدى. گاز شوعىرىن يگەرۋگە قاتىستى كەشەندى جۇمىس تا جۇرگىزىلىپ جاتىر, بۇل 2030 جىلعا قاراي جىلىنا 2,8 ملرد تەكشە مەتر قوسىمشا گاز كولەمىمەن قامتاماسىز ەتەدى.
ىشكى نارىقتى مۇناي ونىمدەرىمەن قامتاماسىز ەتۋ
وتاندىق مۇناي وڭدەۋ زاۋىتتارى ۇزدىكسىز ءارى سەنىمدى جۇمىس ىستەپ جاتىر. زاۋىت جۇمىسشىلارىنىڭ قاجىرلى ەڭبەگىنىڭ ارقاسىندا جىل سايىن مۇناي وڭدەۋ جانە جەڭىل مۇناي ونىمدەرىن ءوندىرۋ بويىنشا رەكوردتىق كورسەتكىشتەر تىركەلۋدە. قمگ 5 جىل ىشىندە جەڭىل مۇناي ونىمدەرىن شىعارۋدى 2 ملن تونناعا ۇلعايتتى, ونىڭ ىشىندە 900 مىڭ توننا اۆتوبەنزين, 800 مىڭ توننا ديزەل وتىنى جانە 300 مىڭ توننا اۆياوتىن بار. ۋاقىت وتكەن سايىن ءوسىپ كەلە جاتقان سۇرانىستى وتەۋ ءۇشىن بارلىق 3 وتاندىق مۇناي وڭدەۋ زاۋىتىنىڭ قۋاتىن 2030 جىلعا دەيىن 7,9 ملن تونناعا كەڭەيتۋ بويىنشا ينۆەستيتسيالىق جوبالار قولعا الىندى.
وزەكتى ماسەلەلەردىڭ ءبىرى – جول-قۇرىلىس كومپانيالارىن وتاندىق بيتۋممەن قامتاماسىز ەتۋ. 2024 جىلى پاۆلودار مۇناي-حيميا زاۋىتى بيتۋم ءوندىرىسىن 24,5%-عا ۇلعايتىپ, 360 مىڭ توننا جول بيتۋمىن شىعاردى. قازىر اقتاۋداعى «Caspi Bitum» بيتۋم زاۋىتىنىڭ قۋاتىن 500 مىڭ توننادان 750 مىڭ تونناعا دەيىن كەڭەيتۋ بويىنشا قۇرىلىس جۇمىستارى ءجۇرىپ جاتىر.
مۇناي-گاز حيمياسىن دامىتۋ
ەلىمىزدە مۇناي مەن گازدىڭ قورى مول. بىراق ونى ءتيىمدى پايدالانۋ اسا ماڭىزدى ماسەلەنىڭ ءبىرى. شيكىزاتتى قوسىلعان قۇنى جوعارى ونىمگە اينالدىرۋ – قمگ-نىڭ ستراتەگيالىق باسىمدىعى. مۇناي-گاز حيمياسى شاعىن جانە ورتا بيزنەستىڭ دامۋىندا زور مانگە يە. جاڭا كاسىپورىندار اشۋ, ءوندىرىس تىزبەكتەرى مەن قوسىمشا سالالاردى دامىتۋ وڭىرلەردىڭ ەكونوميكالىق وسۋىنە ىقپال ەتەتىنى انىق. بۇدان بۇرىن بەلگىلى بولعانداي, اتىراۋ وبلىسىندا قۋاتى جىلىنا 1,25 ملن توننا پوليەتيلەن وندىرۋگە قاۋقارلى زاۋىتتىڭ قۇرىلىس جۇمىستارى باستالدى.
