دەپۋتاتتاردىڭ تالقىلاۋىنا كيپر رەسپۋبليكاسىمەن سوتتالعان ادامداردى بەرۋ تۋرالى كەلىسىمدى, سونداي-اق قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل جونىندەگى ەۋرازيالىق توپ تۋرالى كەلىسىم جانە ۇيىمنىڭ بيۋدجەتىن قالىپتاستىرۋ مەن اتقارۋ ءتارتىبى تۋرالى ەرەجەگە وزگەرىستەر ەنگىزۋ تۋرالى راتيفيكاتسيالىق زاڭ جوبالارىن قاراۋ ۇسىنىلادى.
ەكىنشى وقىلىمدا دەپۋتاتتار دەنساۋلىق ساقتاۋ سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا زاڭ جوباسىن قارايدى. زاڭ جوباسىمەن جۇمىس بارىسىندا دەپۋتاتتار جەكەلەگەن نورمالاردى پىسىقتادى. اتاپ ايتقاندا, ەستۋ قابىلەتى بۇزىلعان جانە مۇگەدەكتىگى جوق ادامداردى جەرگىلىكتى بيۋدجەتتەر ەسەبىنەن ەستۋ پروتەزىمەن قامتاماسىز ەتۋ, سونداي-اق تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە كورسەتىلەتىن قىزمەتتەر تىزبەسىنە ونكولوگيالىق اۋرۋلاردى ەرتە انىقتاۋعا سكرينينگتىك زەرتتەۋلەردى ەنگىزۋ ۇسىنىلدى.
سونىمەن قاتار باس بوستاندىعىنان ايىرۋعا نەمەسە شارتتى تۇردە باس بوستاندىعىنان ايىرۋعا بايلانىستى ەمەس جازاعا سوتتالعان ادامداردىڭ قۇمار ويىندارعا قاتىسۋىنا تىيىم سالۋعا باعىتتالعان تۇزەتۋلەر ەنگىزىلەدى.
سونداي-اق سپورتتىق ءىس-شارالاردى وتكىزۋ كەزىندە سپورت عيماراتتارىنىڭ ىشىندە ورنالاسقان جارنامانى قوسپاعاندا, عيماراتتار مەن قۇرىلىستاردا ورنالاستىرىلعان بۋكمەكەرلىك كەڭسەلەر مەن توتاليزاتورلاردىڭ جارناماسىنا تىيىم سالۋعا قاتىستى نورمالار, بۋكمەكەرلىك كەڭسەلەر مەن ەرەكشە سپورتتىق باعىتتاعى باق-تىڭ ينتەرنەت-رەسۋرستارىنداعى جارنامانى قوسپاعاندا, ونلاين-پلاتفورمالاردا جانە باسقا دا باق-تا جانە ۇيالى بايلانىستىڭ ابونەنتتىك قۇرىلعىلارىنا ورنالاستىرىلعان جارناماعا تىيىم سالۋعا باعىتتالعان تۇزەتۋلەردى ەنگىزدى.
كۇن ءتارتىبىنىڭ جوباسىندا ماجىلىسكە كەلىپ تۇسكەن جاڭا زاڭ جوبالارى مەن سەناتتىڭ بيۋدجەت كودەكسىنە ەنگىزگەن تۇزەتۋلەرى دە بار.
