كونتسەرتتە قوستاناي وبلىسى جانگەلدين اۋدانىنىڭ قونىسباي ءابىل اتىنداعى «عاسىرلار پەرنەسى» حالىق ءانسامبلى, «ەركەناز» «ۇلگىلى» بي ءانسامبلى, «بالقاديشا» جەتىگەنشىلەر توبى, بىرقاتار وبلىستىق, رەسپۋبليكالىق بايقاۋلاردىڭ لاۋرەاتى جولامانوۆتار وتباسىلىق ءانسامبلى ونەر كورسەتەدى.
كورەرمەندەر فاريزا بۇركىتباي, بايدوس قوجاساعيەۆ, جاۋكە وڭداعان, ديلارا قارەكەنوۆا, تالعات ساپابەكوۆ, سەرىك الپىسوۆ, سەرىكبولسىن ابىكەنوۆ, ميراس ابدىكارىم جانە اسحات پەن ديدار, قانات پەن اسەم دۋەتتەرىنىڭ ءان-شاشۋىن تىڭداپ, تاماشالاي الادى.
كونتسەرتتىك باعدارلاماداعى «عاسىرلار پەرنەسى» حالىق ءانسامبلىنىڭ تارتۋىن ايرىقشا اتاپ وتۋگە بولادى. 1974 جىلى قازاقتىڭ ءبىرتۋار ازاماتى وزبەكالى جانىبەكوۆتىڭ جاناشىرلىعىمەن قۇرىلعان انسامبلگە بۇگىندە الماس سەيىلحان جەتەكشىلىك ەتەدى.
ال ب. حامزين اتىنداعى ونەر مەكتەبىنىڭ «ەركەناز» بي انسامبلىنە وتكەن جىلى قازاقستان رەسپۋبليكاسى مادەنيەت جانە اقپارات ءمينيسترىنىڭ بۇيرىعىمەن «ۇلگىلى» اتاعىن العان ەدى.
بۇدان بولەك DaNas شىعارماشىلىق ورتالىعىنىڭ جانىنان قۇرىلعان «بالقاديشا» جەتىگەنشىلەر توبى قازىردىڭ وزىندە تالاي بيىكتى باعىندىرىپ ۇلگەردى. ونەرلى ۇجىمعا ءبىرجان سال اتىنداعى كوكشەتاۋ مۋزىكا كوللەدجىنىڭ تۇلەگى, تالانتتى جاس پەريزات قالابايقىزى جەتەكشىلىك جاسايدى.
كونتسەرتتىڭ «تورعايدان سالەم» دەپ اتالۋى دا بەكەر ەمەس. 1948 جىلى تورعايدىڭ توپجارعانى, حالىق اقىنى نۇرحان احمەتبەكوۆ قوستانايدا وتكەن اۋىلشارۋاشىلىعى كورمەسىندە ءوزىنىڭ اتاقتى «تورعايدان سالەم» تولعاۋىن ورىنداعانى بەلگىلى.