كارباميد پەن پەتف (پوليەتيلەنتەرەفتالات) ءوندىرۋ بويىنشا بولاشاقتا سالىناتىن زاۋىتتاردىڭ جوبالاۋ جۇمىستارى جۇرگىزىلىپ جاتىر. بۇل جوبالار 2030 جىلعا قاراي ەل ەكونوميكاسىنا 13 ملرد دوللاردان استام قاراجات تارتىپ, قۇرىلىس كەزىندە شامامەن 15 مىڭ جۇمىس ورنىن جانە 2 مىڭ تۇراقتى جۇمىس ورنىن اشادى. كەلەشەكتە مۇناي-گاز حيمياسى وندىرىستەرىنىڭ تابىستى جۇمىس ىستەۋى تۇراقتى ەكوجۇيەنىڭ قالىپتاسۋىن تالاپ ەتەدى. ياعني ونىمگە دەگەن سۇرانىس پوليمەرلەر تۇتىنۋدىڭ دامىعان ىشكى نارىعى ەسەبىنەن قامتاماسىز ەتىلەدى.
قمگ قۇرىلىستا, تۇرعىن ءۇي شارۋاشىلىعىندا جانە اگروونەركاسىپ كەشەنىندە پوليمەر ماتەريالدارىن پايدالانۋدى تالداۋ جانە ىلگەرىلەتۋ ءۇشىن جوبالاۋ كەڭسەسىن اشقان بولاتىن. پوليمەرلەر حالىقارالىق نارىقتا ءوز ارتىقشىلىعىن كورسەتىپ وتىر. ولار – ءداستۇرلى ماتەريالدارعا قاراعاندا ەكولوگيالىق تازا, ارزان ءارى بەرىك شيكىزات. قازىرگى ۋاقىتتا پوليمەر ونىمدەرىن ەكونوميكانىڭ ءتۇرلى سالالارىنا ەنگىزۋ ءۇشىن نورماتيۆتىك بازا ازىرلەنىپ جاتىر.
مۇناي تاسىمالى
كاسپي قۇبىر جەلىسى كونسورتسيۋمى – قازاقستان مۇنايىن ەكسپورتقا شىعارۋدىڭ ەڭ ءىرى ارناسى. سونىمەن قاتار مۇناي تاسىمالىنىڭ قوسىمشا باعىتتارىن دامىتۋ ماڭىزدى. باكۋ – تبيليسي – دجەيحان باعىتى بويىنشا ەكسپورت كولەمى وڭ ديناميكانى كورسەتىپ جاتىر: 2 جىلدا 2,5 ملن توننا مۇناي جونەلتىلدى.
قمگ جەرگىلىكتى تەڭىز ينفراقۇرىلىمىن دامىتىپ, كەمەلەردى جاڭارتىپ جاتىر. 2024 جىلى قازاقتەڭىزكولىكفلوتى رەكوردتىق 13,2 ملن توننا مۇناي تاسىمالدادى. بۇگىنگى تاڭدا كومپانيانىڭ بارلىعى 15 كەمەسى بار. ارابتىڭ «AD Ports Group» كومپانياسىمەن بىرلەسىپ, تەڭىز فلوتىن ودان ءارى دامىتۋ جوسپاردا. جالپى, بۇل سەرىكتەستىك تەڭىز تاسىمالى سالاسىندا وزىق تاجىريبە الماسۋعا ىقپال ەتەدى.
جىل باسىندا اراب سەرىكتەستەرىمەن كاسپي تەڭىزىندە جۇمىس ىستەۋگە ارنالعان سىيىمدىلىعى 500 جفە-دەن اساتىن (جيىرما فۋتتىق ەكۆيۆالەنت) ەكى زاماناۋي كونتەينەرلىك كەمە سالۋعا كەلىستى. وسىلايشا, قمگ تۇراقتى تەڭىز تاسىمالىن قامتاماسىز ەتەدى جانە ەلدىڭ, سونىڭ ىشىندە ترانسكاسپي حالىقارالىق كولىك باعىتى اياسىندا كولىك لوگيستيكالىق الەۋەتىن دامىتۋدا.
