«2015 جىلى فولكلورلىق انسامبل قۇرۋعا نيەتتەنىپ, وسى تۇرعىدا جۇمىس ىستەدىك. ناتيجەسىندە, ء«ۇش قوڭىر» فولكلورلىق-ەتنوگرافيالىق ءانسامبلى قۇرىلىپ, 42 شتاتپەن تولىقتى. وسىدان كەيىن اۋداندىق مادەنيەت ءۇيىنىڭ سول كەزدەگى رەجيسسەرى باعلان قالمانوۆ تەاتر اشۋ جونىندە ۇسىنىس ايتتى. سودان باستاپ تالانتتى جاستاردىڭ اتسالىسۋىمەن العاشقى سپەكتاكلدى دايىندادىق. ول كەزدە ارامىزدا ديپلومى بار ءبىر عانا تەاتر اكتەرى الىشەر مۇقاشوۆ بولدى. قاراساي اۋدانىنىڭ 90 جىلدىق مەرەيتويىنا وراي جازۋشى ناعاشىبەك قاپالبەك ۇلىنىڭ «قاراساي باتىر» اتتى دراماسىمەن تەاتردىڭ تۇساۋى كەسىلدى. رەجيسسەر باعلان مارات ۇلى قويعان تەاتردىڭ قاناتقاقتى بۇل سپەكتاكلى كاسىبي تۇرعىدا جوعارى باعالانىپ, بولاشاعىنا جارقىن جول اشتى», – دەيدى تەاتر نەگىزىن قالاۋشى, اۋداندىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمىنىڭ باسشىسى كۇلجان دۇيسەنوۆا.
كورەرمەن جۇرەگىنە جول تاپقان تۇڭعىش قويىلىمى ءساتتى شىققان تەاتر ونەرپازدارى قاناتىن قومداپ, دراماتۋرگ جابال ەرعاليەۆتىڭ «جان شىرىلى» پەساسىن دايىندادى. سپەكتاكل ارقىلى قوعامدا بەلەڭ العان كەلەڭسىزدىكتەردى قوزعاپ, دابىل قاقتى. وسىلايشا, جۇدىرىقتاي جۇمىلىپ, ءوز الدىنا ۇجىم بولىپ قالىپتاسقان ونەرلى جاستار كاسىبي اكتەرلەردىڭ دەڭگەيىنە جەتەعابىل جۇمىس جاساۋعا توسەلە باستاعاندارىن بايقاتادى.
«قاراساي جاستارى» تەاترى اباي قۇنانباي ۇلىنىڭ 175 جىلدىعىنا وراي باقىت بەدەلحان ۇلىنىڭ «رۋح جىرى» پوەماسىنىڭ جەلىسى بويىنشا «جۇرەكتىڭ كوزى اشىلسا...» اتتى پوەتيكالىق دراماسىن ۇسىندى. تالانتتى رەجيسسەر باعلان مارات ۇلى ساحنالاعان قويىلىم 2021 جىلى تالدىقورعان قالاسى ءسۇيىنباي اتىنداعى الماتى وبلىستىق فيلارمونياسىندا «حالىقتىق جانە جاڭادان قۇرىلعان حالىقتىق اتاعى بار» تەاتر فەستيۆالىنە قاتىسىپ, 32 تەاتردىڭ اراسىنان توپ جارىپ, باس جۇلدەنى يەلەنگەنىن ەرەكشە اتاعان ءجون.
ودان كەيىنگى كەزەكتە دراماتۋرگ تولەن ابدىكتىڭ ء«بىز ۇشەۋ ەدىك» دراماسىن دا ءساتتى ساحنالاعان ونەر ۇجىمى ەكى جىل بۇرىن عابيت مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترىندا اقىن, دراماتۋرگ, حالىقارالىق «الاش» ادەبي سىيلىعىنىڭ لاۋرەاتى باقىت بەدەلحاننىڭ «9 گرامم...» ينتەللەكتۋالدى-پوەتيكالىق سپەكتاكلىن ساحنالادى. قويىلىمعا كەلگەن كورەرمەننەن ينە شانشار ورىن بولمادى. قازاقستاننىڭ ەڭبەك ەرى ءاسانالى ءاشىموۆ جاستار تەاترىنا العىس ايتىپ, باتاسىن بەرگەن بولاتىن. سپەكتاكلدى رەجيسسەر جۇلدىزبەك جۇمانباي ساحنالاسا, سازگەر قانات يبراگيموۆ دىبىسپەن كوركەمدەپ, كورەرمەننىڭ ىستىق ىقىلاسىنا بولەندى. سونداعى جاس اكتەرلەردىڭ كيەلى ساحناداعى شەبەرلىكتەرى مەن تاباندىلىقتارىنا ءدۇيىم جۇرت تىك تۇرىپ قوشەمەت كورسەتىپ, قول سوققان ەدى.
«نار تاۋەكەلمەن» سالماقتى سپەكتاكلدەر ساحنالادىق. ءسويتىپ, شەبەرلىگىمىز شىڭدالا ءتۇستى. ۋاقىت وتە كەلە بالالارعا ارنالعان «برەمەن مۋزىكانتتارى», «باتىل كوجەكتەر», «قادىردىڭ باقىتى», «الدار كوسە», «قۇستار فەستيۆالى» اتتى ەرتەگىلەرمەن كىشكەنتاي كورەرمەندەردى قۋانتىپ كەلەمىز. كورەرمەندەردىڭ كوڭىلىن سەرپىلتۋ ماقساتىندا ءا.ورازباەۆ اۋدارعان س.لوبوزەروۆتىڭ «قالادان كەلگەن مەيمان» كومەديالىق سپەكتاكلىن ساحنالادىق. قويىلىم رەجيسسەرى الىشەر مۇقاشوۆ بولدى. بۇگىندە تەاتردا رەجيسسەر جاسۇلان زامانبەك, تەاتر اكتەرلەرى جارقىن راقىمقاش, ابزال ءابدىحان, جانار بەرىك, شىنار بەرجانوۆا, دانا ەرعازينا, ايمان راحىمبەرديەۆا, نۇربەك الپىسباي, ماديار ورنىقباي, وپەراتور نۇرزات قاسقاباەۆ سىندى تالانتتى جاستار جۇمىس ىستەيدى», دەيدى تەاتردىڭ كوركەمدىك جەتەكشىسى نۇربول داڭعىل.
الايدا سۇتتەي ۇيىعان ۇجىمنىڭ كەم-كەتىگى دە جوق ەمەس. ەڭ الدىمەن, حالىقتىق ونەردى ورىستەتىپ جۇرگەن تەاترعا كەرەگى شتات بىرلىكتەرى بولسا, ەكىنشىدەن, گاسترولدىك ساپارعا شىعۋعا اۆتوبۋستىڭ جوقتىعى ۇلكەن كەدەرگى ەكەنى جاسىرىن ەمەس. تەاتر نەگىزى قالانعالى بەرى كوستيۋمدەرى دە جاڭارماعانىن جاسىرۋعا بولماس. سوعان قاراماستان ۇلت رۋحانياتىنىڭ شىنايى قازىناسىن بايىتىپ, قاناتىن كەڭگە جايعان «قاراساي جاستارى» تەاترىنىڭ جەتى جىلدا جەتكەن جەتىستىكتەرى كوڭىل كونشىتەدى.
الماتى وبلىسى,
قاراساي اۋدانى
