اڭگىمەلەسۋ بارىسىندا ءماجىلىس سپيكەرى حان ءچۋنليندى قازاقستانداعى ديپلوماتيالىق ميسسياسىنىڭ باستالۋىمەن قۇتتىقتاپ, بۇل ەكىجاقتى قارىم-قاتىناستىڭ قارقىندى دامۋى كەزەڭىنە سايكەس كەلگەنىن اتاپ ءوتتى.
– قىتاي – ءبىزدىڭ ەڭ جاقىن كورشىمىز. ەكىجاقتى قارىم-قاتىناسىمىز جاڭا «التىن وتىز جىلدىقتىڭ» كەزەڭىنە ەنىپ, ماڭگىلىك جان-جاقتى ستراتەگيالىق ارىپتەستىك رۋحىندا نىعايىپ كەلەدى. بۇل – ەڭ الدىمەن, ەلدەرىمىزدىڭ كوشباسشىلارىنىڭ قاجىرلى ەڭبەگىنىڭ ناتيجەسى. پرەزيدەنت قاسىم-جومارت توقاەۆپەن توراعا سي ءتسزينپيننىڭ تۇراقتى جەكە كەزدەسۋلەرى قازاقستان-قىتاي ىنتىماقتاستىعىن جاڭا دەڭگەيگە شىعاردى, – دەدى ە.قوشانوۆ.
ءماجىلىس سپيكەرى مەملەكەت باسشىلارى قول جەتكىزگەن بارلىق ۋاعدالاستىقتى ىسكە اسىرۋ ءۇشىن پارلامەنتارالىق بايلانىستاردى دامىتۋعا دايىن ەكەنىن ايتتى.
ەرلان قوشانوۆ سونداي-اق ديپلوماتتى مەملەكەت باسشىسىنىڭ جەتەكشىلىگىمەن قازاقستاندا جۇزەگە اسىرىلىپ جاتقان اۋقىمدى ەكونوميكالىق جانە ساياسي رەفورمالار تۋرالى حاباردار ەتتى. ماسەلەن, حالىقتىڭ بەيبىت اتومدى سەنىمدى ءارى ەكولوگيالىق تازا ەنەرگيا كوزى رەتىندە دامىتۋ تۋرالى شەشىمى جايلى ايتىپ, بۇل قادام الداعى ۋاقىتتا عىلىمنىڭ, تەحنيكانىڭ جانە ءوندىرىستىڭ وركەندەۋىنە باستايتىنىنا نازار اۋداردى. سونداي-اق ءوندىرىس سالاسىن كەڭەيتۋ, بانك سەكتورىن نىعايتۋ جانە ينۆەستيتسيا تارتۋ بويىنشا جوسپارلار دا ءسوز بولدى.
ءوز كەزەگىندە حان چۋنلين قازاقستان مەن قىتاي كوشباسشىلارى ساياساتىنىڭ ورتاق تۇستارى بارىن جانە حالىقارالىق كۇن تارتىبىنەن ەكونوميكالىق دامۋعا دەيىنگى ماسەلەلەر بويىنشا ۇقساس قۇندىلىقتاردى قامتيتىنىن اتاپ ءوتتى. ەلشى قازاقستان قحر ءۇشىن ورتالىق ازياداعى اسا ماڭىزدى ساۋدا جانە ينۆەستيتسيالىق ارىپتەس ەكەنىنە توقتالدى. ول سونداي-اق پارتياارالىق بايلانىستى نىعايتۋعا ءمان بەردى.
تاراپتار ەنەرگەتيكا, جاساندى ينتەللەكت, تسيفرلىق ەكونوميكا, ءبىلىم بەرۋ جانە تۋريزم سياقتى باعىتتارداعى ىنتىماقتاستىقتى تەرەڭدەتۋ جايىن دا تالقىلادى.