تومەن كومىرتەك باعىتىن دامىتۋ جانە ەكولوگيالىق باستامالار
كليماتقا قاتىستى كۇن تارتىبىندەگى ماڭىزدى ماسەلەلەردى ەسكەرىپ, ەلىمىزدىڭ 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى ماقساتتارىن قولداي وتىرىپ, «قازمۇنايگاز» ءوز قىزمەتىندە قالىپتى, جۇيەلى ءارى دايەكتى دەكاربونيزاتسيالاۋ باعىتىن ۇستانباقشى. بۇل مىندەتتى شەشۋ ءۇشىن قمگ-نىڭ 2060 جىلعا دەيىنگى تومەن كومىرتەكتى دامۋ باعدارلاماسى قابىلداندى. بۇل باعدارلامانىڭ ماقساتى – پارنيك گازدار شىعارىندىلارىن 2019 جىلعى كورسەتكىشتەن 64%-عا قىسقارتۋ.
قمگ ءوز ستراتەگياسىن نەگىزگە الا وتىرىپ, بىرقاتار جاسىل جوبانى, سونىڭ ىشىندە جەك-ءتى دامىتۋدى, تۇراقتى اۆياتسيالىق وتىن (SAF) ءوندىرۋدى جوسپارلى تۇردە ىسكە اسىرىپ كەلەدى. مىسالى, ماڭعىستاۋ وبلىسىنىڭ جاڭاوزەن قالاسىندا 2024 جىلى «Eni» كومپانياسىمەن بىرلەسىپ, جالپى قۋاتى 247 مۆت گيبريدتى ەلەكتر ستانساسىن سالۋ جۇمىستارى باستالدى. جوبا اياسىندا بيىل قۋاتى 50 مۆت كۇن ەلەكتر ستانساسىنىڭ I كەزەڭىن اياقتاۋ جوسپارلانىپ وتىر. 2026 جىلعا دەيىن گاز ەلەكتر ستانساسىنىڭ (120 مۆت) جانە جەل ەنەرگياسى ستانساسىنىڭ (77 مۆت) قۇرىلىسى اياقتالادى. ورتامەرزىمدى پەرسپەكتيۆادا بيولوگيالىق وتىن, تۇراقتى اۆياتسيالىق وتىن SAF ءوندىرىسىن باستاۋ مىندەتىن قويىپ وتىر. بۇگىنگى تاڭدا بۇل جوبانىڭ تەحنيكالىق-ەكونوميكالىق زەرتتەۋ جۇمىستارى اياقتالدى. تومەن كومىرتەكتى ەكونوميكاعا كوشۋ اۋاعا تارالاتىن شىعارىندىلاردى ازايتۋعا كومەكتەسىپ قانا قويماي, سونىمەن قاتار مۇناي-گاز سالاسىندا ۇزاقمەرزىمدى ءوسۋ مەن يننوۆاتسيالار ءۇشىن جاڭا مۇمكىندىكتەرگە جول اشادى.
قمگ جاسىل باستامالارعا بەلسەنە اتسالىسادى. «تازا قازاقستان» جالپىۇلتتىق اكتسياسى اياسىندا قمگ كومپانيالار توبى 97 مىڭنان استام اعاش ەكتى. «قازمۇنايگازدىڭ» قىزمەتىن جۇرگىزەتىن بارلىق ءوڭىر – اقتاۋ, اتىراۋ, اقتوبە, شىمكەنت, قىزىلوردا جانە استانا قامتىلدى. قالالار مەن كەنتتەردە جاڭا جاسىل ايماقتاردى قۇرۋعا, سونداي-اق كومپانيانىڭ ءوندىرىس نىساندارىنىڭ اۋماعىن كوگالداندىرۋعا ەرەكشە نازار اۋدارىلدى.
وڭىرلەر دامۋىنا ۇلەس قوسۋ جانە جۇمىسشى ماماندىقتارىنا قولداۋ كورسەتۋ
«قازمۇنايگاز» ۇلتتىق كومپانياسى ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان ماڭىزدى الەۋمەتتىك جوبالاردى ىسكە اسىرۋدى جالعاستىرىپ جاتىر. ءوزىنىڭ الەۋمەتتىك جاۋاپكەرشىلىگى اياسىندا كومپانيا وڭىرلەردە مەكتەپتەر, بالاباقشالار, مەديتسينالىق مەكەمەلەر مەن سپورتتىق-مادەني نىسانداردى سالۋعا جان-جاقتى ۇلەس قوسادى. 2014–2024 جىلدار ارالىعىندا قمگ قولداۋىمەن 255 ملرد تەڭگەدەن استام سوماعا الەۋمەتتىك جوبالار جۇزەگە اسىرىلدى.
