ەر-توقىمنىڭ بۇل ءتۇرى ارقا دالاسىندا كەڭ تارالعان. ەردىڭ ەل اۋزىنداعى اتاۋى – ۇيرەكباس ەر نەمەسە ارعىن ەر. بۇل جادىگەردىڭ باس ءپىشىنى كوبىنە ۇيرەك ەرگە كەلىڭكىرەيدى. ءبىر قاراعاندا سۇلباسى سۋدا جۇزگەن ۇيرەك سەكىلدى. كوبىنە سال-سەرىلەر قولدانعان كورىنەدى.
– قاز داۋىستى قازىبەك ءبيدىڭ ۇرپاعى, حالىق اقىنى, ءانشى-كومپوزيتور, سەگىز قىرلى, ءبىر سىرلى, ءوز زامانىندا ولەڭ-جىرلارى, جىر-شۋماقتارى قاعاز بەتىنە تۇسپەسە دە ەل اۋزىندا ساقتالعان دارقان دالانىڭ ءدۇلد ۇلى ءمادي ءباپي ۇلىنىڭ ەر-توقىمىن مۋزەي قورىنا تابىستاۋ كوپتەن ويىمدا ءجۇر ەدى. دەگەنمەن تاريحي جادىگەردىڭ ءۇيدىڭ تورىندە تۇرعانى دا ەرەكشە اسەرلى. الايدا مەنەن كەيىن كىم يە بولىپ قالاتىنىن ويلاپ, وسى شەشىمدى ءجون كوردىم. ماعان دەيىن قولدان-قولعا ءوتىپ كەلگەن جادىگەر عوي. قۇندى دۇنيەنىڭ قولىما ءتۇسۋىنىڭ دە تاريحى تەرەڭدە, – دەيدى ساياتشى, ولكەتانۋشى تىلەۋقابىل ەسەنبەك ۇلى.
جادىگەر بۇركىتشىنىڭ قولىنا قالاي تۇسكەن دەگەن سۇراق تۋى زاڭدى. ءماديدىڭ جول سەرىگى, اتقوسشىسى بولعان توقاش كادىكەەۆ ءانشىنىڭ قارىنداسى ماپرۋزاعا ۇيلەنگەن. ءمادي اتىلىپ كەتكەننەن كەيىن ەر-تۇرمانى كۇيەۋبالاسى توقاش كادىكەەۆتە قالعان. توقاشتان بالاسى لياتايعا بەرىلگەن. لياتايدان شاحتادا بىرگە جۇمىس ىستەگەن ايعوجا تۋىسىنا كوشەدى. ايعوجادان جاقىن تۋىسى نىعمەتوللانىڭ قولىنا تۇسەدى. ال نىعمەتوللا – تىلەۋقابىلدىڭ ناعاشىسى. بۇل ەر-توقىمدى بۇل كىسى قالپىنا كەلتىرىپ, 30 جىل تۇتىنىپتى.
كونە ەر شامامەن XX عاسىردىڭ باسىندا جاسالعان. ماتەريالى اعاشتان شابىلىپ, تازا بىلعارىمەن قاپتالىپ, كۇمىسپەن كۇپتەلىپ, بەزەندىرىلگەن.
قاراعاندى وبلىسى,
شەت اۋدانى
