فوتو: سۋ رەسۋرستارى جانە يرريگاتسيا مينيسترلىگى
كەزدەسۋلەر بارىسىندا ەلىمىزدەگى سۋ ۇنەمدەۋ بويىنشا ۇزدىك تاجىريبەلەر تانىستىرىلىپ, مەملەكەتتىك قولداۋ ءىس-شارالارى جونىندە اقپارات بەرىلەدى.
«سۋ رەسۋرستارى جانە يرريگاتسيا مينيسترلىگى اۋىل شارۋاشىلىعى مينيسترلىگىمەن بىرگە شارۋالاردى قاجەت ينفراقۇرىلىمدى قالىپتاستىرۋ, سۋ ۇنەمدەۋ جۇيەلەرىن ساتىپ الۋ جانە ورناتۋ شىعىندارىن سۋبسيديالاۋ مولشەرىن 50%-دان 80%-عا دەيىن ارتتىردى. سونىمەن قاتار, بۇگىندە سۋ ۇنەمدەۋ تەحنولوگياسىن قولداناتىن ديقاندار سۋارمالى سۋ ءۇشىن از تولەيدى. سەبەبى, سۋ ۇنەمدەۋ جۇيەلەرىن پايدالانعان كەزدە سۋارمالى سۋ اقىسىن سۋبسيديالاۋ مولشەرى تاريفكە بايلانىستى 85%-عا دەيىن ۇلعايتىلدى», دەدى سۋدى ۇنەمدەۋ تەحنولوگيالارىن دامىتۋ دەپارتامەنتىنىڭ ديرەكتورى بەرىكبول ماندىباەۆ.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە بۇگىندە قازاقستاندا سۋ شاشاتىن ماشينالار مەن تامشىلاتىپ سۋارۋ جابدىعىن شىعاراتىن 4 وتاندىق زاۋىت جۇمىس ىستەيدى. بيىل تۇركىستان وبلىسىندا قىتايلىق كومپانيالارمەن بىرلەسىپ تامشىلاتىپ سۋارۋ جابدىعىن شىعاراتىن تاعى 2 زاۋىت اشۋ جوسپارلانىپ وتىر.
بۇدان بولەك, سۋ رەسۋرستارى جانە يرريگاتسيا مينيسترلىگى سۋ ۇنەمدەيتىن يننوۆاتسيالىق تەحنولوگيالاردى دا سىناقتان وتكىزىپ جاتىر. ماسەلەن, بىلتىر ەلىمىزدىڭ جەتەكشى عىلىمي-زەرتتەۋ ينستيتۋتتارىمەن بىرلەسىپ ماجارلىق Water-Retainer پرەپاراتى سىناقتان ءوتتى. سىناق ناتيجەسى جەكەلەگەن داقىلدار بويىنشا سۋ ۇنەمدەۋ جانە ونىمدىلىكتى ارتتىرۋ بويىنشا وڭ اسەرىن كورسەتتى. الدىن الا مالىمەت بويىنشا, پرەپاراتتى قولدانۋ شامامەن 20-37% سۋ ۇنەمدەۋگە مۇمكىندىك بەرەدى, سونىمەن قاتار ونىمدىلىكتى جاقسارتادى.