«وتپان» جوباسى اياسىندا اۋىلداعى ءبىلىم بەرۋ جۇيەسىنە ەرەكشە كوڭىل بولىنەدى. «قازمۇنايگازدىڭ» قولداۋىمەن ماڭعىستاۋ وبلىسىندا ءۇش تىرەك مەكتەپ جابدىقتالعان. ۇيىرمەلەر اشۋعا بارلىق جاعداي جاسالدى. ءۇش تىرەك مەكتەپتە روبوتتەحنيكا كابينەتتەرى, STEM-زەرتحانالار, ارت جانە تەلەستۋديالار, سونداي-اق وقۋشىلارعا ارنالعان دەمالىس ايماقتارى اشىلدى. بۇل مەكتەپتەردە 3,5 مىڭنان استام وقۋشى ءبىلىم الىپ جاتىر. ال پەداگوگتەر ۇجىمىندا 380 ادام بار.
اتىراۋ وبلىسىنىڭ قۇلسارى قالاسىندا 2024 جىلى قۇنى 983,2 ملن تەڭگە بالالاردى وڭالتۋ ورتالىعى سالىندى. عيماراتتا زاماناۋي قۇرال-جابدىق ورناتىلعان. قازىرگى ۋاقىتتا بۇل مەكەمەدە ەرەكشە قاجەتتىلىكتەرى بار 146 بالا ەم الىپ جاتىر.
سونىمەن بىرگە «قازمۇنايگاز» ۇلتتىق كومپانياسى مەملەكەت باسشىسىنىڭ تىكەلەي تاپسىرماسى بويىنشا ورال قالاسىندا «Jaiyq Arena» كوپفۋنكتسيونالدى سپورت كەشەنىن قىسقا ۋاقىت ىشىندە سالىپ شىقتى. قۇنى 20 ملرد تەڭگە بولاتىن الەۋمەتتىك ماڭىزى بار نىسان بولاشاق چەمپيونداردى دايارلاۋ ورتالىعى عانا ەمەس, قالا تۇرعىندارىنا سپورتپەن شۇعىلدانۋعا بارلىق جاعداي جاسالعان ورىنعا اينالماق.
كومپانيا قاراجاتىنا قىزىلوردادا وقۋشىلار سارايى بوي كوتەردى. اۋدانى 3 مىڭ شارشى مەترگە جۋىق زاماناۋي كوپفۋنكتسيونالدى كەشەن 350 بالاعا ەسەپتەلگەن. زاماناۋي وقۋشىلار سارايىندا تەحنوورتالىق, باعدارلامالاۋ, روبوتتەحنيكا جانە ونەركاسىپتىك ديزاين سىنىپتارى, ەكولوگيالىق زەرتحانا, جىلىجايلار مەن قىسقى باق, تەلەستۋديا, ۆوكال, مۋزىكالىق اسپاپتار مەن حورەوگرافيا سىنىپتارى بار. بۇل «قازمۇنايگاز» ىسكە اسىرعان الەۋمەتتىك جوبالاردىڭ تولىق ءتىزىمى ەمەس, بۇل باعىتتاعى جۇمىس تۇراقتى جۇرگىزىلەدى.
وندىرىستە ەڭبەك ەتەتىن پەرسونالعا كەلەتىن بولساق, ىڭعايلى ەڭبەك جاعدايىن جاساۋ جانە وندىرىستىك قاۋىپسىزدىكتى قامتاماسىز ەتۋ عانا ەمەس, سونىمەن قاتار كاسىبي وقىتۋ, بىلىكتىلىكتى ارتتىرۋ, تاعىلىمدامادان ءوتۋ جانە تاجىريبە الماسۋ ءۇشىن مۇمكىندىكتەر ۇسىنۋ ماڭىزدى.
