الماتى ونكولوگيالىق ورتالىعىنىڭ ونكولوگ-ۋرولوگى ايكەرىم وماروۆا ونكولوگيالىق كەسەلدەردىڭ كوپشىلىگى اسيمپتوماتيكالىق تۇردە داميتىندىقتان, اسقىنعان كەزدە عانا انىقتالاتىنىن ايتادى.
«قۋىق استى بەزىنىڭ قاتەرلى ىسىگىن دەر كەزىندە انىقتاۋ ءۇشىن جىل سايىن قۋىق استى بەزىنىڭ سپەتسيفيكالىق انتيگەنىنە تەست تاپسىرۋ قاجەت. ونىڭ جوعارىلاۋى ىسىك پروتسەسىنىڭ باستالۋىن كورسەتۋى مۇمكىن. ەرتە دياگنوز ءساتتى ەمدەۋ مۇمكىندىگىن ايتارلىقتاي ارتتىرادى», دەيدى مامان.
نەسەپ-جىنىس جولدارىنىڭ قاتەرلى ىسىگىنە بەيىم, قاۋىپتى توبىنا 50 جاستان اسقان, سوزىلمالى قابىنۋ پروتسەستەرى (پيەلونەفريت, پروستاتيت, تسيستيت), جامان ادەتتەر, سەمىزدىك, تۇقىم قۋالايتىن كەسەلدەر, ۋلى زاتتاردىڭ اسەر ەتۋ جاعدايىندا جۇمىس ىستەيتىندەر كىرەدى.
ماسەلەن, 2024 جىلى الماتىدا 5209 قاتەرلى ىسىك اۋرۋى تىركەلدى. ونىڭ ىشىندە 518 جاعداي نەسەپ-جىنىس جولدارى وبىرى ەكەندىگى انىقتالعان. اتاپ ايتقاندا, 218 – قۋىق استى بەزى وبىرى, 189 – بۇيرەك جاسۋشالى ىسىگى, 111 – قۋىق ىسىگى.
«الدىن الۋ جانە دەر كەزىندە مەديتسينالىق تەكسەرۋدەن ءوتۋ – دەنساۋلىقتى ساقتاۋدىڭ كەپىلى. ەگەر سىزدە ءزار شىعارۋدا قيىندىق بولسا, زارىڭىزدەن قان كورىنىپ, بەلىڭىز اۋىرسا, دارىگەرگە بارۋدى كەيىنگە قالدىرماڭىز», دەيدى ماماندار.
