فوتو: قىرمىزى جۇماعاليقىزى
وقۋ-اعارتۋ ءمينيسترى عاني بەيسەمباەۆ اتاپ وتكەندەي, بۇل فەستيۆال – تەك كاسىپتىك ءبىلىمدى ناسيحاتتاۋدىڭ عانا ەمەس, سونداي-اق, قول ەڭبەگىنىڭ قادىرىن ارتتىرۋدىڭ سيمۆولى. مۇندا ءار قاتىسۋشى جۇمىسشى ماماندىقتارىنىڭ سىرىن اشىپ, ونى ءوز قولىمەن جاساپ كورۋ ارقىلى ەڭبەكتىڭ ناعىز قۇنىن تۇسىنەدى.
«ارينە, بۇگىنگى «جۇمىسشى ماماندىقتار قالاسى» بۇل ءبىزدىڭ ەلىمىزدە ءبىرىنشى رەت ءوتىپ وتىرعان ۇلكەن ەمەرسيۆتى فورماتتاعى ءىس-شارا. جانە بۇل تەك قانا كورمە ستيلىندە ەمەس, كەرىسىنشە, قالاعا كەلىپ جاتقان قوناقتاردىڭ وسىندا كورسەتىلگەن دۇنيەلەردى تەك قانا كوزبەن كورىپ ەمەس, قولمەن ۇستاپ, مىنا جۇمىسشى ماماندىقتاردىڭ قىر-سىرىمەن تانىسۋعا مۇمكىندىك بەرىپ جاتىر. بۇل ءبىرىنشى كەزەكتە, جۇمىس بەرۋشىلەر مەن كوللەدجدەردىڭ اراسىنداعى ىنتىماقتاستىقتى كۇشەيتۋگە, وقۋشىلار مەن جاستار اراسىنداعى كاسىپتىك باعدارلاۋدى دامىتۋعا, ياعني كەلىپ جاتقان جاستاردىڭ ءوزىنىڭ ماماندىعىن دۇرىس تاڭداۋىنا ۇلكەن مۇمكىندىك بەرەتىن ورتالىق. جالپى, بۇل قالانىڭ وسىلاي كورىنىس تابۋىنا ارينە, بارلىق مەملەكەتتىك مەكەمەلەر ارالاسىپ وتىر. ودان كەيىن 100-دەن اسا كاسىپورىندار جانە 50-گە جۋىق كوللەدجدەر قاتىستى. تەك قانا جۇمىسشى ماماندىقتار قالاسى ەمەس, بىرلىكتەر قالاسى دەۋگە دە بولادى. ويتكەنى بۇل بىرلىك قالاسىندا بارلىعى باس بىرىكتىرىپ جۇمىسشى ماماندىقتارىنىڭ الەۋەتى مەن ونىڭ جاڭا قىزىعۋشىلىعىن ارتتىرۋعا جانە مارتەبەسىن كوتەرۋگە بىرلەسكەن جۇمىس اتقاراتىندىعىن ەرەكشە اتاپ ءوتۋ كەرەك», دەدى وقۋ-اعارتۋ ءمينيسترى.
راسىمەن دە فەستيۆال ەڭبەك نارىعى مەن ءبىلىم بەرۋ سالاسىنىڭ اراسىنداعى التىن كوپىر ىسپەتتى. ءوندىرىس وكىلدەرى, كوللەدج ستۋدەنتتەرى مەن مەكتەپ وقۋشىلارى ءبىر الاڭدا كەزدەسىپ, تاجىريبە الماسىپ, سونداي-اق شەبەرلىك سىنىپتارىنا قاتىسىپ, جۇمىسشى كاسىپتەرىنىڭ قىر-سىرىن مەڭگەرە ءبىلدى. ءوز ءىسىنىڭ ناعىز يەلەرى بولاشاق ماماندارعا باعىت-باعدار بەرىپ, ولاردىڭ ەڭبەك جولىنداعى سەنىمىن نىعايتۋعا ات سالىستى.
بۇگىندە تەحنولوگيا دامىپ, زاماناۋي ءوندىرىس قارقىندى وزگەرىپ جاتقاندا, بىلىكتى جۇمىسشىلارعا دەگەن سۇرانىس ارتىپ كەلەدى. سوندىقتان مۇنداي فەستيۆالدەر جاستارعا تەك كاسىپ تاڭداۋعا كومەكتەسىپ قانا قويماي, ولاردىڭ بويىندا ەڭبەكسۇيگىشتىك پەن كاسىبي داعدىلاردى دامىتۋعا سەپتىگىن تيگىزەدى.
فەستيۆال قوناقتارى ارنايى قۇرىلعىلار مەن ينتەراكتيۆتى پلاتفورمالار ارقىلى ءارتۇرلى ماماندىقتاردىڭ ەرەكشەلىكتەرىمەن تانىسىپ, وزدەرىن ءارتۇرلى سالالاردا سىناپ كوردى.
سونىمەن قاتار قوعامدا جۇمىسشى ماماندىقتارىنا دەگەن كوزقاراستى جاقسارتۋ ارقىلى جاستاردى تەحنيكالىق جانە كاسىپتىك بىلىمگە ىنتالاندىردى. سونداي-اق, قازىرگى زامانعى ءوندىرىس پەن جاڭا تەحنولوگيالاردىڭ قالاي جۇمىس ىستەيتىنىن كورسەتىپ, جاستاردىڭ يننوۆاتسيالارعا قىزىعۋشىلىعىن وياتتى.
وسىلايشا, ءىس-شارا جۇمىسشى ماماندىقتارىنىڭ قوعامداعى ءرولىن تاعى ءبىر مارتە ايقىنداپ, ەڭبەكتىڭ قادىرىن ۇعىندىردى.