بۇل رەتتە, 2025 جىلدى «جۇمىسشى ماماندىقتارى جىلى» دەپ جاريالاعان پرەزيدەنتتىڭ باستاماسى وزەكتى بولىپ وتىر. قمگ كومپانيالار توبىندا وندىرىستە 43 مىڭنان استام ادام جۇمىس ىستەيدى. جۇمىسشى ماماندىقتارىنىڭ بەدەلىن ارتتىرۋعا باعىتتالعان نەگىزگى ءىس-شارالاردىڭ ءبىرى – «ۇزدىك مامان» شەبەرلىك بايقاۋى. بۇل ءداستۇرلى بايقاۋ ون جىلدان بەرى وتكىزىلىپ كەلەدى جانە ۇزدىك ماماندارعا ءوز داعدىلارىن كورسەتۋگە مۇمكىندىك بەرەدى. بىلتىر كونكۋرسقا اتىراۋ, ماڭعىستاۋ, قىزىلوردا, اقتوبە جانە پاۆلودار وبلىستارىنىڭ, شىمكەنت قالاسىنىڭ, سونداي-اق رۋمىنياداعى قمگ ەنشىلەس كاسىپورىندارىنان 300 قىزمەتكەر قاتىستى.
«جۇمىسشى ماماندىقتارى جىلى» اياسىندا «قازمۇنايگاز» جەكەلەگەن جۇمىسشى ماماندىقتارى بويىنشا «WORLDSKILLS KMG» ۇلتتىق چەمپيوناتىن, تۇركىتىلدەس ەلدەردىڭ وكىلدەرى قاتىساتىن «TurkicSkills» كاسىبي شەبەرلىك چەمپيوناتىن وتكىزۋدى, ايەلدەر اراسىندا جۇمىسشى ماماندىقتارى ءۇشىن مودۋلدىك وقىتۋ باعدارلاماسىن قولعا الۋدى, سەرىكتەس كومپانيالاردا تاعىلىمداما ۇيىمداستىرۋدى, ءوندىرىس تيىمدىلىگىن ارتتىرۋ ماقساتىندا «الىپ» جوباسىن ىسكە اسىرۋدى, جاستار فورۋمدارىن وتكىزۋدى جوسپارلاپ وتىر.
كومپانيانىڭ باستى قۇندىلىعى – ادامدار. «قازمۇنايگاز» جۇيەسىندە ەڭبەك ەتەتىن بارشا قىزمەتكەردى ۇلتتىق كومپانيانىڭ 23 جىلدىعىمەن قۇتتىقتايمىز! كومپانيانىڭ بۇگىنگى جەتىستىگى – قىزمەتكەرلەردىڭ قاجىرلى ەڭبەگىنىڭ جەمىسى.
قورىتا كەلگەندە, «قازمۇنايگاز» ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتە وتىرىپ, مۇناي-گاز سالاسىنداعى ستراتەگيالىق ماڭىزدى باعىتتاردى دامىتۋدى كوزدەيتىنىن اتاپ وتكەن ءجون. ۇلتتىق كومپانيا گەولوگيالىق بارلاۋ جانە مۇناي-گاز حيمياسىنداعى اۋقىمدى ءارى كوپ قارجىنى قاجەت ەتەتىن جوبالارعا باستاماشىلىق ەتەدى. بۇل باستامالار جاڭا رەسۋرس كوزدەرىنە جول اشىپ قانا قويماي, ەلىمىزدىڭ ەكونوميكالىق وركەندەۋىنە ىقپال ەتەدى.
قمگ جەكەمەنشىك بيزنەس تاۋەكەل ەتە بەرمەيتىن, الايدا ەلىمىز ءۇشىن اسا ماڭىزدى سالالاردى دامىتۋدى قولعا الادى. ءدال وسى ستراتەگيالىق قادام كومپانيانىڭ باستى ميسسياسىن ايقىنداي تۇسەدى.
